السلام عليكم ورحمة الله وبركاته
أخواتي أبغي نصيحتكم لي شو أسوي مع زوجي...
زوجي مب واثق من قدراتي...يحسسني إني ما أنفع أسوي شي غير إني أجيب عيال وبس..يعني يعاملي مثل البهيمة اللي ما تعرف تصرف عمرها..إن حطو لها الأكل كلت وإن ما حطو لها ماتت يوع...تخيلوا إنه ما يسافر ويطلع ويستانس لأنه خايف يستوي شي لي ولعيالي وهو برا البيت...لاغي شخصيتي تماماً...حتى في تربيتي لعيالي مب واثق يعاملني على إني وحده من عياله مب زوجته وأم لعياله...
أنا مب صغيرة قربت أكمل الـ 27 سنة، متعلمه وعندي شهادة أعلا من شهادته هو مخلص إبتدائي بس... وفاهمة الدنيا مثله...مب عاطني فرصة إني أثبت وجودي وأثبت له إني أقدر أصرف عمري وعيالي إذا هو برا البيت...
ماكنت هالشكل قبل الزواج والكل يشهد بإن عندي شخصية وأقدر أثبت وجودي...بس من تزوجت وهو مسيطر على شخصيتي وعادمنها...مقيدني بأفكاره هذه...
ودايماً يقولي عن زوجات ربعه إن الوحده منهم شايله البيت والعيال على راسها وما تغث زوجها بالعيال ومرضهم وطلباتهم...وإن ربعه يروحون وايوون ومب شايلين هم البيت والعيال...حتى لو مرض واحد من عيالهم ما تخبره زوجته وما يدري إلا يوم يشوفها تعطيه الدواء...
أخواتي ربعه واثقين من قدرات زوجاتهم وعاطينهن فرصة...ولو زوجي عاطني فرصة كان سويت مثلهن وأكثر...أنا ما أمنع إنه يروح ويطلع ويغير جو بالعكس أشجعه على شان تتغير نفسيته شوي ويتخلص من هالتشاؤم اللي عايش فيه...
انصحوني شو أسوي معاه...أبغي أحس بكياني وبشخصيتي بوجودي...ما أبغي أكون مثل البهيمة اللي ما تعرف من وين تروح ومن وين تيي...
شاركي في النقاش
سجلي الدخول لإضافة تعليق.
التعليقات
15- يمكن إنتي إلي حسستيه بهالشي من البدايه يعني ترجعين له في كل شي تبين تسوينه مهما كان هالشي فحس إنك ما تقدرين تسوين أي شي بدونه فحاولي تبدأين تغيرين هالفكره عنده بأنك تفاجئينه يعني لما تسولفون مع بعض قولي رأيك في أي موضوع تناقشونه وخليه يحس إن لك أسلوب ومنطق في التفكير وسوي أشياء أو تغييرات في بيتك وفي حياتك وحتى في عيالك بدون الرجوع إليه ومهما كان هالتغيير بسيط راح يحس وخلي لك رأي في أي شي يخصكم يعني مو كل شي يقوله تقولين طيب إلي تشوفه أي شي ودعواتي لك بحياة سعيده
- ماهي قدرات ولا ثقه اذا ابني مريض وزوجي حتى مايعرف
هذا واجبه انه يتحمل مسؤلية البيت ولو هو مافي قدره لتحمل ليش تزوج
واختي ابغى اعرف كم عندك عيال
وليش ما تشتغلين بدل منتي حاسه نفسك مكموته - هذا واجبه وعليه إنه يحتويج إنتي وعياله
هذي أنا من نفس الصنف يعني نفس صنف زوجات ربعه
شاله كل شي على راسي !!
وش النتيجه حس إن مسؤولية البيت شي هين والحين يفكر يفتح له بيت ثاني !
خلي يحس إنكم ماتقدرون تعيشون وتتصرفون من دونه أحسن له ولكم
خليه أربعه وعشرين ساعه مشغول فيكم أحسن لكم والله صدقيني
وبعدين تقدرين تثبتين شخصيتج في أشياء ثانيه ،،
طريقة تربية العيال طريقة الطعام والشراب وتنظيم البيت والوقت يعني أشياء أنثويه !!
مب تظهرين شخصيتج في أشياء المفروض هو اللي يسويها !!
يابنت الناس إنتي عايشه في نعمه مانتي حاسه فيها محد حاس فيها إلا إللي فاقدها مثلي - حبيبتي اتوقع انو عشان انتي شهادتك اعلا ويمكن ناضجه اكثر منو يبغى يثبت العكس
ويمكن هو شخصيتو كدا يحب يتحمل المسؤليه وهدا شي مرة حلو يعني انسن يعتمد عليه
حاولي تتصرفي لما يكون غايب على البيت شي عطلان مثلا وفاجئيه ......
انا كنت نفس حالتك ومع تقدم سنين الزواج اثبتله العكس لكن اشياء كتيييير خليتها على راسو لاني احب اتصرف واثبت حسن تصرفي في اشياء بسيطه مو في كل شي ومو دايما
مرة لما كنت في لارياض ( في الصيف القاتل) كان زوجي في الدوام والساعه 12 الظهر وكان الجو زي النار وفجاة خرب المكيف في الصاله وما عرفت ايش اساوي وخصوصا انو ماراح يرجع قبل المغرب والله ونزلت للحارس وقلتلو يجيبلي كهربائي دحين وجا الكهربائي ووقفت على راسو لين مانتهى شغله وحاسبتو واتوكل
لما رجع زوجي حكيتو على السالفة زعل واتضايق ليش جبت الكهربائي ودخلتو البيت من غير مااقلو وليش اتصرفت من غير مااستاذن وووووو الخ
بس بعدها حس اني اقدر اساوي اشياء من غيرو
واكرر مو كل شي لازم يكون مسؤول اكتر مني .......... - السلام عليكم ورحمة الله وبركاته
والله احسن لج....خليه يتعبل في كل شي...وانتي أرتاحي..بعدين هذي شغلته ...يتعبل بعياله وبج...وحده اعرفها...مشاء الله عليها...زوجها ما يعرف اي شي تقريبا عن حياتها ولا عن بناتها...يشتغل في مكان وزوجته وبناته في مكان...هي تودي الخياط والمستشفى والمدرسة وكل شي يخص بناته...آخرها...سوى لعمره قصة حب وغرام...لانه فاضي ولا شايل هم ولا مسؤولية وفي الاخير تزوج عليها...
رايي انه احسن يكون مشغول بعياله بدل ما يكون فاضي ويسوي له شغله ثانيه ولا حتى يشغل عمره بغيرهم...
والله الموفق
مواضيع مشابهة
تابعي تجارب أخرى من هذا القسم.