ملف استشارة يوميه ...4

أم زوما
المقادير (قرص طرية بالعجوة)

750 جم دقيق (كيلو إلا ربع)
3 بيضات مع رشة فانيليا
كوب إلاربع لبن دافي
25جم خميرة بلدي أو 15 بودرة
نص كوب سكر
نص معلقة صغيرة ملح
150جم سمن
50 جم زيت
ممكن تستخدمي المنكهات اللي تحبيها يانسون محلب ريحة كعك إنتى وراحتك
قلبي الخميرة مع اللبن وسيبيها 10 دقايق
إخلطي اللبن والسكر والبيض والفانليا والمنكهات والسمن والزيت وقلبيهم كويس حتى يختلطوا تمااااام
ضيفي الدقيق وعاه الملح يدوب العجينة تلم معاكي وقفي عجن
نتيجة العجينة دي بتبقى أحلى لو باتت في التلاجة عشان متعملش عرق وتبقى زي العيش
يعني إعجني بالليل ودخليها التلاجة وشكليها الصبح وسيبيها تخمر وإخبزيها على فكرة بتخمر بسرعة

تسلم ايدك يا فراشة يا قمر
15 جم خميرة يعنى اى واحدة فى الملاعق العيارية

السلام عليكم
النهارده هقولكم على طريقه البسطرمه فى البيت
نجيب ا كيلو لحم من الفخذه او السمانه او عرق بس المهم تكوم حمرا جدا ومفهاش ولا حته دهن نغسلها ونجففها ونسيبها فى مصفى تجف تماما
نعمل فيها فتحه وندخل خيط عشان تتعلق
نجيب سكينه ونغزغز بيها الحمه وبعدين نجيب طبق فيه ملح ونغطى قطعه اللحم بالملح ونعلقها فى المطبخ يوم كامل ونحط تحتها طبق عشان الدم اللى ينزل انا بعلقها فى الاستاند بتاع الملاعق
وبعدين نجيب قماشة نظيفه ونمسح ما تبقى عليها من الملح
ونكون ساعتها مجهزين حوالى راسين توم وملح وفلفل اسود وقرون شطه وحلبه مرة مطحونه وورق لورو وكمون وبابريكا ونفرمه كله فى الكبه
كله بنسب متساويه ونتذوق الملح عادى وبعدين نغلف اللحمه كلها بالخلطة دى ومنسبش ولا حته صغيره مش متغطيه وبعدين اغطيها بقطعه قماش قطنيه خفيفه واعلقها جنب شبالك المطبخ لمده اسبوع
وبس كده يا ستى انتى وهى يكون عندك احلى بسطرمة بيتى نضيفه ومعلومه المصدر
انا بقطعها شريحات رفيعه وبشلها فى الفريزر
يارب تكون طريقتى عجبتكم وتعملوها

أم زومه صباح الفل ياقمر

فراشه
تسلم إيديكي يارب على الكحك بعجوه ده بحبه جدا ربنا يجازيكي خير يارب

ليله من عمري
طريقتك في البسطرمه روعه وعلى رأيك معلومه المصدر بس تقطيعها رفيه زي مالراجل بيقطعها دي المشكله اعتقد لانهم بيقطعوها بماكينه خاصه
انتى ازاى بتقطعيها
وعلى فكره انا كمان بجيب كميات كبيره بسطرمه وانا مسافره وبخزنها في الفريزر مش بيجرالها اى حاجه

لو حد فيكم يا بنات كلم ابله دينا ياريت يطمن وخير ان شاء الله