عيالي يابنات عيااالي

الله يعينك أختي على هالجوا ةيهدي بالكم ويخليكم لبعض

فيه وحده كانت حياتها كذا مع عيالها وزوجها وكانت حياتهم على حافة الطلاق والدمار

لين هي بدت تقرا سورة البقرة يوميا وتشغل القران في البيت وتخلي عيالها يرددون الاذكار في الليل والنهار

وسبحان الله تقول هدت النفوس وطابت وصارت حياتهم أحسن من قبل ولله الحمد

أنتي أقري سورة البقرة ورددي الاذكار وتصدقي وأستغفري وسبحي كثير وربي يكتب لكم الخير

اختي انا عندي ولد .. من لما نزل من بطني و هو اعصابه محروقه.. و عصبي جدا جدا.. لدرجة انه اول مرة انقلب كان عمره اسبوعين بس و كان جوعان و انا طولت بالرضعة و تشنج و انقلب من كثر ما كان عصبي و طبعا الكل كان ملاحظ و مستغربين جدا.. لما كبر و دخلته الروضة.. صار في بيئة جديدة... و الظاهر ما عرفوا يتعاملون معاه.. قام يضرب الكل مثل المجنون و ضرب كراهية.. و حتى انا و ابوه صار يضربنا.. و كل مكان نروح له فيه اطفال يضرب الاطفال ضرب..

راح اعطيج الخطوات اللي مشيت عليها في البيت و برى البيت لحد ما قدرت اغير ولدي تماما.. و لله الحمد ...و الحين الحمدلله الكل ملاحظ التغير الجذري اللي صار لولدي ما شاء الله لا قوة الا بالله..

اول شيء.. ما راح انكر انه للاب دور كبير في التربية.. بس ترى الشغل الاساسي كله عليج انتي كأم.. و هالشيء عن تجربة مو مزح.. مع انه زوجي الحمدلله متعاون.. بس كان ينفذ اللي انا اقوله.. يعني رحتي او جيتي انتي الاساس و بس.. الام هي اساس كل شيء.. في الوقت الحالي خلي ريلج على جنب شوي..

اول شيء حبي عيالج باللي هما فيه و راويهم هالشيء .. يعني دايما استخدمي كلمة "انا احبكم" .. بس دخليها في جمل عتاب لطيف.. مثل: " و الله انا احبكم ليش تأذوني".. " انا احبكم و ابيكم احسن الناس".. "انتو حبايبي العاقلين لا تسوون كذا" و من هالامثلة.. و لو ضربتيهم.. قولي لهم : "انا احبكم و ما ابي اضربكم.." حاولي تزيدين جرعة الحب في كلامج و تصرفاتج.. يعني تقولين ولدج لو مريتي عنده يخاف.. لو سوى هالحركة على طول لميه و بوسيه.. و الله ما تتصورين اشكثر هالشيء ساعدني في تهدئة ولدي.. احيانا كان يكون شايل شيء عشان يحذفه علي و بس اقوله انا احبك ليش تبي تضربني.. على طول ينزل يده.. و انا طوالي اقول له انا احبك واايد تعال ابوسك.. و المه و ابوسه و اخليه في حضني مدة لحد ما يطيب خاطره تماما.. و الله كان يهدا و يصير غيررررر.. و ترى انج تراوينهم الحب راح يختصر عليج طريق طوووووووويل و راح تحصلين استجابة سريعة جدا من عيالج...

و خلال هالفترة.. مسكي اعصابج و خليها حديد.. و لا تضربين ابداااا... و لو وصلتي لمرحلة انج راح تفقدين اعصابج.. طلعي نفسج من الموقف ككل و انسحبي لحد ما تهدين.. انا كنت اروح اصك الباب على نفسي و اقعد اسوي تمارين تهدئة.. مثل تمارين تنفس او رياضة خفيفة.. او اشغل نفسي باي شيء الا اني اواجه ولدي.. لاني اعرف اني راح اضربه و هالشيء راح يعقد الامور ما راح يعدلها.. راح تلاحظين انه هالحركة راح تخلي عيالج يهدون من نفسهم و لو لفترة مؤقتة..

