السلام عليكم ورحمة الله وبركاته
أقروا الكلام لأخر شي لوسمحتوا
خواتي أنا تصرفت تصرف وحبيت أخذ رايكم هل اللي سويته صح ولا لا بس قبل هذا بقول مقدمة عن الوضع اللي عايشينه
أنا متزوجه وعندي بيت وأزور أهلي بين الفترة والثانيه وعندي خوات أصغر مني لسا بنات وحدة بثالث ثانوي والثانية بأول ثانوي وأمي عمرها بالاربعين كتب لها ربي أنها تحمل وهي عندها آلام بالركب ومع الحمل الله يكون بعونها
أخواني الكبار وهم أثنين متزوجين بنات عمي وهم خوات (وهم خوات زوجي) أخوي الكبير ... زوجته هي الثانيه بس لظروفه ماقدر يفتح بيت ثاني فسكنها عند أهلي( وهو عايش بديرة بعيده عن اهلي) أخوي الثاني عايش معنا وله غرفتين وحمام وأنتم بالكرامه........ كلهم صار لهم أربع سنين من تزوجوا وأنا تزوجت قبلهم بسنه وكانوا خواتي لسا صغار بالمتوسط وماكانت أمي تشد عليهم بالشغل بس بالثنوي صارت تشد بس مهما كان عمر شغل البنت مثل شغل الحرمه وخاصة أن البنات يدرسون
بيت اهلي فله كبيرة مع ملحق كبير وحوش كبيييير .... ولا فيه شغاله أمي رافضتها من يوم كنت بنت وألحين بعد رافضتها
خواتي مع حريم أخواني صاروا أربع وأمي الخامسة وكلن يشتغل بالبيت وحريم أخواني أتفقوا أنه يقسمون الشغل وصار لكل وحده يوم معادا أمي خارج القسمة وهذا كلامهم( طبعا حريم أخواني يشتغلون بالاشياء المشتركة يعني غرف أخواني وخواتي والاشياء اللي تخصنا مالهم شغل فيها على طلب أمي)
البيت نظيف بس نظافه بالظاهر يعني كل مرة يتغبر نظفوا تنظيف ظاهر ويتكنس وينمسح وووو كل الشغل بس ظاهر
أمي تدرس محو الامية والله أنها تشتغل وتتعب كثير بس البيت كبير قلت لها تجيب شغاله قالت كل الاربع شغلهم على روس الاصابع فكيف لجبت شغاله أكسر ظهر الحرمة ليه
أطفال أخواني مثل باقي الاطفال يعفسون البيت وشخبطون على الجدران وووووو
بعد المقدمة نجي للموضوع
المهم .... اليوم طفح فيني الكيل كل مرة أجي للبيت ما أحس بنظافه من قلب .... كتبت على ورقه بخط عريض وعلقتها على شباك المطبخ من داخل يعني اللي تغسل تشوفها كتبت فيها بمعنى.....
ا(((لكلام لكم ياأربع ...ناظروا قدامكم وتلفتوا يمين شمال عاجبكم المنظر اللي تشوفونه ليه عجزانيين تنظفون المطبخ تنظيف شامل مرة بالاسبوع ولا تنفضون البيت مرة بالشهر عيب عليكم والله عيب أنتم واجهة البيت فشلة لجونا ناس بيقولون أبد هالبيت مافيه أوادم )))
أختي قرت الكلام وسكتت لأني دايم أهاوشها
وبعدها رحت الملحق جالسة أسولف أنا وأمي الاّ وزوجة أخوي الثاني داخله وهاتك كلام ووووووووو
بس بختصر الكلام عليكم وبقول اللي أوجعني قالت هذا مو بيتي ..الله يلعن أبليسك صار لك أربع سنين قاعده بالبيت وتقولين هذا مو بيتي الضيف مدة ضيافته ثلاث أيام وأنتي أربع سنين
الثاني جات لفوق وهاتك كلام وووووووو واللي باخذه من كلام قالت لي .... الله لا يهينك أجلسي مسحي ونظفي في بيت أهلك.......... والله مو عيب أنظف ببيت أهلي بس عيب لما أجي أنا وأختي الكبيره نفرك وننظف... مساعده أيه بس نفرك ليه مافي البيت عرب أختي الكبيرة لما تجي وربي الشاهد تنظف وتتشتغل حتى لما يكون الشغل على حريم أخواني تشتغل بيومهم موكفايه الفرك اللي تسويه ببيتها اللي وجهها صار أسود من الشغل( أهل زوجها اللي هم أهل حريم أخواني عايشين معها بالبيت)
