وااااااااااو أهل زوجي جايين عندي اسبوع او اكثر ..الله يعين وش تنصحوني ..

الله يعينك عامليهم مثل مالو كانت الوالدة والوالد عند مرت اخوك


وعمك مثل ماقالو البنات لابد من مراعاة اكله ومواعيده

شوفي بعض الشياب عندهم عادات معينة .. جدي الله يرحمه ويغفرله كنا نقربله زبدية فيها موية نظيفة مع صابونة ومنشفة بعد الاكل ويازين الدعوة الي كنا نحصها .. مافيها شي انت زي بنته وهو مريض

الراديو لاتنسيه قربيه منه او من مكان قعدتهم تعرفين كبار السن يتونسون به

لاتبالغين بشكل ملحوظ ومصطنع في الضيافة اول الايام حتى ماتملي ويلاحظو هم بعدين ويمكن يسحبو نفسهم من بيتك والعياذ بالله


يعني الاساسيات الي يحبوها كل كبار السن عامة .. من قومة بدري ومطالعة لحوايجهم .. غداهم قهوتهم ومدري الحلى ماظن انه يناسبهم الا اذا كان من تمر وسويق ... واشباهه.. بس بعض العمات يحبو يذوقو من يد حريم عيالهم .. يعني لابد من ملاحظة الفرق عن اول


افتكر فترة جدي جلس عندنا انا واخوي ايام الدراسة بالكلية .. وماكان السخان يشتغل فكنت مانام اليم مااكون مجهزة ترمس كبير فيه موية ساخنة في الحمام الله يعزك مع زبدية كبيرة عشان يستخمه لا صحي بالليل


اذكره الله يرحمه مدحني عند ابويا على هالحركة .. تعرفين الروماتيزم عندهم عاد مساكين


كل ماقمتي الصبح ودخلتي عليهم لاتنسي تسلمي على روسهم وتصبحي عليهم


الله الله في اللبس المحترم .. وحدة من خوياتي الله يهديها تلبس البناطيل والكت قدام عمها بحجة انه مايشوف مزبوط .. بصراحة .. اول ماتخرج من الغرفة تلقي عمتها وحمواتها ينتقدونها .. ولما سألوها ردت انها متعودة ببيت اهلها كذة ...مهما كان احس صعبة وعيب

ومع هذا كله اهم شي احس نظافة البيت وطيبه والريحة التي تشرح النفس


حلو المستكة مع االظهرية او بعد الطبخ والكشنة حقت الغدا ..احسه يبرد الجو مع التكييف واهدى من البخور الثاني .. بس لازم قبل كذة تكوني عارفة اذا عمانك ينكتمون ويتأذون من البخور ولى عادي ...


افتكر مرة انحطيت في موقف مو حلو ... دخلت مجلس كله ستات كبار بالمبخرة اسوي فيها مرة وسنعة وازيدلك من البخور واناوله لأول وحدة .. الا تطلع خالتي ورايا تقولي مالقيتي الا فلانة تعطيها المبخرة تري عندها كتمة .. بغت تموت الحرمة خخخخخ



خلي عندك بخاخ معبياه ديتول ولو بالفل ياسلام واحتفظيبه بحمامهم .. الي يدخلوه او في كل حمام واحد .. وكل مادخلتي حمام اشطفيه على السريع بموية واسحبيه بالمساحة الجلد .. ثواني ماتاخذ وقت ورشي في كل ركن وورى المغسل والبوديه من البخاخ

يسير كذة تكفي غسلة الصبح لحمامك ويضل معطر ومنعش طول اليوم


فلاتر المكيفات كلها قبل لايجو بيومين تكوني غسلتيها وعطرتيها بدهن خفيف منعش .. بدون مبالغة وماتكثري عشان يكون الجو روقان بريحة حلوة

اذا قهوة عمتك قشر اتعلميلها من الان تريها سهلة .. لاتخلي الحرمة توقف على البوتاجاز تسوي دلتها لانك مو عارفة .. صعبة ياقلبي


شوفي من الان تفقدي جدران بيتك .. يمكن في عنكبوتة بنتلك من وراك بيت وتخرب عليكي كل جهدك .. سويلك لفة استكشافية على كنبك والزوايا .. عقدتها عليك خخخخخ


شراشفهم وفرشهم الي بيستخدموها للنوم لاجو ارسليها المغسلة اذا لها فترة مرفوعة واول ماتجي من المغسلة فكيها وبخريها

جزاكم الله خير

احسن حل حبيبتي قبل يجون جيبي خدامه اجار يوم واحد او 10 ساعات اقل من ميتين ريال

وخليها تنفض البيت معك نفض من و الى ,

حددي من الحين جدول نصيحه لطبخ يعني ,

السبت الغدا : رز لحم سلطه فته , / العشاء مصقعه وشوربه ,

الاحد ’,,,, الخ , وشوفي كل طبخه وش تحتاج من اغراض واشتريهم قبل يجون

عشان ماتطلعين بصوره مو حلوه او ترتبكين انك تغيرين الصنف و و ,,

ملابسك كلها مجهزه ومكويه ومعلقه بالترتيب حق اول يوم وحطيه اول واحد , كل هالكلام سوويه قبل يجون بكم يوم ,

ومثل ماقالو البنات جهزي الفرش اللي ينامون فيها وارسليها المغسله وبخريها وبرضو السجادات حقات الصلاه بخريهم ,

ومن ناحيه متى تصحين على حسب هم يبحون فطور متأخر ولا على طول غداؤ ولا وش وضهم انتي اذا وحده من اخواته حبوبه اسأليها ,واذا معهم خدامه على الاقل ترتاحين من تغسيل المواعين ,,

حاولي تنبسطين ,

انا مثل حالتك بتجيني جدت زوجي اسبوع عندي وشقتي مره صغيره ومادري وش اسوي بس اشوي خدامتها معها على الاقل تعرف وش تحب تاكل وتغسل معي

الله يعين