ثاني شيء بالنسبة للعقاب او الثواب.. خليهم يكونون فوريين... يعني خذيهم مكان يحبون يروحونه.. و قبل لا تدشين خبريهم لو تهاوشوا او اي حد فيهم ضرب الثاني راح تطلعين من المكان و تردينهم البيت.. و لو صار و تهاوشوا مو على طول تردينهم.. عطيهم انذار اولي.. وقفيهم و طالعيهم في عيونهم و قولي لهم مرة وحدة بعد و لو تكررت الحركة على طول على البيت.. و لو تكررت الحركة على طول خذيهم و رجعيهم البيت حتى لو بكوا و صرخوا و قلبوا الدنيا.. قوي نفسج.. مرة مرتين يتعلمون.. بس خليها فورية..

انا جربت هالحركة مع ولدي و نفعت و تعلم الدرس.. للعلم ولدي كان عمره 3 سنوات بس.. يعني اكيد عيالج راح تأثر فيهم.. هالشيء يخلي عيالج ياخذونج على محمل الجد و يعرفون انج حاسمة و حازمة و ما تلعبين..

و حطي الاشياء اللي يحبونها معاج دايما.. و لما يسوون شيء زين او لما تبينهم يسوون شيء زين و يسوونه.. على طول كافئيهم فيه.. هالشيء راح يبني ثقة بينج و بينهم.. و يصيرون مطيعين مع الوقت لانهم يثقون فيج.. و هم لا تنسين الكلام الحلو و التشجيع..

و طبعا في المدرسة كلمت مدرساته انهم يكونون ايجابيات معاه.. و يحاولون يقربون بينه و بين زملاءه.. و الحمدلله كانوا متعاونين معاي جدا..

هم نظمي اوقاتهم و اشغليها لهم بالعاب انتي تكونين طرف فيها.. هالشيء راح يخليهم يحبون اللعب مع بعض و معاج.. و هم راح تتحسن علاقتهم مع بعض واايد.. و ركزي على الالعاب اللي فيها ادوار.. عشان يتعلمون يحترمون بعض من خلال احترامهم لادوار بعض في اللعب..

شوفي اختي هالامور يبي لها صبر خاصة انه انتي عيالج اكبر و اثنين الله يحفظهم مو واحد.. بس ان شاء الله ما تطول وايد :)

موفقة حبيبتي و لو بغيتي اي شيء ترى انا في الخدمة لاني حاسة باللي تمرين فيه و حتى انا صار لي القولون من ولدي خخخخ بس الحمدلله كل شيء تمام الحين :)

دمتي

معليش ياعمري اضغطي على نفسك شوي وتفرغي لهم لو على حساب البيت وترتيبه وش فايدة التنظيف والترتيب والقلوب شابة نار

والبنت عمرها 6 يعني تنفعك بالشغل اشغليها معك خاصة الطبخ في المعجنات والحلويات خليها تفرد العجين وتحط الجبن فيها
قولي لها تنشر معك الملابس عشان تخلصين الشغل بسرعة وتلعبون مع بعض

وبكذا بترتاح نفسيتها خاصة ان بعدها بيبي تغار منه وقبلها اخو يغار منها يعني هي بين نارين وانت اللي تطفينها

شوفي دايم عندنا يقولون ان البنت اذا جاء بعدها مولود يكون شعورها مثل الزوجة اذا تزوج عليها زوجها

فعشان كذا احاول ان امتص غيرة بنتي واداريها وامدحها

بس هذا مايمنع اني اهاوشها اذا غلطت وانا عارفة انه غلط لكن مافيني صبر هههههههههه انصحك وانا مثلك بس جالسة احاول اعالج الموضوع لا يكبر

بعد ماتصفى النفوس ويندمجون مع بعض بتنحل مشكلة الزوج اذا شاف اولاده يضحكون ويلعبون مع بعض بيحب الجلسة معكم

ادري بتقولين الكلام سهل لكن مايمنع انك تحاولين بكل ما وتيتي من طاقة

والله ترى مالنا الا عيالنا نتعب معهم وهم صغار احسن من نتعب معهم وهم كبار

اقري على اولادك
والضرب هو الي يخليهم يوصلون لهالمرحلة
خفي عن الضرب بكرو لكبروا تقسى قلبوبهم عليك ويكرهونك ..

حرام عليك يعورون القلب عليك بقرائة سورة البقره ومالك الا الاستغفار والدعاء لهم بالهدايه والصلاح