ابني وباص المدرسه ساااعدوني !!

السلام عليكم ورحمه الله وبركاته

اشحالكم يا أمهات

عزيزاتي بدون مقدمات بدخل في الموضوع ..
ولدي عمره 3 سنوات و 11 شهر هو في روضة أولى ..
مطلع لي عيووووووني من غيروا مشرفة الباص كل يوم شكاوي في الباص ..
مره تقول لي المشرفة ولدج يراكض في الباص ومره تقول يشاغب ومره يضارب ومره يعض ..
فقلت يمكن لانه يمل في الباص ساعه الا ربع يقعد لين يوصل البيت فقلت بعطيه قلم ودفتر صغير يكتب ويشخبط فيه في الباص لين يوصل البيت .. رجع الحبيب مشخبط على ويه طفل عندهم في الباص و مب مخلي بقعه في ويهه مب مشخبط فيها :06:
والله نفسيتي تعبت من هالموال كل يوم شكاوي كل يووووم !!!
ما أدري شو الحل طفرت والله طفرت ...

طبعا في البدايه يلست أكلمه بهدوء وأقوله ليش سويت جي وليش تشاغب وانت وعدتني تكون شاطر ومؤدب في الباص يلس يتدلع علي فقلت له قوم روح من جدامي لاني زعلانه منك وما بكلمك قام يصيح ويتلصق فيني وانا انازعه وهو يصيح ويستهبل قمت عصبت علي وثاااارت أعصابي وحسيت اني بطيح فيه وبضربه بس استغفرت وطلعت عنه بس هددته وقلت له خلاااااص ما في روضه وبتم اهني في البيت لانك صغير بعدك وما تعرف شو الصح وشو الغلط قام طبعا يصرخ ويقول انا كبييييييييييير وبسمع الكلام ... بس القهر انه كل يوم نفس الموال واكلمه وانصحه واقوله لو رجعت وقالت لي المشرفه انك شاطر وما سويت شي في الباص بعطيك هدية و يوعدني ومناك طااااااااااف !!:16:

قولولي شو اسوي ..؟؟؟

كنت أبغي أسير المدرسه وأكلم المسؤوله هناك علشان تغيير هالمشرفه لأني أحسها حماره وما تعرف تتصرف مع الأطفال !!! بس للأسف ما عندي حد يوديني ريلي كله مب فاضي الله يهديه !! وأهلي بعيد عني ☻


قولولي كيف أتصرف معاه !!!

أنا ناويه أسويله تعذيب اليوم وحرمان من كل ألعابه علشان يتأدب وبشوف !!

والقهر انه ايده حد عاضنه بعد في المدرسه لكن !! اذا حد ضربه ما يرد عن نفسه واذا شاف حد هادي طاح فيه ضرب :hahaha:
صج يبا يفجر لي أعصابي !!!:16:

13 تعليق 1,944 مشاهدة

شاركي في النقاش

سجلي الدخول لإضافة تعليق.

التعليقات

13
  1. @shfth_bfrh

    واضح إن مشرفة الباص الأولية كانت تدلعه..فيمكن كان ولدك ...يتشاغب وهي عادي هالشئ عندها ...أو إنه كان دايما يجلس عندها
    إنتي كلمي ولدك..سئليه عن المشرفة الأولية...وين كان يجلس لما هي كانت موجودة...وشو تسوي معاه
    وتفاهمي بعدين مع المشرفة عن طريقالهاتف أو أي طريق تقدرين عليه
  2. @shgr_aldr_4

    صدقيني فيه شي يستثيره في الباص ويخليه كذا
    كان ولدي كذا وطول الوقت يتعامل بعنف مع الجميع حتى في المدرسة واتضح لي في آخر العام انه يواجه ضغوط وسخرية من زملاؤه في الباص وهذا الشي انعكس على نفسيته وخلاه عنيف مع الجميع حتى اللي بفصله والمعلمة الله يجزاها خير ما قصرت وتعاونت معي لدرجة انها تخفت وطلعت مع الأطفال الباص علشان تشوف وضعه والمشرفة حقت الباص للأسف ما كانت تحرك ساكن وما كانت تقول للمعلمة على اللي يصيرمع ولدي صح تحاول تشغله وتهديه وتجلسه جنبها لكن ما حاولت تنقل الصورة للمسؤولات في المدرسة.
    طبعا اتفقت مع المعلمة اننا نلغي روحته في الباص ونشوف وفعلا والله يا أختي تغير ولدي بنسبة 90% لدرجة مديرة المدرسة تحسبه ما يجي من كثر الولد ما صار هادي ما شاء الله .
    وترى حتى هم ما يؤيدون روحة الأطفال في الباص لأنهم يملون ويتعبون وينعكس سلبي عليهم.
  3. @bthyn_2

    صاحبة الموضوع
    شفته بفرح
    واضح إن مشرفة الباص الأولية كانت تدلعه..فيمكن كان ولدك ...يتشاغب وهي عادي هالشئ عندها ...أو إنه كان دايما يجلس عندها إنتي كلمي ولدك..سئليه عن المشرفة الأولية...وين كان يجلس لما هي كانت موجودة...وشو تسوي معاه وتفاهمي بعدين مع المشرفة عن طري…
    تدلعه !!!! هاي أستبعدها نهائي بصراحه :22:
    المشرفة اللي قبل كانت لهجتنا نفسنا وكانت حبوبه بصراحه من اللي شفته انها تسولف مع الاطفال وتحكيلهم قصص في الباص ويمكن ولدي كان يحبها علشان جي يسمع كلامها !!
    بس المشرفة الثانيه مع احترامي للجنسيات بس كانت عربية الجنسيه وولدي دايما يقول هذي ما تعرف تتكلم !! وهو ما يحبها باختصار !!! يمكن هالشي يخليه يعاند فيها وما يسمع كلامها !!
    بس اللي يقهرني ليش يضرب ربعه في الباص ويسوي كل هذا !!!!

    انفجرت مرارتي والله :09:
    و تسلمين عزيزتي على ردج الطيب

تابعي تجارب أخرى من هذا القسم.