تجمع الموقنات برحمة الله ( خبرات متبادلة حول مراكز تأخر الحمل في مصر ) 14

يا ام انس ياحبيبتى عمرك لو دخلتى تقولى اخبارك ماحد هيقول عليكى انانية بالعكس ياقلبى
احنا لازم ندخل نفضفض ونقول لبعض اخبارنا هو عشان كده احنا عملنا التجمع ده اصلا
والاحساس ده حصل لنا كلنا على فكرة بسبب ان التجمع ده اتفتح قبل التانى وبقى ناس تكتب هنا وناس تكتب هناك
يعنى بقى فى تشتيت شوية وده اللى كان ملخبط الناس مابين هنا وهناك والموضوع خلاص انتهى الحمد لله

بس اللى مزعل نيفو انها لما جت تعدل على السى فى بتاعتها مالاقيتهاش
واحنا اصلا فكرة السى فيهات لما اتعملت كانت عشان تجمعنا كلنا وكل الجداد اللى داخلين يلاقوا صورة واضحة عن كل البنات اللى موجودين جوه الملف
فبلاش عشان نستعجل ونفتح ملف جديد نقوم ننسى حد او نهمل فى سى فيهات حد حتى ولو مش بطريقة مقصودة

عشان كده انا بقترح يكون فى تنسيق مين اللى يفتح الملف كل مرة من قبلها بفترة عشان يككون مستعد ويجهز كل المعلومات عنده على جهازه ولو حتى على الوورد
واول ما الملف ده يتقفل ينقل اللى فى الوورد على طول فى الملف الجديد وبكده يكون متاكد انه مانسيش حد

الحاجة التانية بقى
ماشاء الله الملف بتاعنا الحمد لله بقى بيجذب ناس كتير ماشاء الله وفعلا باعتراف ناس كتير انهم استفادوا منوا قوى ماشاء الله
فيبقى لازم احنا كمان نكون قد المسئولية دى ونكون حذرين جدا فى مشاركاتنا وواخدين بالنا من كل كلمة بنقولها لاننا هنتحاسب عليها قدام ربنا وان فى بنات ممكن تدخل وتكره حياتها كلها بسبب معلومة غلط او شئ مالوش لازمة اتقال

ياجماعة انا اللى فاهماه ان الملف ده عملته مميزات فى البداية خالص عشان نتبادل خبرات من بعض
وعشان الناس كلها تستفاد منه وماشاء الله كل البنات اللى فيه بدون استثناء على قدر عالى من التفاهم والود والارتباط مع بعض
وربنا اللى يعلم ده وحده انا عن نفسى ببقى هتجنن لما بيبقى فى حد منتظر نتيجة حمل او فى فترة تنشيط او بيشكى من مشكلة عنده او متضايق وعارفة ومتاكده ان ده احساس ناس كتير تجاهى برضه واحنا هنا لما بندى نصيحة لبعض بنديها خالصة لوجه الله تعالى فمينفعش بقى كل شوية دى مقموصة من دى ودى مسالتش على دى(مع اننا كلنا متاكدين ان كل ده عشم فى بعضنا لاننا قريبين قوى لبعض) بس لازم ناخد بالنا ان فى ناس بتزعل بجد وبتحس ان اللى قدامها مش مقدرها .... وفى ناس تانية داخلة بس تجمع معلومات وتستفاد من التجمع وخلاص كل همها انها تاخد ماتديش ودى اكتر حاجة بتضايق فعلا
وفى اللى داخلة تتكلم فى موضوع بعيد كل البعد عن موضوعنا الاساسى وهو حبنا وخوفنا على بعض ومشاركتنا كل لحظات الفرح والتاخر والولادة والتربية وكل حاجة بتحصل لان دى خطوات وكلنا بنمشيها سوا

واحنا بقى لازم نحافظ على النمط ده واللى انا بقوله بس ده للتذكرة لنفسى قبل مايكون ليكم
وانا مقصدتش انى اجرح فى حد معين بكلامى والله العظيم وربنا اللى يعلم بس عشان لما الاحساس بتاع التشتت ده يكون اكتر من واحدة حاسة بيه فده معناه ان فيه خلل معين لازم نحط ايدنا عليه ونشاور ونقول ده لازم يتصلح

من غير ماحد يزعل ولا حد ياخد الكلام على نفسه

وان شاء الله الجزء الجديد يبقى غير خالص ويبقى كله مليان اخبار حلوة وزى الفل وكلنا نفرح فيه ان شاء الله

يلا بقى حد يتطوع ويفتح الجزء الجديد ويجهزله من دلوقتى