تجمع المتوكلات علي العزيز الوهاب (خبرات متبادله حول مراكز تأخر الحمل بمصر)الجزء 17

وداع معلش انا مش معاكى فى النقطة دى الراجل غير الست فى مسألة الاطفال يعنى الست دايما هى اكثر حرص على الحمل والانجاب وده لان ربنا خلق جواها عاطفة الامومة اللى دايما بتدور على منفذ تخرج فيه العاطفة دى علشان كده دايما بتفكر فى الحمل .. لكن الراجل عنده الموضوع اقل اهميه من الست ومش بهمل النقطة دى عنده لكن بقول ان عنده اقل اهميه وده لان المخزون العاطفى اللى ربنا خلقه بيه يقل كتييير عن الست ودى نقطة كل البشرية تعرفها ..
علشان كده انا هقوللك حاجه " الراجل يقدر يستغنى بالست عن اىىىى حاجه فى الدنيا لو كان بيحبها فعلا " والدليل على ده انك هتلاقى ناس عاشوا وماتوا مع بعض ومخلفوش والزوج مفكرش ابدا انه يتزوج واحده تانيه علشان يخلف كان مكتفى بحنان زوجته وعاطفتة تجاهها ..
فا النقطة دى بقه بالذااااات تتوقف على الزوج ومقدار حبه لزوجته وانا فى اعتقادى انه لو فعلا بيحب زوجته فا هيفضل يكمل معاها حياته ومش هيفكر فى حاجه تانى ..
والله ياوداع ده مش كلام حواديت انا عندى التجربة دى قصاد عينى وكل ما بشوفهم بقول ربنا يجعل زوجى يحبنى نص الحب اللى الراجل ده بيحبه للست دى يعنى اهه ممكن الزوج يستغنى عن الاطفال بزوجته ويكتفى يكمل معاها عمرة
فا موضوع ان الزوج يتزوج واحده تانيه ده حلال مقولناش حاجه وطبعا كل راجل عارف ان كان يقدر يعيش من غير اطفال ولا لا بس الفيصل عندى فى حب الراجل لزوجته وانه هل هيقدر يعاشر واحده غيرها علشان يخلف ولالا

بس بقه كلام ليكى انتى ياوداع .. اولا الراجل لما يحب يتجوز هيتجوز ومفيش حاجه هتخنقة ولا ترجعه عن قرارة يعنى ولا تقولى خنقته بالحب والوفاء والكلام اللى ولا بيودى ولا بيجيب ده الراجل لما بتقفل معاه مفيش حاجه بتمنعه وانتى زوجك يوم ما يحب يتجوز هتلاقيه بيقولها فى وشك متخافيش مش هيراعى حاجه بقه خلاص طالما فكر يتجوز خلاص مش هيهمه حاجه لكن زوجك مش كده يا وداع زوجك بيحبك اوى قدرى الحب ده وبلاش تفكرى فيه بالسوء ده ....
ثانيا انتى مش ميؤس منك انك تحملى علشان توصلى للمرحلة دى من الافكار وتفكرى فى لحظة ان زوجك لازم يتجوز علشان يخلف ... ايه ده انتى سرحتى بجد .. لا يابنتى انتى مشكلتك كلها انك عندك وبـــــــــــس وانتى عارفه ده كويس يعنى لو على المشكله العضوية كانت مشكلتك اتحلت من زمااااااااااااان اوى زى ما اتحلت مع ناس كتير قبلك لكن انتى عندك مربوطة مش قادرة تاخدى خطوة صحيحه فى اى علاج ليكى وده طبعا مش بإيدك فى الاول والاخر ... وان كان على الفلوس اللى بتروح منك ياوداع ولا اى حاجه بتتاخد منكم عدوان علشان انتوا نفرين بس ياستى كله عند الله لما ربنا ياخد حاجات هبله زى دى يبقى شايل لك حاجه اغلى واحسن بس انتى تصبرى على رزقك بس

بداية انتي مش وحشة ولا ايمانك ضعيف ولا اي حاجه من النوع ده خالص ممكن تنقال على كلامك ببساطة لانه كلام منطقي وطبيعي واكيد مر في ذهن كل واحدة فينا ويمكن اكتر منه كمان ..

