ودي أفضفض من تواسيني

12 نوفمبر 2009

للرفع
أنا الصراحة ما عندي شئ أقوله
لكن أبغى أقول مافيها شئ إذا تأجل الزواج
بالعكس أنا من رأي لو ان زوجي أجل العرس
وأعرف ان هذا التأجيل علشان ظروفه المادية
أحس أنه يحبني ويبغى يسعدني قد ما يقدر
ويمكن عنده ارتباطات تخليه يخاف انه يتزوج وينشغل عنك
بها الارتباطات وناوي يخلصها قبل ما يرتبط فيك .. :)

علشان كذا يا قلبي لا تفكرين في الناس
وللمعلومية ترى كلام الناس ما يخلص على بالك إذا تزوجتي
كمان بيخلونك ..
لا أحلمي أولاً يوم تأجل زواجك تكلموا فيك
بكره تتزوجين وتسافرين بيتكلمون فيك ( طولت _ ليش ما رجعت _ ماشافت خير )
حتى لو انك ملاك ولا سويتي شي وحتى لو انك سافرتي أسبوعين
بيقولون ما كأنها طولت ..
واذا رجعتي وشافوك بيقولون شفي كيف شكلها ( مبسوطه _ زعلانه شكلها مو مرتاحه )
ومن هذا الكلام وكل واحد يتكلم عن نفسه ..
وإذا تعمدتي إنك ما تحملين وأخرتي الحمل قالو وش فيها ليش ما حملت غريبة
واذ رحتي عند اهلك ونمتي عندهم يومين قالو وش فيها لو انها زعلانه ...
وإذا حملتي قالوا ليش حملت وما علمتنا اعوذ بالله يحسبونا مشفح ما شفنا خير
مادرو ان كل الناس جابوا عيال ..
واذا انتصفتي الحمل قالو هاه وشفيه في بطنك بنت ولا ولد واذا قلتي ما ادري قالو يمه منها وش اللي
ما تدري الحمد لله والشكر ..
وإذا ولدتي قالو يمه منها ما امداها تولد توها معلمتنا انها حامل ( لو انك تعديتي التاسع ودخلتي العاشر )
بيتكلمون فيك بيتكلمون فيك ..
وإذا انشغلتي بالطفل عنهم وتخليتي عن عزيمه وحده من عزايمهم بيقولون اعوذ بالله من الشيطان وش فيها البنت
جابت طفل وماعاد شفناها ( اللي يقول : وشفيها خايفه عليه منا ولا ايش ) واذ سمعو انك منشغله فيه
ومتعبك شوي وما تقدرين تجين العزيمه ( يقولون : يمه كأن محد جاب طفل غيرها الحمد لله احنا عندنا اربع وخمس عيال
وشوفينا جينا لكن والله من الدلع يا حريم الحين بس يتدلعون )
وإذ كبر ولدك وكنت متعمده ما تحملين الين يكبر ولدك قالوووووووووووووو ............ أكملي ؟

أنا ما قلت كذا علشان أغثك لا والله بس بغيت أعلمك إذا بيهمك كلام الناس ترى كلامهم ما يخلص أبد
علشان كذا حطي من أذن طين ومن أذن عجين ... ولا كأنك تسمعين أحد أهم شئ بيتك وزوجك
وأصحك تخلين لكلام الناس شأن عندك لانه بيهدم حياتك ..
تحلي بالمنطق ولا تخطين خطوة الا بعد ما تفكرين وترى اذا دخلتي كلام الناس في الموضوع والله
تخرب السالفة كلها ..

والله يألف بين قلوبكم يارب ..
ويخليكم لبعض ..
وتراني عزوبية ما بعد تزوجت خ خ خ خ أحس كلامي كلام عجايز اللي يشوفه يقول
متزوجه وعندها عيال ... لأني أحس باللي حولي كثير وأعيش معهم اللحظات
أختي وخالتي ومرت خالي كلهم صغار واللي عنده واحد واللي عنده اثنين
والشاطر اللي يدير بيته بدون تأثير الناس عليه ..

وآخراً تراني أحيانا أفكر بكلام الناس وأحاول جاهداً أني أشيلهم من بالي
ولله الحمد تعديت كم خطوة بسلام وأولها دخلت التخصص اللي كنت أرغب فيه
رغم كلام الناس واعتراضهم للتخصص رغم أن أهلي موافقيني عليه لكن
الناس الناس فاضيييييييين وما عندهم شئ يشتغلون فيه علشان كذا
نشتغل احنا بدالهم وما نفكر فيهم ..

وأخيراً غاليتي ...
لا تخلين الناس يتحكمون بمشاعرك بل أنتي تحكمي بمشاعرك ..

محبتك ..
So0oSoo

في أمان الله ..
:)

التعليقات

ودي افضفض 😞

ودي أنسى وودي أعرف هي نست!

ودي اقطع صلتي فيها واخاف اني ظلمتها

ودي اسمع بلوى حلت بها جزاء ظلمها واحيانا اقول آخذ حسناتها يوم القيامة

ودي احط محادثة في الواتس عشان تشوفون خباثتها