(f) السلام عليكم (f)

كيف نجهز ومتى نبدا .. و شو الطريقة .. تفضلوا معايه في هالموضوع
الشامل..

بعض الحوامل يكونون متلهفين على التجهيزات .. فيحبون يبدون يشترون أول ما يعرفون إنهم حوامل.. والبعض الآخر ما يتنشط الا يوم يعرف جنس المولود .. وعاد في منهم باردين الفواد اللي ما يتذكرون المشاري لين الشهور الاخيره ههههههه هاذيل حالتهم صعبه يبالهم موضوع بروحهم..

أول خطوة اختي الحامل.. انج تعرفين شهر ولادتج المتوقع .. فأنا بمشي معاكم في هالمخطط على أساس موعدي أنا علشان اشرح..

مثل ما انتوا شايفين في هالصورة .. قسمنا السنه حسب الفصول.. :wink:
يعني مثلا .. يوم بتكون بنتي من عمر 0 إلى 3 شهور .. بيكون صيف لأنه شهر 6 و 7 و 8 .. فبالتالي اللبس اللي بشتريه من 0-3 لازم يكون يراعي هالشي .. وما يكون شتوي .. الأفضل اني البسه فانيله داخليه و فوقها فانيله ثانية علشان أتحكم بمدى احساسه بالبرودة والحرارة بس مب اني اشتريله شتوي .. (})

فياليت كل وحده تسوي نفس المخطط هذا بورقة وقلم على اساس تعرف مشترياتها لكل عمر كيف بتكون .. شتوية .. خفيفه .. أو وسط ... وبيساعدكم وايد فالمشتريات ..

الخطوة الثانية اختي الحامل.. هو انج تعرفين نوعية مشترياتج .. بغض النظر عن جنس البيبي .. يعني البنت والولد بيحتاجون نفس الاشياء الاساسية .. بس فاللبس تفرق لو كان اللون وردي وأزرق .. أما بقية الاشياء الاساسية فعادي تناسب الجنسين..

وطبعا في وايد قوائم لمشتريات الحامل .. مافي مانع تطلعين عليهم كلهم علشان تستفيدين .. (y)

أنا بحط لستة مشتريات مسوتنها الاخت أم خلفان و شفتها في كذا موضوع ..

(f) متى نبدأ التجهيزات.. (f)

من رايي و تجربتي الشخصية .. انه التجهيزات المفروض تبدا من الشهر السابع .. سواء عرفتي جنس الجنين ولا لا.. لأنه لازم تكونين مخلصه كل شي قبل الشهر التاسع ..

مثل ما انتوا شايفين في اللسته اللي فوق.. انه التوزيعات تنقسم الى هالفئات:

- تجهيزات البيبي ( لبس و اغراض مثل عدة الاستحمام والسرير وغيرها)

- تجهيزات الأم ( لبس و سوالف استقبال من ترتيبات اكل وتوزيعات)

ولكن الاسعار تقص الظهر مثل ما انتوا عارفين .. فاللي يحاتي ميزانية البيت المفروض يقسم الاشياء الغالية و يوزعها على شهور ..

والاشياء الغالية من تجربتي هي: طقم سرير البيبي - الترولي أو عربانة البيبي - لبس الاستقبال

أما الاشياء الثانية فنقدر ناخذ شوية منها كل شهر .. لحد ما نخلص الكمية اللي محتاجينها..

(f) بعض النصائح العامة (f)

- خلج على اطلاع دائم بمواسم التنزيلات .. مثل تنزيلات رمضان .. مهرجان التسوق .. مهرجان الصيف وغيره .. لأنه في هالاوقات تلاقين الاشيا نص السعر أو اقل أحيانا.. ما تتخيلين شكثر بتوفرين على نفسج بهالطريقة .. انا افتكيت من الشهر الرابع والخامس خذت ثلاثة ارباع اللبس من التنزيلات وكله بنص السعر او اقل.. الحمدلله (y)

- ضروري جدا تسئلين خواتج أو معارفج من ذوي الخبرة عن أفضل ماركات الاشياء الخاصه بالبيبي.. يعني مثلا اسئلي شو احسن ماركة حق ترولي.. وهم من خبرتهم بيرشحون لج شي .. بدال لا تجربين في نفسج ..

- الاطفال (z)(x) (z)(x) في الشهور الاولى يتضايقون من الفوانيل الداخليه اللي تنلبس من فوق .. وخاصة اللي يكون فتحة الراس فيها صغيره .. فالافضل انج تاخذين اللي ينلبس ويتسكر عالبيبي مثل الروب .. أو انج تاخذين النوعية اللي فتحة الراس فيها واسعة ..

