ملف استشارة مطبخية مصرية عربية 3

ام مرام ربنا معاكي

متحرمش يا بنات على الردود إن شاء الله ابقى اخد بالي المرة الجاية من سمك البسبوسة و إنها مش تنشف في الفرن





شوفي يا بسمة دي طريقتي في الشاورما جربيها و كمان البنات ما شاء الله كتبوا طرق حلوة

الشاورما

- بتجيبى اللحمة بتاعة الشاورما اللى مقطعة شرايح بالطول ( بتلاقيها فى كارفور او اى سوبر ماركت) تتبليها من قبلها بيوم علشان تشرب التتبيلة ومش تاخد تسوية كتيير

- التتبيلة ( بصل مبشور -ملح-فلفل اسود- سنة قرفة- نص م سماق-نص م كارى- توابل شاورما-2 م ك خل-وزبادى يعنى معلقتين او 3 كبار ) تقلبى اللحمة كويس فى التتبيلة وتغطيها وتسبيها فى الثلاجة لحد ما تيجى تعمليها

- تحطى م ك سمنة وشوية نعناع فى الحلة على اللحمة وغطيها وسبيها على النار وقلبيها من وقت للتانى هتلاقيها بتنزل ميتها وهتستوى فيها لما تلاقيها استوت تكونى مقطعة طماطماية صغيرة مكعبات صغيرة وبقدونس مفروم ويادوب تسبيهم شوية على الشاورما وتطفى النار وتغطيها لحد ما تيجى تحشيها

-طبعا بتجيبى العيش اللبنانى الابيض بيبقى رقيق خالص ممكن تدهنيه مايونيز او سلطة طحينة خفيف وممكن رشة سماق خفيفة وتحطى الشاورما وعليها صوابع بطاطس مقلية وطرنشات فلفل اخضر وبصل وطماطم وتلفي الساندويتشات ومعاها سلطات بقى




فتة الشاورمة

انت بتجيبي لحمة و تقطعيها تقطيع شاورمة و ممكن تخلي الراجل هو يقطعهالك و انت بتشتريها
بتجيبي باه مثلا نصف كيلو لحمة و تحطي معاها
بصلة مقطعة شرايح رفيعة
2 فلفل رومي مقطع بالطول
2 طماطم مقطعة بالطول
تعصري عليها ليمونة و تحطي شوية خل
تحطي شوية زيت زيتون حوالي معلقتين كبار
و بهارات ملح و فلفل و بهار شاورمة و توم بودرة
وتخلطيها كلها كويس و تحطيها على النار من غير ماء و تسيبيها لحد ماتستوي و تتخلص من الماء خالص

تكوني انت محضرة رز عادي
و عيش لبناني محمص
تجيبي صينية تحطي فيها العيش من تحت و فوقه الرز و هو سخن و بعد كدة توزعي الشاورمة وقوقيها
فوق الشاورمة بنحط الصوص ده
سلطة طحينة و عليها ضعف الكمية زبادي و تخلطيها كويس و توزعيها فوق الشاورمة

وياسلام يا منى لو الصوص يبقى كتير وخفيف شوية وحطيله كمان اول ما تطفى عليه شوية موتزاريلا وقلبيها ورشة ريحان زى ما قلتى واريجانو ده غير الموتزاريلا اللى على الوش جوعتينى يا شيخة

انا اسمى نورا يا جميل واستنى لما اروح الضهر اكتبلك مقدار الثومبية بالزبط مادمتى عايزة تجربيها لانى برضه جربت اللى بالبطاطس قبل كده كانت حلوة انك تدهنى بيها السندوتشات او تغميس مع اللحمة او الفراخ المشوية بس مش هى الثومبية اللى نعرفها لكن دى اللى من غير بطاطس اقرب كتير لبتاعة المحلات



فكرتينى بالشاورما بتاعة دار القمر كانت جميلة وانا على سيرة الشاورما رحت امبارح جبت لحمة شاورما متقطعة جاهزة وتبلتها وعلى الفريزر عشان ابقى اعملها ان شاء الله

ام كريم كنت حاطة من كام مشاركة لينك لفطيرة بالقشطة والعسل وبصراحة شكلها مغري حابة اجربها بس هى مش كاتبة تتحط فى فرن درجة حرارة كام ولا مدة قد ايه فانتى بخبرتك كده لو عملتيها هتسويها ازاى
وكنت حاطة كمان لينك للدونتس شوفتوه يا بنات؟