المهم.. انا سورية من حمص.. بالنسبة للهجة حدث ولا حرج.. يعني لهجتنا بتختلف كتير عن اهل الجزيرة بشكل عام..
المهم الحماصنة لهجتهن مشهورة بالضمة.. يعني امي بيقولوها أومي.. و كمان كلشي ياء.. يعني خمسة منقولها خمسي :42:
طبعا في اهل المدينة و اهل الضيعة (القرية) انا بنت ضيعة و ما بعرف عن عادات المدينة شي.. بأى رح احكيلكن عنا
اول شي الضيافة..
اول شي قهوة اهلا و سهلا (و في ناس مابتحط قهوة) و بيجي معها حلو كيك او شي
بعدين تبولة و فطاير مشكلة و بطاطا مقلية (خاصة اذا جمعة صبايا) و عصير
و بعدين فواكه
بعدين حلو و قهوة تانية و بس
هي طبعا زيارة شغلة ساعة ساعتين مو عزيمة
كمان في شي اسمو المتة.. اغلب الناس بتعرفو.. هوي عشبة خضرا مع مي سخنة و سكر (في ناس بتحط حليب) و معها بيحطو بزر (اللي هوي الفصفص) و مسكرات
العزايم كمان اول شي قهوة او شاي او عصير حسب.. بعدين العشا او الغدا اللي بيكون كبب و محاشي و ورق عنب و فريكة (مو ضروري الكل بس يعني اغلب الناس بتحط اكتر من نوع) و سلطات و تبولة و فطاير و مشاوي و غيرها
و بعد العشا بيحطو شاي و فواكه و حلو
اللبس..
اغلب اللبس هلأ صار عادي.. يعني جينزات و بلايز و هيك اشياء..
مرت عم ابي الله يرحمها كانت تلبس متل هيك
بس لبسها كان كلو اسود و بدون زينة بحكم انو زوجها متوفي.. النسوان عنا بعد ما يتوفى الزوج و خاصة اذا كانت كبيرة بتلبس اسود بقية عمرها
الزواج :42:
هلأ رح احكي على عاداتنا.. و في ناس كتير ما بيعملو هيك شي
طبعا الزواج بيضل اربع او خمس ايام و يمكن اكتر
في عنا شي اسمو نقل جهاز.. يعني العروس بتاخد جهازها لبيت زوجها بحفلة و طنة و رنة و الناس بتضل ترقص و تغني برا البيت بالشارع بين ما هيي تضب اغراضها بالبيت
بعدين الحنة.. عنا بيحنو العروس و العريس.. احيانا مع بعض بليلة وحدة و احيانا كل واحد بليلة حسب ما بيحبو..
الحنة مو متل حنة اهل الخليج.. بيعجنوها بصحن و بيزينوها بشموع و ورد.. و بيضلو يرقصو بالصحن حوالي نص ساعة او تلت رباع الساعة قدام العرسان.. طبعا الصحن بينتقل من شخص لشخص و هي كلها تعتبر قيام بالواجب و لازم الكل يرقص بصحن الحنة
المهم بيجي ابو او عم العروس و بيمسك ايدها و بيحطو اصبعا الصغير بالحنة.. و بعدين بيلفوه بمنديل.. و بتجي الناس بتبارك و بيلفو ايدها بمصاري او سلاسل دهب او اي شي.. و في ناس بدل ما يمسحو الحنة بمحارم بيمسحوها بمصاري دلالة على قدر العروس و انو كل الفلوس فداها او هيك شي
و طبعا بوقت الحنة لازم لازم لازم تبكي العروس :30: و احينا بيقولو البنات ما بدي ابكي.. بيضلو يغنولها اغاني تبكي لحتى تبكي.. و بالعادة فيه مرا بيكون صوتها حزين بتغني بالحنة
من احلى اغاني الحنة بيقولو:
ليمونة و يا محلى ورقها.. ليمونة و سبحان اللي خلقها
و يا فلانة جيبيلها المحارم.. للعروس لتمسح عرقها
و يا بيا زتلها المحارم.. للعروس لتمسح عرقها
و يا امها و ياخالتا.. لتخلص العيلة
و طبعا كل ما ينذكر اسم زلمي بتقوم نسوان عيلتو بيزلغطولو
اغلب الناس بيوم الحنة بينصبو خيمة كبيرة بالشارع و كل الناس بتجي بتشارك حتى بدون عزيمة
الزواج.. يوم يجو اهل العريس ياخدو العروس من بيت اهلها.. بتبلش المحاربات بين العيلتين بمدح العروس او العريس طبعا و كلها بالاهازيج الشعبية
و يوم بتجي العروس طالعة من باب البيت.. بيوقفوها و بتبلش النقوط.. اللي هوي المصاري بيعطوها اهلية العروس
بتوقف وحدة جنب العروس و الناس بتعطيها المصاري.. و بتقول مشكور يا فلان و عقبال ولادك او عايزينك او عقبالك.. حسب الحالة.. في ناس بتقول المبلغ و ناس ما بتقولو
بعدين من بيت العروس للصالة كلو اصوات سيارات و زمير.. و اهل الضيعة اللي ما قدرو يروحو عالعرس بيوقفو على بواب بيوتهن بس يمرق الموكب من قدامهن و النسوان بيزتو رز و شوكولا على سيارة العروس
بعد شهر العسل بيساوو كبة صباحية.. اللي هي عزيمة عشا على كبة مشوية (فقط)
و بعدها بتبلش المباركة لمدة تلت ايام بتجي الناس تبارك و هدايا و كذا
و بعدين العروس بتروح عند اهلها كم يوم بيسموها ردة الرجل (مو الرجال الزلمي.. الرجل القدم) و اهلها بيعملو عزيمة.. و بس :22:
اهازيج الزواج عنا حلوة كتير.. ماني حافظة كتير بس هي شوي منهن
* يا سباع البر حومي.. اشربي ولا تعومي
اشربي من بير زمزم.. زمزم عليها السلام
و يا سلام اضرب سلام
* فصلتلك توب.. لا فضّل ولا عوّز
و مبارك العرس.. يا رايح تتجوز
بس باللهجة الحمصية بيصير هيك
فصلتيلااااااك توووووووووووووب.. لااا فااضّاااااال ويلااااهاا عوّاااااز و مباراااكييي العورس.. يا رايييح تيتجواز
*ان هلهلتي هلهلنالك.. دزينا البارود قبالك
و ان هلهلتي يا فلانية (على اسم العيلة).. الواحد منا يقابل مية
و غيرها كتير..
منجي للعزا :(
هلأ بيوم العزا كل الناس اللي بتجي بتجيب معها شي.. قهوة او سمن او سكر مشان تساعد اهل الميت
الرجال بيصبو خيمة عزا بالشارع.. و النسوان بالبيت..
و من ابشع العادات اللي كتير بتزعجني هيي الغني على الميت.. بتقعد وحدة بتقول قصيد بالميت بطريقة غنائية.. بيكون على لسان الميت او مدح فيه او شي
و اذا كان الميت صغير بالعمر.. بس يطلع التابوت من البيت بيصيرو يرقصو فيه بالشارع و يقوصو بالمسدسات و النسوان بتزلغط (ماحدا يسألني ليش.. قال عريس مدري شو)
هلكت :42:
مابعرف اذا نسيت شي.. بس هاد اللي خطر ببالي