أنا اللي بعرفه الكلام اللي قلته لهم فيه شي أمكن نبرتي بالكتابة كانت حاده شوي بس وربي الشاهد أني ما كتبت هالكلام الا أبي مصلحت الجميع مو لأني حماتهم وأبي أقعد عليهم لا وربي طيلة الاربع سنين وأنا ساكته ويوم تكلمت كتبت هالكلام بورقه لأني ما أبي أتصادم معاهم وهم من قبل مثل خواتي لكن ردهم كان قوي
فياليت تنصحوني وتوجهوني هل اللي قلته عيب علي وأني تدخلت بشي مايعنيني والله أن أمي كاتمة على اللي بخاطرها وساكته
أنا لي بيتي بس لما أجي زيارة لأهلي وكان فيه ظيوف والله أتفشل من حمام الحريم ولا الورد المغبر ولا الجدران المشخمطة ولا بعد ياكثر المناسبات اللي تجي في بيت أهلي
في الاخير أقول سواء كان خواتي ولا حريم أخواني كلهم يشتغلون ووأنا أشهد أنهم يطبخون ويكنسونويمسحون لكن شغلهم على روس الاصابع أما الشغل العميق مرة ولا مرتين بالسنه دواليب المطبخ عليها وسخ الثلاجة تنظيف على الماشي الحمامات رشه كلوركس والجدران والابواب باللعنة
جدران المطبخ ؟؟؟ الدرج ينمسح أيه بس جدار الدرج ؟؟؟؟ الملحق بالنادر وووو
( بتقولون وش اللي دريني وأنا ببيت بروحي أنا كل شهر جاية عند أهلي يعني ما أطول عنهم وأشوف كل شي بعيني)
أبي آرائكم الهادفة الله يسعدكم لأني والله ما أحب أظلم أحد ولا أحد يظلمني لعلى وعسى أقدر أصلح شي لأخطيت
كل اللي ردوا كلامكم على عيني وراسي
أحنا ماقلنا نظفوا غرفنا وحمماماتنا الله يكرمكم قلنا المطبخ اللي يحوسون فيه مجلس الحريم اللي يستقبلون ضيوفهم فيه مجالس الرجال اللي أخوانهم إذا جاو نامو فيه وبربي أن الفراش يجلس كذا يوم مايتسفط ولا ينظفون عدل ولا الحوش اللي ينشرون غسيلهم فيه ويقعدون فيه ولا المكان اللي يغسلون فيه هدومهم
وإذا مو ملزومين فيه كل وحده تقضب باب غرفتها وراها والله مو عجازانين عن لقمتنا ولا عن شغل البيت أنا أتكلم عن الاشياء المشتركه فقط
وش فيكم أنا ماقلت يشتغلون لنا ويخدمونا الله لايحدنا على شغلهم بس خذوها بالعقل أنتي عايشة ببيت حمولتك ومطخبهم ومطبخك واحد وكل شي بالمطبخ تتشتركون فيه المواعين الفرن والثلاجة والدواليب وكل شي ومجالس الحريم تستقبلون فيه ضيوفكم وأطفالكم يستخدمون حمامات العامه مثل حمام الحريم
والغساله تغسلون هدومكم فيها مجالس الرجال أخوانكم يجون فيها وغرفة المعيشه تقعدون معنا فيها وعيالكم اللي يشخبط على الجدران واللي يكب العصير على الارضيات والكنبات والدرج كلم تمشون عليه مثلنا( أكيد مايطيرون هههه) وعيالكم ماسكين القلم وشخخخخخخخخخخبط على جدرانه
في هذي الحاله تقولون لا مانبي نشتغل فيه كفايه شغل ظاهر ومو لازم أننا نفرك يوم من الايام المطبخ ومو لازم نفرك الجدران ومو لازم ننظف المجالس وننفضها لو مرة كل شهرين
وأما باقي البيت لا والله ما أحد يلزمكم فيه ولا تخدمون حمولتكم أنا إذا خدمتهم من باب المجامله بس....أما الاماكن المشتركة مو عيب علينا بعدما نستخدمها نقول أحنا مو خدم عند حمولتنا ؟؟؟؟ على كذا بقضب باب غرفتي علي ولا راح أستخدم المطبخ ولا أستقبل ضيوفي ولا أخواني وهدومي بغسلها بغرفتي ولا راح أشاركم ببيتهم عشان ما أشاركهم تنظيف!!!!!!!!!!!!!!!!!!!!!!!!!!!!!!!
اللي علقوا على أسلوبي كلامكم على العين والراس بس بقولكم شغله
مرة جو لبيتي كل وحدة على حده كان فيه شغلة يبون يسوونها وأنا قلت عنك بأسلوب مازح ومداعبة وأبتسامة صغيرة
وصلوها لأخوي ولأمي وهاتك هواش فيني شككوني بنفسي
قالي أخوهم لا تمزحين معاهم لأنهم بسرعه يزعلون قلنا بلاش مزح
مرة بعد فيه سالفة مو متذكرتها بس قالوا عني أني أعاملهم معاملة ضيوف ولاني معتبرتهم من أهل البيت وجلسوا يعاتبون بالهشي
طبعا وصل الموضوع لأمي وجلست هواش فيني
وألحين قلت بجرب الرساله وهالمرة ببيت أهلي ولأول مرة أتدخل بالبيت وهذا من باب النصح مو النقد
لأن أي وحده تنقدني عشان مصلحتي برحب فيها وأنا هذا قصدي
ماعجبهم وكان بالامكان يجون بأسلوب يتفاهمون فيه معي مثل ما أسوي بالعاده معهم بس دخلوا علي ينافخون
أثرت أعصابهم أنا أسفة بس من حر مافيني
أنا بشتغل ببيت أهلي ومو عجزانه بس أنا نصحت ما تآمرت ولا تحكمت ولا نقدت
وعلى العموم الله يصلح الحال
الموضوع كان لمجرد النصح طالع من حرة
غرت عليهم وما أبي أحد يتكلم عليهم أسلوبي بنظركم غلط على عيني بس جاتهم أمي بالطيب والكلام الزين والعتاب الخفيف وكلمة أمهم ولا فيه فايدة
أنا عشانهم وخواتي كتبت هالورقه وربي شاهد علي أني مالي نية خبيثة لا أوامر ولا نقد ولا تحكم
لما أتضايق منهم أجي لهم بهداوة وهم دخلوا ينافخون علي
كان اللي ماعجبها كلامي تقول بكل صراحة هذا مو بيتي وتروح مو تنافخ
كنت أبي أجي أوضح لهم موقفي اليوم بعد المغرب لكن أخوي توه جاي من الدوام ودخل علي ببدلة الشغل
جلس ينافخ فيني وهو ماسواها من يوم تزوجت ويسب ويشتم
وعلى أيش تظنون ؟؟؟؟؟....... على سالفة قديمة صار لها أكثر من شهر ونص
وهي أن زوجته كانت متضايقة وتفضفض لي وأنا أسولف لها وأهديها لكن هي خذت كلامي اللي مر عليه أكثر من شهر واليوم بالذات تقوله لأخوي
وش هالحركه تبي تحرض أخوي
بس بعد هالتصرف عرفت أنها بايعتها بايعتها وكنها ماصدقت تجي سالفة وتقوم الدنيا عليها
وأنا عادي لا قومت الدنيا ولا دخلت لا أبوي ولا أخواني ولا زوجي حتى وحده من خواتي اللي بالبيت ماتدري عن شي
لأني معتبرة الموضوع سوء تفاهم وبيعدي
بس خلاص شغالة أمي بتجي قريب والله لا يحد أمي لا على خواتي ولا على حريم أخواني
على العموم الموضوع بالنسبة لي منتهي وكل تحياتي لكل من نصحني ووجهي سواء قسى علي ولا لطف علي
انتم كلكم خوات ولا زعلت أبد من أي وحده وكلامكم باخذه بالحسبان وحده وحده
والله يعطيكم العافية
الموضوع مغلق