يسعدكم ربي:)
أولا أنا ماحملت للحين ولكن الله يرزقني بالحمل قولوا آميييين
كثيييير يشتكون ولدي عنييييد ولدي عااااصي تدرين إنك أنتي اللي خليتيه عنيد وعاصي
ايه انتي ليه مستغربه طبعا الهدايه والصلاح بيد الله ولكن لازم تأخذي بالأسباب وتعودي ابنك بالبر والطاعه لأنها والله مع الوقت بتصير تصرفاته عاده ويتعود على طاعتك
ياحبيباتي أنا بصراحه أستفزني موقف شفته كنا متجمعين أنا والبنات بعدين جاء طفل عند مامته وطلبها قالتله مافيه قام بكى وعصب ورمى مامته بالحلاوه وجلس يسبها
عااااااد أنا عصبت منه بقووووووه:mad:
قلتلها وين الإحترام ليه تخلينه يسبك كذا ويضربك قالت الله يهديك بزر ومعصب تبغين أحط عقلي بعقله وبعدين الله يهديه مدلع شوي
طبعا مهما كان الدلع مفروض ماتصير هالحركه والمثل يقول"ابنك على ماتربينه وزوجك على ماتعودينه"
وطبعا إذا أنتي مربيته كذا والله ليجلس على هذا الطبع حتى لو كبر مابيتغير لأنه وهو صغير تعود على كذا
حاولي دايم تخليه يطلب الشيء باحترام ولايرفع صوته وإذا رفع صوته عليك طنشيه واحقريه وقوليله إذا خفضت صوتك وكلمتني بإحترام بعدها بكلمك
حبيباتي في شغلة ثانيه لازم تنتبهين لها أنا أعرف إن الأم نبع الحنان و إنها دايم تضحي بعمرها ووقتها عشان تسعد عيالها بس ليه ماتخلين عيالك يضحون عشانك
مثلا داايم انتي تأكلي طفلك ليه مايوم من الأيام تقولي يله ياحبيبي وأعطيه الملعقه وقولي أكلني طبعا بس تذوقي مو تشبعي وبين فتره وفتره خليه يأكلك
وانتي جالسه على الأكل مع عيالك طبعا أكيد تقطعين لهم اللحم قوليلهم يله حبايبي إقطعولي كمان أنا لحمه
طبعا هذي التصرفات مو حب في الأكل لا هذي عشان يتعود يأكلك عشان إذا كبر مايستحي من هالحركات
كمان تظاهري يوم من الأيام إنك تعبانه وقولي ياحبايبي مامتك تعبانه أنا بروح أحط راسي عالسرير وانتم رتبوا البيت وجيبولي الدواء وكل شوي ناديهم قولي تعالوا أطمنوا على مامتكم
كمان دايم حاولي تظهرين برك لأبيك وأمك إذا كانوا على قيد الحياة أدعيلهم قدامهم وأحضنيهم وغمزي رجول أمك قدامهم لأنه بتنطبع هالحركات في ذاكرتهم وبيطبقونها عليك إذا عجزتي
والله ياأخواتي انه بهالحركات تعودين عيالك سواء صغار أوكبار على طاعتك وتصير عندهم عاده إذا كبروا لأنك لو عودتيهم على إنهم يتعبون عليك مابيستغربون من الوضع لعجزتي ولابيتأففون ولايتذمرون من خدمتك لأنهم من يوم هم صغار كانوا يتعبون عشانك
إن شاء الله تستفيدوا من الموضوع وآسفه الكلام داخل في بعض
ويارب يرزقكم الذرية الصالحه ويرزقكم برهم وطاعتهم وأدعولي يارب أصير أم
شاركي في النقاش
سجلي الدخول لإضافة تعليق.
التعليقات
22مواضيع مشابهة
تابعي تجارب أخرى من هذا القسم.