عندنا و عندهم ... حسنات و سلبيات ... آرأكم يا مغتربات
بسم الله الرحمن الرحيم
السلام عليكم و رحمة الله و بركاته
موضوعي عن الاختلافات اللي لمستيها بين بلدك و بلد الاغتراب
سواءً كانت إيجابية أو سلبية
اتمنى اسمع كل الآراء و بحيادية لاني لاحظت كثيرات بهرتهم دول الاغتراب و نسوا جماليات بلدانا العربية :44:
و خلونا نتذكر احنا جينا هنا علشان ناخذ الحسنات اللي نلاقيها و نفيد فيها بلدانا
انا من جدة و حالياً انا بملبورن بأستراليا
اتغيرت نظرتي لاشياء كثيرة زي التعليم هنا مثلاً للطالب حقوق و ما يتم ترهيبه لا من معلم و لا من مدير يعامل كانساااااان تبذل جهود لتحبيبه في العلم وتزرع فيه الثقة بالنفس و الفخر بذاته هنا علشان يكلموا طفل ينزلوا لمستواه اقصد بالمعنى الحرفي للكلمة غير كذا يحق للطالب مناقشة معلمه باسلوب راقي بعيد عن التجريح و الاهانة هنا الطالب ما يحتاج ينكسر قدام معلمه علشان كم درجة
اعتقد اننا يفترض ناخذ هذي الخبرات و نفيد فيها مدارسنا و جامعاتنا بدل ما نراقب و ننقد بشكل سلبي
و الدبلوماسية
هنا يستمعون لرأيك و بأهتمام لكن لا تحلمي انهم يقتنعوا فيه تلاقيهم يتقبلوا كل الاشكال بس مايستنسخوها اما احنا لااااااااااااااازم اقنعك بوجهة نظري و لااااااااااااااااااازم تتبعها و اذا كانت عندك وجهة نظر مختلفة ازعل عليكي و اروح من وراكي اقول لكلللللل الناس عنك و آكل بلحمك أكل يا اقنعك يا تقنعيني و نضيع ساعات و ايام بنقاش عقيم
هنا يسمعوا اكثر من مايتكلموا اما عندنا الناس يردوا من قبل لا يسمعوا
الوقت :time:
في جدة اتعودنا اننا نصحى بعد العصر وبعدين نجلس ثلاث ساعات نجهزلنا وجبة و ناكل و بعدها نفكر نسوي اشغالنا و مشاويرنا و نقول الوقت صار مافيه بركة
ياحسرتي على الوقت اللي عدا عالفاضي
هنا يقدر الوقت بشكل عجيب لدرجة انك تخلصي اشغال كثيرة في كم ساعة و اليوم لسه بأوله
هنا يحترم العامل و الزبون
في جدة لا يحترم العامل و اذا احترمته قام قل أدبه
اشتقت لجدة لان فيها حسنات و ايجابيات مستحيل تجاريها ملبورن فيها
في جدة لعيون الناس حق فمحد يسوي شئ يجيبلك القرف قدامك :09:
في بلدي الناس ما يرموا الساندويتش و يلعبوبه كورة............ استغفر الله
عندنا اذا احد غلط الناس ينبهوه و ينصحوه و ما يتركوه يتمرغ بالوحل
عندنا نادراً تلاقي شايب ملابسه وسخة ويدور في الشارع بلا هدي
عندنا ماتشوفي عجوزة تنزل السوبر ماركت علشان تاخذ حليب لها و لبستها
عندنا نحترم الكبار بالسن سواء كانوا رجال او نساء و نقبل اياديهم بحب كل صباح
تنبيه انا ما اقصد بنسبة 100% طبعاً في حالات شاذة هنا و هناك انا اقصد بصفة عامة
فنعم عندنا كبار بالسن مهملين لكن مايقارب الـ 90% معززين مكرمين يخدموهم ابناءهم و احفادهم
اتحفوني بآراءكم رجاءً :26: