وش نسوي بالشبكه والملكه ؟؟

حبيبتي كل اللي تسآلين عنه يختلف من عايله لعايله لاهل نجد
يعني تلقين ناس مهور بناتهم ٤٠ وناس ٥٠ وناس ٨٠ وناس فوق ال١٠٠
بس ترا الغالبيه ٥٠
والشبكه ياقلبي مو حلوه تعطونهم الفلوس
روحي ودوري وان شا الله بتلاقون شي مرتب وحلو وترا غالبا الشبكه تصير الماس ولو بتجيبون دبله كثر الله خيركم بس ترا ناس بعد من عاداتهم ساعه بعد مع الطقم والدبله
ولازم شي لامها لو طقم بسيط
وياقلبي نصيحتي لك روحي محلات المستعمل ترا الناس مع غلا الذهب صاروا يبيعون طقوم ما لبسوهم وبتصير عليك ارخص بالربع
بس اهم شي العلبه تكون فخمه ومزينينها

اذا هم بيسوون شبكه انتوا ما عليكم الا تجيبون الطقم وهدية امها
والبخور ودهن العود ترا علا الرجال دايم
واذا هي حفله مكبرينها البسوا فساتين من عندكم من قبل وروحوا الصالون ومو لازم شي مبهرج شي بسيط سوي.... واحس ماله داعي تشترون وتتكلفون بشي جديد اذا عندكم شي بسيط من قبل
اذا هي صغيره بس انتم وهم البسوا تيورات او بدل مرتبه وسيشوار وخلاص

وترا الشبكه ما تجي علا العريس ابدا كله علا العروس وهذي عاده جديده توها تدخل علينا من ٥ سنوات بس مو من قبل

الزواج اهل نجد ما عندهم شي محدد
يعني اذا انتوا ما تبون او ما تقدرون قولوا لهم واذا هم يبون هم يسوونها
او ممكن انتم تسوون زواج الرجال في استراحه حلوه وخلاص واذا هم يبون يسون زواج لبنتهم الله يكثر خيرهم ويقويهم
ترا في ناس بعد الله يهديهم يشرطون زواج واحسها حركه مو حلوه..... اذا اشرطوا عليكم قولوا ما نقدر يالله تجهيز البيت والمهر والشبكه
واذا اصروا الله يعينكم يا انكم ترضخون لهم او قولوا لهم مادمنا علا البر انتم من طريق واحنا من طريق لان احس الناس اللي مثل كذا عيال فقر وماشافوا خير فبلاهم


عاد انتم ياقلبي عاونوا اخيكم مسكين
يعني المطبخ لو قدرتي انتي وخواتك تساعدونه وتآثثونه له
وهو لا يشتري كل شي مره واحده ملحوق علا خير اهم شي كنب في الصاله وغرفة النوم والالكترونيات والباقي لاحق علا خير

وترا ياقلبي اذا هم ناس اجاويد ماراح يتشرطون وبيساعدون
انا ابوي الله يعطيه الصحه والعافيه هو اللي تكفل بملكتي وبزواجي وجهز لي المطبخ كامل وغرفة الغسيل وما اشترطنا مهر ولا شبه ولا شي...هم جابوا كل شي وحنا ماقلنا لهم شي
ولما قلت لابوي ودي اقول له ياخذني معاه انقي الشبكه ما نابني غير الهواش .... وقال لي انتي تبين تقطعينا وجيهنا عند الناس يجيبون اللي يبون احنا شارين رجال

وربي يوفق اخوك وتطلع عروسكم بنت اجاويد ويسعدهم رب العالمين

مشكورين خواتي ام دانه ودلوعة ابوها .
والله يعين شكلهم يحبون البهرجه بس الله يسهل ويعينا

حنا مثلكم ماحنا راعين شبكة وتلبيس بس صديقاتي وبعض الي حولنا كذا وتراها مهيب بهرجة الموضوع ببساطة اصل كل الناس من معرفتي سلومهم مهر +طقم ينقاله شبكة وشيئ حليل للام وكل على قده احد الماس واحد ذهب وناس تجيب الماس ويطيحون لهم بمرة اخو ماتقدر ولا تعرف الفرق بينه وبين الزركون
الي قالت مرة اخوك مازاد على الناس بشيئ الا ان البنت تبي حفلة ملكة وقصدها هي تسويها اقصد اهلها زي ماقالوا البنات عزيمة صغيرة تصير تعارف ويدخل الرجل يلبسها الشبكة الي هو جايب وتصورون معهم ومنها تعرفون وتكسر الحاجز الي بينكم وذا كله عليهم يعني هم يستضيفونكم مابها مظاهر ولا بهرجة وسعي صدرتس

حنا من نجد ما نعرف شبكة ولا غيرة
والمهر 30 ا الى ال50 مايزيد
بهالوقت وش يلحق علية المسكين ؟
هو الاجار والا الا الاثاث ولا المهر والا الحفل !
بصراحة استغربت وتو اصدق لقالو غلا المهور
بعذرهممممم لقالو الاجنبية وقسم بالله شي يقهر صراحة
اذا الدعوى كذا اجل طقم الماس بخمسين الف !!!!
؟؟
واحد على باب الله شاب توة مقبل على الدنيا يبي الستر والعفاف بينصدم من هالطلبات

والله يوفقة وجميع الشباب ببنات العوايل الطيبة

جزاكم الله خير الي رديتو علي