كلامك في حد ذاته مفيش فيه مشكلة .. المشكلة والمحك الرئيسي هي رد فعلك عليه او هتعملي ايه بعد ماخطرت لك الخواطر دي ..


بصي ياستي ..

بداية مفيش حاجه اسمها الزواج استقرار .. لو فكرنا ان ممكن بزواجنا نرتاح نبقى بنضحك على نفسنا .. اذا كان ربنا سبحانه وتعالى بيقول (( ولقد خلقنا الانسان في كبد )) يعني احنا مكتوب علينا الشقاء والتعب طول مااحنا في الدنيا ومش هنرتاح غير في الآخرة باذن الله . .

مش معنى كده ان حياتنا ( مقرفة ) واننا تعبانين تعبانين وانما ان طالما عرفنا ان مفيش حاجه اسمها راحة للابد في هذه الحياة يبقى وكما يقول المثل ( ان لم تعمل ماتحب فحب ماتعمل ) يبقى ان لم تكن حياتنا مريحه لنا كما كنا نتمنى فعلى الاقل نحاول ( نريح ) احنا نفسنا فيها .. يعني نشوف فيها ايه ايجابيات ونستمتع بيه ومنحاولش ندور على حاجة نقصانا باستماته بما يشغلنا عن راحتنا في مالدينا فعلا ..

لاحظي عزيزتي قصة آدم عليه السلام .. كان عنده الجنة طويلة عريضه فيها كل مايتمنى ويشتهي .. كلها بتاعته ماعدا شجرة واحده فقط في الجنة كلها .. تخيلي .. ساب كل ده وراح اكل من الشجرة دي .. خسر الجنة بما فيها لان الشيطان نجح في اقناعه بان السعاده كلها والخلود في الثمرة الوحيدة الممنوعة عنه ..

متخليش الشيطان يكرر عليكي نفس القصة ويقنعك ان سعادتك في الثمرة الغائبة وانك مش هترتاحي غير لو حصلتي عليها .. انتي وانا وكلنا عايشين في الجنة ومفيش بينا وبين الاستمتاع بما لدينا فيها الا ادراكنا لذلك .. مفيش بينا وبين السعاده غير اننا نطنش غياب ثمرة من الثمرات ايا كانت قناعتنا باهميتها ..


نيجي بقى لحتة التعب الي هيروح للغريب ..

انا شخصيا مريت بالشعور ده في فترة من حياتي . . ومازلت بمر بيه خلي بالك على اعتبار ان عندي بنت وبعد عمر طويل في ناس مبحبهمش ( مستنين ياخذوا الي عندي ) وشرعا هم لهم حق فيه ..

بامانة شديده بقولك اني مش زعلانه ابدا ولا متضايقة بل على العكس بقول ( حقهم ) ببساطة لان كل الي عندي ده مش انا الي عملته على ايدي ولا بذكائي ولا بعلم عندي اوتيته .. ده رزق ربنا بعتهولي وماادراني مايمكن باعته لي اصلا عشانهم .. طالما لو مت الناس دي هتاخذه يبقى هو رزقهم فعلا .. هقف في طريق رزق ربنا ؟؟ طب ازاي ..

واخيرا حمدت ربنا اني ابقى انا الي معايا وغيري هو الي عاوز ياخذ وكان ممكن جدا يبقى العكس ..


اما بقى لو خايفة ان زوجك لاقدر الله يتجوز عليكي والكلام ده .. طيب مهو كل المتجوزين على زوجاتهم تقريبا عندهم اطفال .. الي عاوز يتجوز بيتجوز مش وجود او عدم وجود ابناء الي هيمنعه او يشجعه ..

