زوجي بعد ست سنين زواج يقول لي >> "زواجنا غلطه وحنا مانصلح لبعض" تعالوووو

31 أكتوبر 2009

يابنات فيني حره وقهرر لايمكن وحده منكم تتخيلها

راح اقول لكم المشكله..

انا لي 6 سنين متزوجه والحمدلله مستقرين وعندي اطفال
زوجي قبل الزواج ما كنت اعرفه ولا اعرف اهله مع اننا نقرب لبعض

هو عاش طول عمرة بقرية .. مايحب المدن ابد

ولايحب الأسواق ولا المطاعم .. الى الآن متمسك في بداوته يحب كشتات البر ويموت بالقنص

حنا من قبيله معروفه ولها سمعتها .. وهو عنده عصبيه قبليه لها ..

اما انا عكسه تماما صحيح اننا من نفس العايله بس ما أحس بإنتماء للقبيله الي انا فيها افضل صديقاتي على بنات جماعتنا ..

اهلي عايشين طول عمرهم بالمدن

وعمري مادخلت قريه ولاجربت اعيش فيها .. احب حياة المدينه الصاخبه .. احب زحمة الناس ..

احب المطاعم واعشق الآكلات العالمية وهو يحب الأكلات الشعبيه ..
..هو عصبي ويتنرفز بسرعه اما انا هادية واعصابي رايقه..

تفكيرنا غير عن بعض واهتماماتنا وميولنا غيرر.. حتى لهجتي غير عن لهجته.. انا من هواياتي الكمبيوتر والإنترنت واحب اتعلم على البرامج الجديده
وأقرأ كتب علمية وثقافيه اما زوجي مايعرف حتى يفتح الكمبيوتر !!!

كل شي يابنات بكللللل شي غير عن بعض بكل شي ..

بس دايما اسايره واسايسه واحاول اني ابين له اني اهتم بالأشياء الي هو يحبها.. ولا احسسه بفرق بيننا.. عشان حياتنا تمشي .. بس احسه مع الأيام طمس شخصيتي الحقيقية

شي ثاني

زوجي مثله مثل باقي الرجال يحب الـ ج ن س

هو يقول انه يحبني وانه مايقدر يستغني عني >>طبعا يقولها لما يكون يبغى شي

يعني هو ما يحبني لشخصي .. يحبني عشان الـ ج ن س

لأنه يقول انه ماتزوج الا عشانه

ويحب يتكلم عنه كثير .. يعني كل مانجلس مع بعض لازم يجيب طاريه.. ويفكر ان هذي هي الرومانسية

لأن هذا هو مفهومه عن الرومانسيه.. احيانا تلوع كبدي بس احاول قد ما أقدر اني احتويه وابين له اني افكر مثله ..

ذاك اليوم نسولف انا وياه .. قام قال لي اقول لك شي ماتزعلين ؟؟ قلت له: قوول

قال: تصدقين ان اهالينا ظلمونا !! سألته ليش؟؟

قال: حنا مانصلح لبعض افكاري دايم عكس افكارك ولافيه توافق بيننا حنا مانصلح لبعض عشان كذا احس اننا ماراح نطول مع بعض !!

انا انربط لساني .. احس كلامه مثل الخنجر طعني بصدري .. صحيح اننا مختلفين لكن مفروض مايقول اننا ماراح نطول مع بعض كذا بوجههي وبكل بساطه .. ومفروض مايكون بهالقساوة.. انا مالي ذنب ..

صحيح مو متوافقين لكن انا صابره وراضيه عشان ما اخرب بيتي ..اما هو بكل بساطه يقولها ..

مو مرة ومرتين .. دائما يقول ان زواجنا غلطه و انه يتمنى لو انه اخذ وحده من القريه تفهمه ويفهمها... لكن الحين خذني وخلاص طاح الفاس بالراس .. يقولها قدام خواته وقدام امه .. لكن اهله مايتدخلون والحمدلله علاقتي معهم ممتازه

كلامه هذا يجرحني .. ولا اعرف شلون ارد علية.. تكفوون شلون اقدر اسكته..

شلون اخليه ماعاد يطري هاكلام؟؟

شلون اخلي فيه تقارب بيننا ؟؟ تقارب فكري وتقارب نفسي؟
شلون احسسه ان طبايعنا حتى لو كانت مختلفه ماراح تأثر بعلاقتنا ؟؟
صحيح انه طيب ومو مقصر معي بشي بس شلون اطبعه بطبعي بدون ما اطمس شخصيتي ولاشخصيته

هل صحيح ان علاقتنا ماراح تطول لأننا مختلفين عن بعض جذرياُ

الى اي حد ممكن اختلاف التفكير والميول يؤدي الى الإنفصال ؟؟

تكفون جاوبوا على تساؤلاتي ..

راح اقرأ كل الردود كلمة كلمة وحرف حرف و راح اطبق نصائحكم

بناات انا محتاجتكم محتاجه لتوجيهاتكم لاتتركوووني..

:icon33: