تجمع الموقنات برحمة الله ( خبرات متبادلة حول مراكز تأخر الحمل فى مصر ) الجزء 15

صباح الخير يا بنات

مسلمة
ازيك يا ام جنة
انا موجودة اهو ايه اخبارك
ربنا يعينك على السهر ويجعله في ميزان حسناتك


نيفوووووووووووووووووو
كدة تدخلي تسلمي وتمشي
مش ينفع البعد ده
يلا تعالي كلمينا شوية
عايزين نتطمن عليكي وعلى النظام اللي بتعمليه
الولاد خلصو امتحانات والا لسه


اشتقت
انا عملت المنظار
وهو فعلا سنتي واحد على الجنب الشمال وواحد في السرة وواحد تحتها
واول ما خرجت من العملية كنت تعبانه جدا الحمد لله رب العالمي
لكن اسبوع واحد والدنيا الحمد لله بقت تمام
صحيح بيفضل شوية وجع بس مش حاجة خطيرة
وملاحظة مهمة برضو
اني عملت كي للاندو
في الجنب اليمين عند المبيض وجدار البطن
فكنت حاسة اوقات بوجع في الحته دي
واخر ملاحظة
الدم اللي استمر اسبوعين
وده كان تاعبني ومدايقني جدا خصوصا عشان الصلاه
لاني كنت باتوضى لكل فرض
فمع الوجع بتاع العملية
الموضوع كان اوفر جدا
الحمد لله انها عدت على خير

ريمو
سلامة بنت اختك الف سلامة عليها
ربنا يشفيها ويعافيها يا رب
ويعين اختك على المسؤولية
ربنا يجعله في ميزان حسناتكو يا رب

بندقة
اهلا بيكي معانا
بالنسبة للمراكز
انا شايفة البنات قالو كل اللي ممكن يتقال ربنا يجزيهم خير
بس انا ملاحظة انك مش قلتيلنا بعض التحاليل
لو التحاليل بتاعتك موجودة يا حبيبتي حاولي تدوري عليها وتقريهالنا عشان برضو يزيد اطمئنانا عليكي
وعشان لو في اي حاجة مستخبية ناخد بالنا منها
وربنا يرزقك في القريب العاجل يا رب
واهلا بيكي معانا مرة تانية

نوفا
كلمتينا كلمتين وبعدين فص ملح وداب
رحتي فين يا توتة
تعالي طمنينا على الاخبار

قرنفلة
ايه الاخبار
يا رب تكوني بخير يا رب

بوبا
الحمد لله رب العالمين انها جات سليمة
بس تاكدي ان اللي حصل ده محتاج منك مراجعة
اكيد في حاجة مهمة لازم تعمليها عشان ربنا يبعد عنكو اي شر
وزي ما البنات قالت
صدقة او ورد قران او تحصين بالدعاء
ومتنسيش قل اعوذ برب الفلق لاني حاسة انك اتحسدتي
حصني نفسك باية الكرسي
وتاكدي ان الله لطيف بعباده عشان كدة لطف بيكو وبعد عنكو الشر
الحمد لله انها جات سليمة

اللهم اني استودعتك اليوم نفسي وأهلي ومالي وولدي ومن كان مني في سبيل الشاهد منهم والغائب
اللهم احفظنا بحفظ الايمان واحفظه علينا
اللهم اجعلنا في رحمتك ولا تسلبنا فضلك انا اليك راغبون

اوكسي يا قمر
وحشتيني اوي اوي
يا رب يا حبيبتي تكون بالف خير
وتكوني ماشية كل خطوة من خطواتك بالاستخارة
وانا سعيدة بحالة الاطمئنان اللي انتي عايشاها دي
متتصوريش فرحت ازاي باطمئنانك وبادعيلك ان ربنا يثبتك اكتر ويوفقك للطريق الصح يا رب

ام اياد
عايزة اتطمن عليكي
انتي فين
وايه اخبارك دلوقتي
هل كلمتي د عادل او عرفتي هتعملي ايه الفترة الجاية
انا على فكرة سالت صحبتي اللي قلتلك عليها انها اجهضت وبعدين ربنا رزقها ببنوتة امورة
سالتها على الفترة اللي ارتاحتها بعد الاجهاض
فقالتلي ان الدكتور قالها لازم ترتاح 6 شهور
بس هيا حملت بعد 4 شهور
انا عايزاكي تيجي تطمنينا عليكي وان شاء الله كله هيبقى تمام

سارة الامورة
ربنا يا رب يباركلك في النونوهات يا رب
وحصنيهم دايما بالله القادر
ان شاء الله يباركلك فيهم ويكونو احسن مما تتمني
ويجعلهم خير للاسلام والمسلمين

ماما مامتي
انتي عسولة خالص وانا طول الوقت بحسك صغنونة ودمك خفيف
بس بلاش تحطي في دماغك موضوع الحمل بشدة
عايزاكي تسيبيها على الله
ربنا يا بنتي قادر يرزقنا من حيث لا نحتسب
ناخد بالاسباب ونتوكل على رب الاسباب
وعايزة اقولك حاجة كمان
اولا انا مش باتكلم في موضوع تاخر الحمل مع اي حد خاااااااااااااااااالص
ولا حتى مامتي
عارفة ليه
لاني متاكدة ان الكلام ممكن يدايقني
بس عشان الامانه
بقول لماما عناوين الاخبار عشان اطمنها لكن مش كل شوية عشان ماملاش دماغها اكتر ما هي مليانه
ومثلا ساعة المنظار خليتها جات معايا هي وجوزي بس
ومش عرفت اي حد
لاني عارفة اد ايه هتدايق من الكلام والسؤال
فكل واحد فينا يقدر يعالج مشكلته اللي جواه
تاني حاجة عايزة اقولهالك
حماتي
اولا ضغطت على جوزي مش يقولها اي معلومات
ولما تكلمني بقول الحمد لله وان شاء الله ربنا يرزقنا وخير ان شاء الله
مع اني زمان كنت باحكيلها كل حاجة بالتفصيل الممل
بس لقيت ده غلط كبير
مع انها طيبة
لكن الموضوع كان فعلا مؤذي نفسيا
هيا دلوقتي لما تيجي السير بتكون عى شكل
اكون مثلا عملت بسبوسة ونزلتهالها فتروح داعيالي
ربنا يرزقكم بالذرية الصالحة
اقوم أأمن على دعائها
يمكن ربنا يستجيب منها
وكمان مع اي حد من المجتمع اللي حواليا
دايما اللي بيدعيلي اامن على دعاؤه
والي يفتح الموضوع
اقوله ادعيلي

شيمو
يا رب تكوني بخير يا حبيبتي وتطمنينا على اخبارك عايزاكي دايما تكوني بخير
وانا بكتب الكلمتين اللي فاتو افتكرت اهل جوزك
ربنا يكفيكي شرهم يا رب
وان حد فيهم دايقك افتكري ان ربنا بيغفرلك بالاذى ده ذنب او بيرفعك بيه درجة في الجنة
ومين عارف
يمكن يكون قدرك عند الله كبير وعايز يقربك منه اكتر
بس حاولي على اد ما تقدري
كل مواضيعك تبقى في الكتمان
لان لو مش دايقوكي لانهم وحشين ومؤذيين
ممكن يدايقوكي من غير قصد
يبقى ليه من الاول
بلاش تقوليلهم على اي حاجة
وربنا يا رب يطمني عليكي يا شيمو يا رب

زينب
انا زعلانه منك بجد
ساعت ما دخلنا مع بعض
لقيتك كاتبة كلمتين حلوين
وبعدها مش لقيتك خالص
انتي رحتي فين
يا رب تكوني بخير
لو شفتي رسالتي اللي هنا دي
اكتبيلي بس انا بخير
عشان احس انك معانا حتى لو مش قادرة تدخلي
وطمنينا عليكي يا حبيبتي
وقوليلنا ناوية على ايه

ام انس
وحشاني كتييييييييييييييييييييير
ولو انك مختفية كالعاده
قوليلي وصلتي لحد فين في التنشيط
واخبار الريجيم والرياضة ايه؟
ها
عود فرنساوي
والا لسه تكة صغنونة