خايفة التانية تيجي تاخذ كل حاجة ؟ طيب مااحنا قلنا ده رزق ولو ده حصل يبقى من البدايه ده رزقها ..

هتقولي اتعب ليه طيب طالما لرزق مش رزقي .. هقولك عشان كل واحد فينا لازم ( يعمل الي عليه ) لازم يكافح ويتعب عشان زي ماقلت قبل كده يثبت انه يستاهل رحمة ربنا ويبقى ( له عين ) يطمح في دخول الجنة ..


الحياة قصيرة جدا وكل الي بندور عليه في الدنيا دي من متاع زائل مش مستاهل والله نضيع نزعل عليه .. بيوت ولا مباني ولا صيدلية ولا حتى ملايين في البنك .. كل ده تراب ولا هناخذ معانا حاجة منه .. حتى الولد الصالح الي بيدعوا لاهله والي كلنا بنتمسك اوي اننا نجيبه وبنقضي عمرنا زعلانين لو مجاش لو فكرنا فيه هنلاقي ان كلنا بندعي لابائنا وجدنا او جدتنا على اقصى درجه .. كام واحد فينا بيدعي لابعد من كده ؟ تقريبا مفيش .. يبقى الولد ده هيدعي لنا قد ايه .. سنة ؟ عشرة ؟ عشرين ؟ ثم تجري عليه هو كمان سنة الحياة ويروح ومحدش هينفعنا ساعتها غير عملنا الي لازم من دلوقت نشغل نفسنا ازاي نخليه صالح ..


صدقيني وداع لو فكرتي فيها كويس هتلاقي ان مش هينفعك ولا هيبقى لك من الدنيا دي غير صبرك على ظروفكم وتحملك لقضاء ربنا برضى قدر الامكان .. كل ماتحسي انك نفسك في الاطفال او انك بتعاني من الوحده او او . .احمدي ربنا انه ادالك الفرص دي كلها عشان تخليها مصدر لحسناتك ..

احنا في سباق محموم مين فينا يقدر يجمع اكبر قدر من العمل الصالح .. وللاسف غالبيتنا مشغولة عن كل ده بالبحث عن الي ناقصها ومش واخدين بالنا ابدا ان كل ده زائل والي هيبقى لنا بس هو الاولى باننا ندور عليه ..