- لبس الاطفال ينغسل واااااااايد ماشالله .. فلازم تاخذين ماركة تكون تتحمل الغسيل وما تنكمش او تتمزع من الغسيل .. مثل ماركة ن**ت و مذركير و كارتر.. (y)

- لبس الاطفال بعمر نيو بورن .. ما ينلبس الا اسبوعين أو اقل على حسب البيبي .. وعقبها الطبيعي انه البيبي بيحتاج يلبس 0-3 شهور .. و اكثر عمر بيستهلكه البيبي هو عمر 3-6 .. (i)

و الافضل انج ما تعورين راسج بلبس 6-9 شهور من قبل لا تربين .. أولا لأنه على الاغلب الناس بييبونلج هدايا كثيرة بهالسن .. وثانيا انج لاحقه على هالعمر عقب بتقدرين تاخذين اشيا يديده .. وفري ميزانيتج على اللي محتاجتنه أول ..

- الاطفال من عمر 0-3 شهور .. وحتى لين عمر 5 شهور يكونون ما ييلسون فما ينفع تكثرين لهم من الفساتين وهالسوالف المب مريحة للبيبي الصغير اللي يقضي وقته كله طايح.. لأنه البيبي يتضايق.. اللبس المفضل بيكون الاوفرول او السبوحه .. سواء كان للبيت أو للطلعات .. الموديلات والالوان تختلف وبتلاقين منها اشيا حلوة ..

- الطفل (z) فالشهور الاولى دايما بيكون محتاج يغطي راسه سواء شتاء او صيف .. علشان التكييف وايد يكون خطر عليه .. بس طبعا غطا الراس او القحفيه لازم فالصيف تكون خفيفه فراعي هالشي حسب موعد ولادتج في أي فصل من السنه.. لقيت في Gap قحافي خفااف و قطن حلوات .. صح شوي غاليات بس سعرهم فيهم (y)

- لازم تسوين جدول بالاحتياجات .. و تقسمينه حسب السن بالشهور .. وكل ما تشترين شي عدلي على الملف و ضيفي الكمية اليديدة .. علشان ما تكررين الاشياء بدون حاجة أو تنسين تشترين شي معين وتتأزمين بعدين ..

- كميات الاشياء ترجع لج .. بس تقدرين تقولين في حد أدنى لكل غرض .. مثلا القماطات وايد تخيس ووايد تستخدم اول كمن شهر .. وهي تقريبا رخيصه .. فلازم يكون عندج عالاقل 8 قماطات .. وعلى الغالب عقب ما تربين وتبدين تطلعين للسوق بتشترين زيادة بس اتركي هالموضوع للوقت و خذي الحد الادنى .. ويمكن يوصلج بعد فالهدايا .. الفوانيل الداخليه من سن نيوبورن عالاقل يكون عندج 6 .. و 0-3 عالاقل 10 .. 3-6 عالاقل 15 (f)

- البنات ممكن يلبسون كل الالوان .. حتى الازرق الغامق لو كان الديزاين حلو وبنوتي .. فمب شرط تخلين كل شي وردي علشاان هي بنت .. بالع** الالوان الفرايحيه تطلع احلى عاليهال .. فممكن تاخذين:

للبنت: اصفر - بيج - اخضر - بطيخي - احمر ..
للولد: اصفر - بيج - اخضر - برتقالي - احمر ..

بس اللي يفرق هو الديزاين .. ولا الالوان حلوة عالكل

- بالنسبة لأغراض الحمام ضروري جدا يكون عندج مقياس الحرارة مال الماي علشان البيبي (i) .. وهالشي بيوفر عليج وقت وبيحفظ البيبي بعد .. و بالنسبة لحوض الاستحمام الافضل انج تشترين النوعية اللي يكون فيها صمام :wink: علشان مجرد ما تفتحينه يتسرب منه الماي وتقدرين تردين تصبين فيه بدون ما تنقلين البيبي...

وبعد لا تنسين تاخذين النوعية اللي يكون فيها ستاند ملبس باسفنجة ناعمه علشان يطيح عليها البيبي بدال لا اتمين مساندتنه براسه .. انا لقيت هالنوع في مذركير .. واايد عملي

يتبع

كيف

كيف ؟!

كيف

كيف ...............

كيف تبتدائين تجهيزاتك