شاركي في النقاش

سجلي الدخول لإضافة تعليق.

التعليقات

1,514
  1. @am_hory_2


    صبرك يا قلبي إن شاء الله ولدتين والله سهلها عليش وقرت عيونش بشوفة ضناش متشوقة أعرف شنو أخبارش الحين واحاتيش

    أم علااااوي الله يسهل عليش ويمكن وجع الراس اللي يجيش لأنه الضغط عندش متلخبط الله يقومش بالسلامة ولا يطولها عليك بالنسبة للسفر يا رجائي هي اللي بتسافر مو أني

    يا رجائي الله يوفقش في المقابلة وحبيت أقول لش الأسئلة اللي سألوني إياها ويمكن تفيدش سألوني من هي أول وزيرة في البحرين؟ قلت ليهم ندى حفاظ وسألوني شنو منصبها الحين قلت ليهم عضوة في مجلس الشورى وعضوة في المجلس الأعلى للمرأة وسألوني كم عضو في النواب وكم عضو في الشورى واثنينهم شنو نسميهم وهل يصير انهم يجتمعون اثنينهم في مجلس واحد وإلا لا طبعا هذي الاسئلة كلها سهلة والصعوبة كانت في أسئلة التربية صراحة مصطلحات ومسميات جديدة ما عطوني إياها في جامعة البحرين بهدلوني ونشفوا ريقي وبما أن تخصصي اسلاميات تخيلي سألوني كم عدد الدول الإسلامية في العالم قلت ليهم الصراحة ماأعرف المهم الحمدلله لله أنش بتخلصين المقابلة بعدين بتسافرين
    وبالنسبة لسؤالش إذا كانت الوحدة بكر تتأخر في احساسها بحركة الجنين إلى الاسبوع 21 أو 22 وهي عبارة عن حركة واضحة أما قبل الاسبوع 21 ما تحس بحركة الطفل البيسيطة أو ما يسمى بالرفيف وتفكر أنها مجرد غازات أما بالنسبة للمرأة ذات الحمل الثاني أو أكثر تحس برفيف الطفل في وقت مبكر في الأسبوع 16 إلى 18 ومن ثم تحس بحركة الجنين الواضحة واللي هي عبارة عن رفسات صراحة شعور لايوصف شعور جدا جميل وخصوصا أنه يكون غير مصحوب بألم وبصراحة أني كنت أرفع الثياب عن بطني واستمتع بشكل بطني شلون يرتفع في كان وينزل في مكان ويصير أشكال واقعد أفكر في جنيني يا ترى شلون شكله وكل ما تحرك تحسين أن صحته جيدة وتتطمنين عليه أن شاء الله تستمتعين بحركة جنينش عاجلا غير آجل وخبرينا عن شعورش
  2. @alm_anth

    هلا بنات
    شخباركم؟؟
    بنات اني في الاسبوع 22 من الحمل و بديت اجهز اشوي لانه عندي بلوتين تجهيز البيبي و بنتقل شقة جديدة و بغير الاثاث و حاسه روحي ثقيلة اشوي فقلت اشوي اجهز....

    سويت طقم من محل مال بيبيات خياطة يعني 12 قطعة حلوو
    و شريت من wool worths قطعتين
    و دلاغ 2 لانه ماعندهم اشياء واااجد
    احين ابغي اجهز من مذركير باقي الاغراض و بسوي طقم ثاني خياطة و عندي اليه افكاااار غير يعني ودي اضيف الاسم و هيك حركات بالخياطة وودي اشتري بعض الاشياء ( مثل الاشياء اللي نلصقها مسويه بالخياطة و اخلي الخياط يضبطها بطوط او دبدوب شي جذي بالاضافة الى الاسم )
    اللي ابغيه منكم تعطوني اشوي افكار عشان الحركة و ابغي اسالكم متى يبدا التخفيض في مذركير و اي واحد اروح افضل اي فرع يعني اللي في مارينا مول او اللي في السقيه بروحه؟؟؟؟
    لانه رحت اللي في مجمع البحرين ما لقيت شي حلوو!!
    و بعد بسال يسوى اشتري من مذركير احين لو انتظر شهر 6 يمكن يصير تخفيض؟؟؟
    و بعد ابغي تعطوني مكان يعني خياطة حلووو ؟؟؟
    طلباتي واااجد ادري بس اعرف انكم ما تقصرون يا ليت تردون عليي ؟؟

    الله يوفقكم و يسهل ولادتكم يا رب يا كريم


    من البحرين توصواا في اختكم .....
  3. @am_aalaaaaaaoy_1

    كروشات شخباركم

    هلا وغلا ام حوووووووور
    اني بعد ساعات اقول جذي
    يمكن الضغط مرتفع من جذي يألمني راسي
    بس اني ما يرتفع عندي وايد يعني مره بس ارتفع
    وايد بس يومين ونزل بعدين الحمدلله
    الله يوفقكم ان شاء الله وتتوضفون
    واني خلطت بينكم خخخخ انتي وياشدتي

    ألم اثنى حبوبه
    في محل اسمه بيبي بورن في جدحفص مقابل محلات الذهب
    طبعا نهاية سوق السمج اني سويت عنده اطقم وتجهيزات البيبي
    وكلش حلو شغله ومضبوط بصراحه وايد عجبني ونظيف
    ويقدر يفيدج بأفكار وهو اخبر بهالسوالف
    وعلى مذركير عندج الاصلي الي في السيف وفي مجمع البحرين
    واذا بتلاحظين ان اسعارهم كلش فوق اكثر من غيرهم اني شريت من
    الي بالسيف اغراض بس حلوه وباقي الفروع الي نشوفها مو الاصليه
    بس اغراضهم بعد حلوه وتستاهل اني ما كنت ادري بس قالت الي الموظفه
    الي في المارينا مول وتاكدت من الموظفين الي بالسيف بعد
    بس اكثر اغراضي شريتهم من الفرع الي بالمارينا مول والي بالسيف
    بس ما خذيت من اماكن ثانيه علشان اقدر افيدج وجهزي من الحين
    لان بعدين بتثقلين و بتتعبين وايد ولا بيصير لج خلق الى الحوامه
    الله ييسر لج ويثبت حملج وييسر ولادتج يااارب

    باقي الكروشات وينكم يا حبايبي وحشتونا
  4. @am_aalaaaaaaoy_1

    لاتنسون صبرك ياقلبي
    لان اكيد الحين المسكينه تعاني من الم الطلق او الولاده
    الله يسهل عليها يارب و يجعل ولادتها ولاده سهله ميسره يارب

تابعي تجارب أخرى من هذا القسم.