وداع حبيبتي صدقيني الللي في دماغك ده كله مش تخريف
لا والله ده تربيه من الله ليكي بأنك تفهمي حاجات كتير يمكن تكوني مش فاهماها
أولا الزوجه مش ضيفه في الدنيا ده ولا حتى في دنيا زوجها
تعالي نمسك نقطه نقطه
1- إحنا ليه إتخلقنا (ذكر وأنثى)؟؟؟؟ علشان نعبد ربنا طبعا
2- إيه الهدف من حياتي وإيه دوري فيها (ذكر وأنثى )؟؟؟؟ الهدف مرضاة الله والفوز بجنته ودورنا العمل على تحقيق الهدف ده بكل وسائله (عباده - عمل - أخلاقنا - تبليغ الدين - بناية بيت مسلم - تربية أبناء - صلاه - صوم - ووووووووووو........) والدور ده يجب إن إحنا نقوم بيه كلنا متزوجين أو لأ
3- طيب إيه لازمة الزواج ما انا أقوم بالدور ده لوحدي وخلاص؟؟؟؟ الزواج ده رزق من عند ربنا لو جالنا يبقى ربنا رايدلنا تنوع في الخيرات والزواج كمان سنة الحياه ونعمه من نعم ربنا علينا يعني اللي متجوزتش هيه ماشيه في هدفها وبتحققه ومينفعش إنها توقف حياتها على الزوج المنتظر وإلا تبقى لغت دورها في الحياه ومحورته حول الزوج
والمتزوجه ربنا أخد منها التفرغ لأداء دورها وبدلها بزوجها اللي هو كوبري ليها للجنه لو مشيت عليه بما يرضي الله لكن لو وقفت تتطنطط عليه ممكن تكسره ومتوصلش للجنه ولو الكلام ده مش صح كانت كل واحده متزوجتش ولا زوجها توفى عنها فتحت لنفسها تربه وقعدت فيها
4- طيب الزواج يعني إيه ؟؟؟؟ يعني بيت مسلم بنبنيه على مرضاة الله في كل حاجه تخصه ... يعني زوج وزوجه شركاء في هذه الحياه ومطلوب منهم يوحدو هدفهم ويعملوا على تحقيقه سويا اللي هو الجنة
5- هل الأطفال شرط لنجاح الزواج ؟؟؟؟ لأ طبعا والأطفال أصلا مينفعش تكون هدف من اهداف الزواج يعني مينفعش أقول أنا إتجوزت علشان أبقى أم لأ أنا إتجوزت علشان أبني بيت مسلم لو ربنا أكرمني في بيتي ده بأعضاء زياده اللي هما ولادي أهلا وسهلا ولو حرمني منهم فده إصطفاء ليه ومساعده من ربنا ليه في إني أوصل لهدفي اللي هو الجنة بصبري على هذا البلاء
وبعدين عندنا أحلى مثال السيده عائشه رضي الله عنها مأنجبتش من الرسول عليه الصلاة والسلام تفتكري مكنش نفسها في أولاد اكيد كان نفسها وكانت أحب زوجه ليه وكانت بتدلع عليه وحياتها موقفتش علشان هيه مش أم بالعكس هيه من أكثر رواة الحديث لينا
يعني من الأخر الأطفال خير زائد ربنا بيديهولنا ومش معنى كده إن عدم وجوده يقلل من قدرنا أو دورنا في الحياه إحنا مش مكن ولا هنجيبهم بشطارتنا لكن لو عندنا سبب يمنع مجايبهم يبقى واجب علينا السعي دينيا ودنيويا لمجايبهم وده هيبقى من ضمن خطواتنا في تحقيق هدفنا
6- هل عدم وجود ابناء هو إبتلاء للزوجه فقط ؟؟؟؟ بغض النظر عن مين السبب في عدم الإنجاب طبعا تأخر الإنجاب إبتلاء للزوجين لكن الزوجه عاطفيه فبتتأثر أكتر من الرجل وبتعبر عن مشاعرها أكثر منه لكن ده لا يلغي إنه هو كمان مبتلى وصابر
7- طيب ممكن عدم وجود أطفال يكون سبب في هدم بيت الزوجيه ؟؟؟؟ والله البيت اللي إتبنى لمرضاة الله ميهدهوش عدم الأطفال لأن هدف الزوجين واضح وهما متفقين عليه وبيعملو على تحقيقه ومنضمن عمابلهم ده السعي لمعالجة أنفسهم علشان مايبقاش المانع منهم
8- طيب ممكن تكون إحدى وسائل السعي ده إن الزوج يتزوج تاني بالذات لو الزوجه هيه سبب التأخير؟؟؟؟ والله إحنا لو بصينا للنقطه ده بعواطفنا هنقول لأطبعا هو هيه السبب ده من ربنا وهو معندوش أصل وووووو
