شوفوا مصيبتى وساعدونى ارجووكم

السلام عليكم
يابنات والله انى اكتب وابكى من المصيبه اللى انا فيها شوفوا مشكلتى

انا متزوجه ولى 3 اعيال صارلى 7 اسنين متزوجه واخذت زوجى على حب طوال هالسنين انا عايشه بسعاده لانى ما اعرض زوجى بشى لما يامرنى انفذ حتى لو قالى لا تروحين بيت اهلك المهم زوجى عمره ما شك فينى لانى والحمد لله اصونه وما عمرى فكرت بالخيانه .
المهم قبل شهرين دخل علي بالبيت والشرار يطلع من عيونه وجاى علي انا قلت هذا اشفيه جان يصرخ بوجهى انتى ليش تخونينى انا انصدمت من كلامه قلت اى خيانه شنو تقول تدرون يا بنات شنو ايقول شايف وحده بالبلوتوث مع واحد وبوضع فاصخ ويقول هذى انا تخيلوا انا انهرت قلت له والله هذى مو انا ما صدقنى وحلفت له ولكن مافى فايد الرجال مصمم انها انا وواثق وانا حاولت اقنعه ان انا وين قاعده اروح كل مكان اهو يودينى وصارلى شهرين على هالحال انقذونى شسوى اهو كل يوم يشك فينى ويقولى كلام جارح بس اللى انا مستغربه منه انى قاعده عنده لى الحين يعنى ما طلقنى بس مقعدنى عنده ويهينى انا حاسه انه مو مقتنع بانها وساعات يجينى مقتنع انها انا . شالحل هل اطلب الطلاق او استحمل اهاناته علما ان اهلى ما يدرون بالسالفه ارجوا منكم مساعدتى ارجووووووووكم

22 تعليق 2,251 مشاهدة

شاركي في النقاش

سجلي الدخول لإضافة تعليق.

التعليقات

20
  1. اختي اشور عليج تدخلين حد من عايلتج او من عايلة ريلج بس يكون قريب من ريلج..على اساس انه يتفاهم وياه...وانتي برري موقفج و خليه يفهمج من قاله انج انتي الي في الفيديو..و ذكريه انج دايم وياه فكيف تكونين انتي هذي..و قوليله الله فوق و شاهد عليج..و استعيني بالصبر و ادعي ربج عسى يفرجها عليج :)
  2. @mlak_17

    و عليكم السلام ورحمة الله وبركاته

    اختي لازم هالشغلات زوجج او غير زوجج يغض بصره عنها ( استغفر الله )

    و بعدين لازم تاخذين موقف و تكليمنه و تقوليله هذي مو آنا و لو آنا جان شفتني خايفه وموعارفه شسوي ..
    و حرام عليك تتهمني بشغلة انا اشرف من حتى اشوفها ..
    و البنات الي يسوون جذيه يبين عليهم اعوذ بالله

    و قوليله تدري ان هذا سامه قذف و اهذا الله مايرضى فيه


    و لا تغتمين وايد يا اختي لان السيدة عائشه ام الامنين اتهمت في شرفها بس اهس ( رضي الله عنها ) خذت موقف و اصرت عليه

    مرضت و استئذنت انها تروح بيت اهلها ليمن الله برئها .. رضي الله عنها

    انصحج تسمعين قصتها
  3. @aaashk_alkoyt78

    صاحبة الموضوع
    اشكركم يا خواتى على الرد بس فى شغله يمكن ما ذكرتها زوجى من النوع اللى ما يحب اى احد من اهله او اهلى يتدخل بمشاكلنا حتى لو فيها شرف تدرون لو انا شايفه ان فى حل انى لو دخلت احد بالعايله ايحلها جان من زمان دخلت احد بس تدرون انا ما ابى اتطلق واذا دخلت احد معناته هذى نهايه حياتى الزوجيه وخلاص يعنى انا ما أبيه وعشان جذى انا ابي حل من دون ما يتدخل احد ارجوكم ارجوكم لاقولى حل انا بموت من الاهانات والتجريح وعلى فكره اللى يخلى زوجى يشك فينى على طول لانه كل علاقاته مع البنات السابقه انتهت بالخيانه انهم اهم اللى خانوه عشان جذى حاط حرته فينى ياربى ساعدنى وانتوا لا تبخلون على بالنصيحه ارجوكم
  4. @almhbh_llofaaa

    عزيزتى اللى ماتعرفينه انك متحرمه عليه يعنى مطلقه حتى لو ماقالها يكفي شكه
    مقدر اقولك روحى بيت اهلك ولو انى هذا اللى بسويه انا لو مكانك لكن بقولك استخيري
    وبعدين تقولين مايحب احد يدخل بمشاكلكم حتى لو فيه شرف هذا شرفك وشرف اهلك وسمعتكم
    انتى شايفه رجل مع امرأه بالبلتوث يعنى مو اثنين يلعبون ورق الا ادخل اخوانى وعزوتى كلها
    واذا رجل يفتح فمه ويقول الكلام القاذف اللى يقوله بحقك وانتى شريفه وحافظته هو ماقال شئ هين هو اتهمك في عفافك وين الغيره على ذاتك وين الانفجار اللى يحدث لاي انثى شريفه بعد قذفها من القلب انشاء الله يندمه ندم كبير لكن انتى تحتاجين خطوه جاده وحازمه وزوجك يحتاج درس قاسي علشان مو كل مايشوف شئ بالبلتوث قال انتى ... الله يحفظك ويسعدك
    ولى بالمثل وجميع الاخوات

تابعي تجارب أخرى من هذا القسم.