تجمع المتوكلات علي العزيز الوهاب (خبرات متبادله حول مراكز تأخر الحمل بمصر)الجزء 17

صباح الخير يا بنات


بجد ان يد الله مع الجماعة


بسم الله ما شاء الله عليكو و ربنا ميحرمناش منكم ابدا


وداع بسم الله ما شاء الله البنات كفوا و وفوا
انا كمان قبل كريم كنت بفكر فى نفس تفكيرك بالظبط و مش انا و بس لأ بنات صحباتى كتييييير حتى مخلفين و عندهم عيال
كلنا عندنا احساس بعدم الامان من بكرة
بس فعلا ذى ما ام عتريسة قالت ربنا موزع الرزق كيفما يشاء و عارف هو بيعمل ايه
و اذا كان فى حاجة فى بالك ليه متقوليش لجوزك عليها
انا بجد عملت كدة قبل ما احمل فى كريم و قلتله كل مخاوفى من اللى جاى
طيب حقولك على حاجة انتى مفكتريش فيها
اذا ربنا كرمك بولد و طلع عاق و لما اتجوز طردك عشان مراته مش دا ممكن؟
الواحد يتكل على الله فى مستقبله و خلاص المهم انه يومه يكون بخير و مرتاح و بس و يسيب المستقبل بايد ربنا
و حقولك على تجربتى انا عشت 6 سنين من غير كريم و سنة بكريم
الست سنين فيهم جمالهم و ايامهم الحلوة اللى مش نافع ترجع تانى بسبب كريم لكن بوجود كريم فى ايام برضو حلوة و من شكل مختلف و عمرها مكانت حتكون موجودة فى الست سنين الاولنيين
يعنى ربنا بيدى حلاوة حياتنا على اد اللى فيها
المهم يا ست الناس اننا منضيعش اللى معانا عشان بنفكر فى اللى مش معانا
لاننا مهما فكرنا و عملنا و سوينا و ربنا مش رايد كل اللى حنكون عملناه اننا مستمتعناش باللى معانا عشان خاطر اللى مش معانا
سبيها على الله و ان شاء الله ربنا حيكرمك بفوق اللى كنتى تتمنيه و بكتير كمان المهم انك تتبسطى باللى معاكى دلوقتى
و بالنوسبة للصيدلية
تأكدى ان وجودها مكانش فيه خيرك انتى و جوزك و ممكن كانت تفضل و بعد الشر يحصل بيها مكروه ليكى انتى و جوزك مكنتيش حتستفادى بوجودها و كنت حتقولى يا ريتها كانت غارت و دا محصلش
ربنا يسعدك و يفرح قلبك و يرزقك بذرية صالحة تكون هدية صبرك و احتسابك عند ربنا و ان شاء الله كل دا يكون فى القريب العاجل قوى




بوبا الحمد لله على سلامة بابا و ان شاء الله تطمنى عليه بأذن الله
انتى نويتى تفقسى فى مصر ولا هنا؟


توتا حبيبتى انا بجد بحبك فى الله
قوليلى ناوية على ايه فى الايام اللى جاية؟




باقى البنات بحبكم فى الله

دوعة

بصى انا قريت ردود ريمو وام عتريسة ومسلمة عليكى

بصراحة مش لاقية ولا كلمة اقولها بعد اللى قالوه لانهم ماشاء الله مخلوش فاضل حاجة تتقال وانا عن نفسى مقتنعة بكلامهم 100%

بس ماينفعش برضه اقعد ساكتة لان كلامك اللى قولتيه ده انا نفسى مريت وبمر بيه وبغض النظر يادوعة عن اى حاجة

انا حاسة بيكى لان تقريبا ظروفنا واحدة من ناحية الغربة والوحدة وتأخر الحمل برضه وربنا يكرمك عن قريب يارب وهتفهمى معنى الكلام اللى هقولهولك ده

بصى يادوعة بالنسبة لمسالة انك حاسة انك رابطة جوزك وخنقاه بحنيتك وحنانك والكلام ده