لكن انا هقولك إحنا هنبصلها شرعا وهنلاقي إن ده حقه ولو هو حب يمارس حقه ده مينفعش نمنعه ولو منعناه نبقى بنمنع حق من حقوق الله وبنزعل ربنا .....
9- طيب والزوجه زنبها إيه ؟؟؟؟ هقولك تعالى نرجع للبدايه هيه أصلا من الأول كان هدفها من الزواج ده إيه الجنه ؟؟ طيب مه تقدر تمشي في مشوارها زي ما هيه حتى مع وجود زوجه تانيه ... ولو هيه حاسه نفسها مش قادره ومش متقبله الوضع ده فمن حقها الشرعي الإنفصال اللي مش من حق أي حد إنه يمنعها منه حتى الزوج ( يعني لو الزوج جه لزوجته يقولها أنا عايز أتجوز عليكي موافقه ؟ وقالته موافقه لكن ننفصل الأول ؟ فواجب عليه إنه يطلقها قبل زواجه من التانيه وإلا يبقى بيعمل حاجه حرام ... ولو قالت مش موافقه يبقى حرام عليها هيه )
ولو حصل والزوجه إطلقت ده مش نهاية العالم لأ الزوج كان خير زائد ليها وربنا إسترده تاني وده ميلغيش دورها في الحياه ولا أهميتها فيها ولا أهميتها عند ربنا زي بالظبط الأم اللي توفى إبنها أو اللي توفى زوجها
10 - طيب لو الزوج هو السبب من حق الزوجه طلب الطلاق ؟؟؟؟ طبعا من حقها ومحدش يقدر يمنعها حتى زوجها وإلا يبقى بيحرمها من حق من حقوقها
وطبعا انا لما بقول كده أنا بجيب من الأخر علشان نبقى واضحين قدام نفسنا ونريح دماغنا من اللي ممكن يحصل ولو مش عارفه مين قال اعمل إيه ؟؟؟ ولو حصل كذا أروح فين
كل ده حاجات في علم الغيب وكل ده حاجات متعطلناش عن هدفنا
وبعدين يا وداع إنت ربنا ناعم عليكي بنعمة الوقت فيه غيرك كتير محرومين منها إستغليها في تحقيق هدفك
وإستغليها في إن إنت تخلي زوجك ده ميقدرش يعيش من غيرك خليكي ليه سكن وحبيبته وبنته وزوجته وأمه و أخته وسند ليه في الدنيا ده وفي الغربه
ولو عملتي كل ده وزوجك مقدرش خلاص إنت عملتي اللي عليكي قدام ربنا أما النتايج ده فبتاعت ربنا وبس
وخلي بالك الأطفال والله مش سبب للسعاده ولا الزوج ولا المال هما زينة للحياة الدنيا
لكن مش هما سبب سعادتنا
سعادتنا في رضا ربنا علينا سواء كنا متجوزين أو لأ أو أمهات أو لأ
والزوج والولاد دول رزق ربنا إداهملنا يبقى الحمد لله
حرمنا منهم برده الحمد لله
إداهملنا ورجع إستردهم برده الحمد لله
اهم حاجه منخسرش نفسنا وهدفنا الحقيقي اللي ربنا خلقنا علشانه
أما من ناحية الناس اللي بياخدو تعبك معلش يا ستي إحتسبيه لله وإعتبريهم اهلك وساعدي زوجك علي بره بيهم
اهم حاجه إن الحاجات ده متأثرش على علاقتك بزوجك وربنا الرزاق يمكن ربنا لما يشوفك بتبريهم يرزقك بأفضل مما أخذوا منك وخلى بالك لو إجتمعت الأمه على ان ينفعوك بشيء لن ينفعوك إلا بشيء قد كتبه الله لك ولو إجتمعوا على ان يضروكي بشيء لن يضروكي إلا بشيء قد كتبه الله عليكي

يارب تكوني إستوعبتي كلامي يا وداع أنا عارفه كلامي صعب شويه
بس والله والله والله أنا مريت بكل اللي قلتي عليه وكان نفسي في حد يريحني ويقولي كل ده
وحتى بعد ما فهمته كان الشيطان اللعين ده ييجي ويدحك عليه برده في لحظات ضعف
ربنا يبعد عننا الشيطان ووسوسته يارب
أنا حاسه بيكي قوي قوي قوي
ربنا يكرمك يارب من واسع كرمه وفضله وعطائه ورحمته وحنانه ومنه يارب
ويعطيكي من كل ماتحبي وتتمني حتى يرضيكي يارب
ويدخل السرور على قلبك من حيث لا تعلمين
ويجعلك إنت وزوجك قرة عين لبعض
ويبعد عنك الشيطان اللعين
قادر يا كريم يااااااااااااااارب
اللهم آمين اللهم آمين اللهم آمين