ام مريم
انا بحب كلامك الانجليش ده
ايه اخبارك
انا سامعة انك قربتي تنزلي مصر
ال صحيح
طب ناوية تعملي ايه
كلمينا على الخطة المقترحة

توتا تويتي
انا بقالي كتيييييييييييييييييييييييييييييييير قوي مش شايفاكي
يا رب يا حبيبتي تكوني بخير يا رب
وحالة الرضى والايمان الجميلة بتاعتك تعم علينا كلنا يا رب
تعالي بقى نورينا واحكيلنا اخبارك
انتي نعم الاخت في الله


وداع
ازيك يا حبيبتي
عاملة ايه
يا رب تكوني تمام
ايه اخبارك
قوليلي البرنامج بتاعك
ساعات بحس انك دايما ليكي وجهات نظر وخط تفكير مستقل
حتى اسامي ادويتك مش ببقى عارفاها
ومتفتكريش ده غلط
لا خالص
بس ما شاء الله عليكي
انا احييكي
وعايزة اعرف السبب
هل مامتك وباباكي كانو بيعاملوكي على انك كبيرة ويدوكي الاختيار تشتري حاجتك وتختاري مدرستك والا ايه؟
اكيد عندك السر


متمنية الجنة
ازيك يا حبيبتي عاملة ايه
انا مش عارفة انتي وصلتي لحد فين
قوليلي خطتك عشان اتابع معاكي

على فكرة
عشان بس مش تنسو
انا خطتي اليومين دول هي :
مرحلة التهبيط بعد المنظار عشان الاندو
وباخد دوا منع حمل
وهخلص ان شاء الله كمان اسبوعين
وبحاول انتظم على الرياضة لانها مقوي للجسم عامة
وبحاول اعمل لنفسي ورد من القران والدعاء يومي
وكمان اكون دايما معاكم واتطمن عليكم واطمنكو عليا

يا رب ربنا يجبر بخاطرنا جميعا يا رب ويرزقنا الذرية الصالحة عاجلا غير اجل يا رب

هيا ننشر الخير
دايما بحب اكتب اسمك كله
ازيك عاملة ايه
انا برضو عايزة اعرف خطتك يا جميل
وربنا يجزيكي خير على نشر الخير يا رب

حلمي الامومة
انا بيتهيألي كدة انك بتعملي تنشيط بعد التهبيط برضو
ها ايه الاخبار طمنيني
وعليكي بالاستغفار المستمر في كل وقت
انا من كتر القصص الواقعية اللي بتكتبوها هنا واللي بتجيلي على الميل واللي باسمعها من الناس ايقنت ان ربنا عايزنا نقرب منه وبيحبنا عشان كدة بيساعدنا على ذكرة
يا رب يا حبيبتي تكوني بخير
وانا مركزة معاكي
يلا تعالي احكيلنا الاخبار


سمية
انا ملخومة في الكلام معاكي اليومين اللي فاتو بس برضو مش عارفة انتي بتعملي ايه اليومين دول
قوليلنا بقى النظام عشان نشجعك وندعيلك
وربنا يرزقك ويرزقنا بكل خير يا رب


نادية ونادو
انا مش اتكلمت معاكو كتير بس متابعاكو من بعيد
ها عاملين ايه يا كتاكيت
يا رب تكونو بالف خير يا رب

ميزو يا قمر
انا بحبك اوي اوي اوي
يا رب تكوني بخير
واخبار ابنك ايه
دخل المدرسة والا لسة
يا رب تكونو جميعا بخير
بس هاسال سؤال بقى
مش ناوية تجيبي اخ والا اخت ليه
ها
شفتي بقى ده موضوع جديد اشجعك عليه
وخصوصا ان احنا هنا ضد توجهات موضوع تحليل النسل
وماشيين بمبدا "فإني مباه بكم الامم يوم القيامة"

عزيزة
ازيك عاملة ايه
ان شاء الله تكوني بخير
نويتي على ايه يا قمر
هتنشطي والا بداتي والا ايه

احلام بسيطة
ها عاملة ايه يا حبيبي
والخطة بتاعتك ايه اليومين دول
انا بيتهيألي مش شايفاكي كتير
والا اكيد دي تهيؤات
يلا تعالي احكيلي الاخبار وقوليلي وصلتي لحد فين