فده مش صحيح لان كل الرجالة اللى فى الدنيا يابنتى بيتمنوا الحنان والحنية دى

وبعدين يعنى هم الرجالة اللى عندهم اولاد بيبقوا مربوطين بيهم وبيخلوهم مايهربوش من زوجاتهم ؟
انا بيتهيألى بقى العكس الراجل ساعات مابيحبش المسئولية ولا الارتباط بالاولاد والتقيد بمطالبهم وبيبعد عن البيت لما يحس ان مراته مهتمة اكتر بالاولاد وبطلباتهم وده فى معظم الاحيان بيبقى سبب هروب الراجل من بيته وبيروح لواحدة يلاقى عندها الفراغ اللى بيه تقدر تديله الحب والحنان لانها عندها فراغ مش اولاد

يعنى انتى فى نعمة يادوعة انتى تفكيرك دلوقتى وحياتك كلها منها 100% لزوجك مش لحد تانى

والله العظيم اول ماتحملى هتحسى وهتفهمى اللى انا بقولك عليه ده وتعالى هنروح بعيد ليه انا قدامك اهه انا كنت بتخيل الامور زيك كده وان جوزى ممكن يكون جواه متضايق من موضوع تاخر الحمل ده وانه ممكن بينه وبين نفسه يفكر يتجوز واحدة تانية و ,,, و,,, وكل الامور دى
تعالى بقى اهو انا لسة حامل مخلفتش وبدأ التذمر مع انه طبعا مبسوط بموضوع الحمل بس الراجل انانى يابنتى عاوز كل حاجة وكان الست دى ماكينة وتحت الطلب

يعنى دلوقتى لو قال نخرج نتفسح وقولت مش قادرة او تعبانة او حاجة يقولى فين ايام زمان
وطبعا انى مع الحمل كل حاجة فيكى بتتغير شكلك وجسمك ومودك وده طبعا مش جاى على هواه
وحاجات بقى زى كده كتير لدرجة انه بدأت فعلا تحصل مابينا فجوة كده مش عارفة جاية منين
وبدات افكر انى لما يبقى عندى بيبى فعلا هنبعد عن بعض اكتر يمكن ده برضه احساس مش صحيح بس انتى غصب عنك بتلاقيكى بتتغيرى ومش زى الاول لان حنانك وحنيتك لازم هيتقسموا بين الزوج وبين اطفالك وده فى اغلب الاحيان مش بيعجب الزوج

فحاولى تستمتعى بكل لحظة دلوقتى وتدى لزوجد كل طاقتك وحنانك عشان بعد كده هيقلو للنصف وفهميه الحتة دى عشان يبقى عامل حسابه
تخيلى جوزى بيكلم واحد صاحبه لسة متجوز بيقوله اجلو الحمل شوية خليكو تعرفوا تخرجوا وتتفسحوا وتعيشولكم يومين

والله حسسنى انه عندنا 10 عيال رابطينا فى البيت وكل ده ليه لانه كان عاوزنا نطلع عمرة فى رمضان وانا طبعا خفت لان الطريق طويل وكمان بنروح من الكويت للسعودية برى وفيها مشقة جامدة جدا كفاية ان يوم ونص انتى قاعدة فى الباص مش بتتحركى غير فى الاستراحات بس وانا لما رحت السنة اللى فاتت تعبت فمابالك لما تروحى وانتى حامل اكيد تعب وخوف برضه على البيبى
حاسس بقى انه مش عارف يعمل اللى يجى على باله زى الاول

الحاجة التانية بقى بالنسبة لموضوع الصيدلية وانها هتروح منكم وان الناس طمعانة فى شقاكم وتعبكم فده يادوعة حدث ولا حرج مش انتى بس ياحبيبتى وسيان معاكى اطفال او لا فالطمه ده لاهيقل ولا هيختفى وبما ان جوزك حاسس بالمسئولية تجاههم فاوعى تتخيلى انه لو عندكم اطفال احساسه بالمسئولية ده تجاه اهله هيقل بل بالعكس هيبقى اصعب عليكى انتى لما تحسى انه ممكن يجى على اطفاله عشانهم

وهديكى مثال بسيط جدا لانى انا برضه بمر بنفس ظروفك دى بالرغم من ان جوزى ابوه وامه متوفيين بس ليه اخ كبير بيشتغل هنا فى الكويت معانا بس اسرته فى مصر ومعاه زوجة مش بتبطل طلبات وعنده 5 بنات ومضيعين كل اللى بيشتغل وبيتعب بيه هنا تمام تفتكرى حد زى ده محتاج مساعدة مننا انا عن نفسى شايفة انه المفروض مايلجأش لاخوه الاصغر منه وخصوصا انننا زينا زيه فى الغربة هو محتاج بس يعلم مراته تمسك اديها شوية وماتطلبش كتير بس جوزى بقى لما بيلاقيه محتاج ممكن يبيع اللى وراه واللى قدامه عشانه يقولى امال يطلب من الغريب يعنى؟
وانا كنت زيك كده بفكر انه عشانمش عندنا اولاد فهو بيساعده وبيقف جنبه
طيب انا دلوقتى فاضلى بس كام شهر واولد يعنى مصاريف ومطالب خصوصا انى هجيب ماما من مصر عشان موضوع الولادة وبعد كده هنزل مصر مع ماما انا وجوزى والنونو وهاخد اجازة شهرين من الشغ لغير الطلبات بقى اللى المفروض اجهزها للموضوع ده يعنى هتبقى مصاريف متير الفترة اللى فاتت والحمد لله انا كنت عاملة حسابى ومحوشة مبلغ كده عشان موضوع العملية اللى كنت ناوية اعملها ولما ربنا اكرمنى قولت خلاص اهو ينفعو فى موضوع الولادة تخيلى بقى اخو جوزى تعب شوية هنا وجه عندى البيت وخف وبقى كويس وبعد ماروح قال انه تعب تانى وان نفسيته وحشة وخايف يموت وهو بعيد عن ولاده مع انه ماشاء الله كان كويس جدا حتى جوزى قالى هو بيعمل كده عشان عاوز ينزل مصر بس مش معاه فلوس وطلب من اخوه هنا فلوس عشان ينزل مصر وقاله الدكتور قالى حاول تغير جو
طب هو يغير جو انا مالى ويبقى على حسابنا احنا ليه ؟ طبعا طارو القرشين اللى معانا فى سفرية مصر للاستاذ وعملت عليهم شغلانة وكانت حكاية وخناقات ومشاكل وكل اللى طالع على جوزى ان طالما ساعدنا حد محتاج يبقى ربنا هيكرمنا من وسع فى موضوع الولادة ومصاريفها .... يعنى ياحبيبتى انى اهون بذمتك لما تحسى انه عاوز يساعد اهلله وهو لسة مش فى رقبته مسئولية ولا تحسى انه لاحاسس بيكى ولا باولادك عشان خاطر اهله وقرايبه؟

وداع استهدي بالله ياحبيبتي وربنا ما يغير عليكم ويارب تدبو البيت اطفال
انا لما قرءات المشاركات الدموع وقفت عيوني
لاني للاسف بمر بحالات دي كتير وحاسه اني في وحده والمستقبل امامي موحش بس سبحان مغير الاحوال املنا بالله وحده انه يغير حالنا
حرام عليك يوداع زوتي هموم فوق الهموم
دوعة

كوكر

ايه اخبارك والواد كوكو عامل ايه
\صحيح هى نيفو سمت بنتك ايه؟؟؟

انا ياستى نويت افقس هنا فى الكويت هعمل ايه مجبر اخاك لا بطل

ان شاء الله على ميعاد ولادتك اكون رجعت هنا تانى
و اكون تحت امرك فى اى خدمة

بالنوسبة لاسم البنوتة
نيفو سمت اسم معجبنيش و معجبش ناس تانية غيرى

فاعتمدت اسم "سفروتة"