تايدين ولا ترفضين شوفة الحريم لك قبل الشوفة الشرعية و ليه؟

بصراحه انا من المعارضين لان فيه بعض امهات الله يهديهم يقطعون رزق البنات بشروطهم التعجيزيه حتى لو الولد ماتشرط تجي الام تبيها وصف والاخت وصف ثاني كأنهم هم اللي بتزوجون البنت مو الولد
زي وحده من اقاربنا اخوها يبي يتزوج وقال ماعندي شروط غير انها اخلاق ودين بس الام قالت لا أبيها وأبيها وماخلت بيت ماطقت بابه وكل البنات اللي ندلها عليهم اخلاق وسنع بس ماجا اللي على مزاجها
سبحان الله بس

والله الوحده مو فستان الاهل وبعدين الولد

خلاص يجي هو وامه وبس بس الاخوات ماله داعي يجون

اعرف وحده جت امه واخته الكبيره وبعدين الولد وبعدين دقو

قالو اخته اللي اصغر منه تبي تجي وتشوفها خير ان شاالله بضاعه هي

الولد اللي بيتزوج مو هم

بارك الله فيكم ارائكم جدا طيبه

إن كانت الأم شايفتها في مناسبة فليش تشوفها مرة ثانية وتحرج البنت وأهلها !
للأسف معظم بناتنا ماعندهم ثقة بالنفس فتجي الأم تكملها تقز ساعات ثم تروح بدون أي اتصال
وشوفي المسكينة على نار وأهلها يتفادون يسولفون معها لايجرحونها بشيء ويالله شهر تنسى !
الخطبة صارت تعذيب وطاريها يهد الحيل ..

أهلي يخلون الأم تجي مع الولد في نفس اليوم أبوي يشوفه ويسولف معاه مثل ماتجلس معي ..

ياليت عندنا وعي في الأمور بدل ما نأذي حد واحنا ماندري ومبردين ..
لو كانت الأم تجي مع ولدها وتسولف وتعطي مع البنت وتشوف مواصفات ولدها فيها وتقيس أخلاقها
ثم تتصل بعد أيام وتبلغ الأهل سواء الرفض ولا الموافقة هذي حياها الله من نلقى مثلها ألحين !

للأسف تكلمتي ياعزيزتي بمثالية ولا مجتمعنا من هالناحية نــــــــــــاقص وبقوة ..
يكفي إن الأم تبي العروس اللي بمزاجها وتطب على أهل البنت وتشفط الحلويات والعصاير
وهي ما سألت عنها .. ما شافتها قبل .. ما تأكدت من اخلاقها .. و جلسة وحده ماتسوى ..
والبنت بتطلع أحسن ماعندها ومهما كانت الأم فطينة ماراح تنقل لولدها إلا الانطباع الأول ..
ولا أتكلم عن الكل ..

بالمختصر مانها فايده هالزيارة .. إلا إن كانت الأم تجي مع ولدها ومثل ماتشوف البنت الأبو يشوف الولد ..
وياليت لو يكون عندها ذرة خير تتصل وتخبر الأهل لو ماكتب الله نصيب .. راعوا النفوس وياكثر المتأذين :icon33:

وأخيراً أشوف السؤال عن البنت أنجح بألف مرة من تحديد يوم تشوفينها فيه ..

ربي يحفظكم