اهل زوجي اهل زوجي اهل زوجي وسلفاتي

مساء الخير \ صباح الخير
انا متزوجه من سنة وشوي وانا جديده على سلفاتي لان لهم فتره مع بعض ووالفين على بعض وفجأه دخلت عليهم اما هما الفترة بينهم قصيرة عكسي يعني
الحمدلله اهل زوجي مافي بيني وبينهم مشاكل
لكن بصراحة الغيرة سبب رئيسي في الخلافات البسيطة
لان انا ماني من قبيلتهم ويحكم اختلاف العادات طبعا لان هما شوي متزمتين وغير منفتحين واحنا في عاداتنا منفتحين جدا من ناحية اللبس والعادات لانها العادات تختلف تماااااااااااااااااااااااااااااااااااااااما وانا لمن اتزوجت بالعكس اتقبلتهم واتقبلت عاداتهم وفرحانه فيهم يعلم الله ولااشوف ان عاداتهم شي سيئ بالعكس انبسط معاهم واروح ديرتهم والعالم الجديد الي شفته عندهم حبيته ولا عيبت في شي
وهما عكسي لمن يسألوني عن شي عن اهلي ومجبرة ارد على اجابتهم زي مثلا المدرسة اللي درست فيها او المكان اللي سافرت فيه طبعا اجاوب عادي ولااتفشخر ولاشي لاني مااتكلمت الا لمن سألوني مااتكلمت من الباب للطاقه
فهما يقولو مغتره او شايفه حالها .. طيب انتو سألتوني
بدأت اتضايق وازعل ليش يشوفوني كذا مع ان ربي ادرى بنيتي بس ليش كذا ويتكلمو قدام الناس انها مو زينا وماتشتري زينا ولاتلبس زينا انا مختلفه صح بس مو معناته اعارضكم ... طبعا الناس اللي يقربولهم اخذو فكرة سيئه عني ويحسبو اني اذا ماسويت زيهم يعني مغرورة ومااتقبلتهم
فعلا هذا الحاصل يمكن تقولوا هذا كلام اطفال لكن للاسف هذا الحاصل وانا بيني وبين نفسي اقول من جد كأنهم اطفال
حاليا الغيرة موجوده من اخواته وسلفاتي يوم اشتري شي يقولو خسرت اخونا صح انا ماني موظفه لكن يجيني دخل كل شهر مو من زوجي من اهلي واهل زوجي طبعا مايدروا لانه شي مايخصهم طبعا غير مصروفي من زوجي
هما على بالهم راتب زوجي في يدي
يوم نخرج يقولو رايحين السوق واحنا مانروح السوق كل مره ... احيانا زوجي يكون طفشان ويقول تعالي نخرج نتمشى ولاتقولي شي لاهلي عشان العين .. انا اذا ما قلت .. مااقول بامر زوجي لكن هما يقولو انا السبب على طول وانا مااتكلم
طبعا غير الدق بالكلام واشياء والله ماتتوقعوها انا اسكت واطنش واحسب حساب لباقي العمر اذا ربي كتب عمر واحسب حساب للعيش والملح
لكن مافي فايده ... دايما اقول هذولا ان شاءاالله راح يكونوا اهل اولادي ومن لحمهم ودمهم لكن ماني شايفه اي تغير بعد التطنيش
ام زوجي تدقني بالكلام عشان نخرج انا وزوجي وقلت لزوجي قلهم فين رايحين عشان لايزعلوا ذحين يحسبو اني محرشتك .. يقول لا لاتقولي انا اعرف كيف اتصرف
بمجرد مانخرج على طول تتصل على الجوال فين خارجين حتى لو هي نايمه لانها لمن تكون صاحيه نمر نسلم
واخوات زوجي نفس الحال يدقوني بالكلام ويقولو اني مأثرة على زوجي وانه يختلف عن اخوانه مو زي اخوانه المتزوجين
وزوجي دايما يقولو انا ما أخذ اخواني قدوة لي حياتهم غلط وفاشله وماابغى اكون زيهم ودايما يقول هذا رأيي من قبل مااتزوج وهما راحوا يقالوا ولدنا اخذ عاداتها هيه خربتو علينا .. انا ايش ذنبي اذا ولدهم مو مقتنع بطريقة تفكيرهم وحياتهم
حاليا انا سطحيه معاهم لي شهر تقريبا ماانزل الا نادرا ويهمني امه في الموضوع بس .. اتحملها لانها زي امي لكن الباقيين ماااااقدر
طبعا طنشت وصرت سطحيه ... تخيلوا يابنات ايش قالوا ؟؟؟
قالوا هيه معقده ودايما حابسة نفسها ..................... طيب ايش اسوي؟؟؟
اذا نزلت اتكلموا عليا .. واذا مانزلت كمان اتكلمو عليا
كيف افهمهم انه عدم نزولي هو لسانكم؟؟؟؟ مو بدون سبب
وانا نفسي اخته تسألني في وجهي عشان اسردلها كل شي واصارحها لكن المشكله مايفضح كلامهم الا صغارهم واطفالهم عشان احيانا يلعبوا عندي في البيت ويتكلمو بدون قصد
تعبت يابنات محتاجه نصايحكم