حال المرض بينه وبيني

<H1>سلام الله ..

قالوا مريض وقلت فيني ولا فيه
ياعزة الله كيف ذاك المرض جاه

كيف الألم يدمي فواده ويدميه
ليت الألم ياناس شخص آترجاه

لاجله بشيل العوق عنّه واراعيه
واصير من بد الخلايق أنا دواه

لانه عضيد الروح والقلب يغليه
ما ودي انه لحظة(ن) يشكي الآه

لو كان بيدي في عيوني أداريه
واتشيله اجفوني وتغمض وتنساه

ياذا المرض عجل دخيلك تعديه
خل التعب لا يهد حيله ويصلاه

ماجور يامن بالنواظر نساويه
يالله عسى من الشر يسلم محياه


أسأل الله العظيم أن يشفي الوالد شفاء لايغادره سقما
كنت في زياره للوالد الله يحفظه ويحميه بالرياض ..الوالد مصاب بالسرطان الله يشفيه ويشفي جميع المسلمين ..كان تعبان مره والمناعه عنده صفر ..جلست عند أهلي 10 أيام وجاء وقت السفر تمنيت أحضن الغالي وأودعه بس للأسف حال المرض بيني وبينه وماقدرت حتى أسلم عليه ..بس طليت من ورى الباب وودعته ..والله حسيت بأن روحي بتطلع من مكانها عشان تحضن الغالي لولا الظروف اللي هو فيها ..
وسافرت وأنا ماسلمت عالغالي ولاحتى حبيت على راسه ..

</H1>


ليت الوجع بعروق
قلبي ولا فيك
وليت التعب غلطان
ساهي ولا جاك
لو الشفا بضلوع
صدري لداويك
واطحن جميع ضلوع
صدري فداياك

"دعواتكم أن الله يشفي أبوي الغالي ويطول بعمره ويحميه من كل شر"

الله من شر
المقادير يحميك
والله يحفظك
يابوي ويرعاك





22 تعليق 622 مشاهدة

شاركي في النقاش

سجلي الدخول لإضافة تعليق.

التعليقات

22
  1. @smt_alalm999

    الله يشفيه ويخليه لكم والله اقشعر جسمي يوم قريت كلماتك المعبره يارب تشفيه ةتخليه لعيونن ترجيه يارب
  2. @lovly_queen

    الله يشفيه ويخفف عنه يااارب
    مافي اغلى من الاب بالكون الله يلطف بحاله وحالكم
  3. @almshtakh_lhno

    الله يشفيه
    ويرجع لكم سالم معافى

    وتسلمين عليه وتضمينه

    انصحك بشئ هذا المرض
    الله يعافينا يخف كثييييييييييير مع الرقيه
    كثفوها عليه
    الله يحفظه لكم

تابعي تجارب أخرى من هذا القسم.