بسم الله الرحمن الرحيم
شلونكم بنات و شلون جاي النعناع وياكم بالبرد هذا
بغيت اسال وحده زبيرية عن شغل العجين شلون تسويه
هذا الطبق طبق زبيري 100%
يعني الزباره معروفين بطبخهم اللذيذ جامعين لذة المطبخ النجدي لانهم نجديين و لذة المطبخ العراقي لان العراق شمالهم
هذا الطبق البيوت الزبيرية ماعادت تسويه لانه مرهق نوعاما و يبي رواقه و فضاوه
مقاديره عندي بس ابي الطريقه مصوره خطوه خطوه
هو ينباع من البيوت الي تسويه والي ما تعرفه احضري عرس زباره و بيدورون فيه
انا رفيجتي زبيرية عشان جذي انهبلت عليه يوم يابته لي
عباره عن طحين كويتي و سمن كلارا ما عندكم منه بالسعودية و وزعفران و ينعجن بحليب و بيض و شكر
مدري اذا فيه بي بي
المهم ينعجن و يكور كور صغيره
و تفرد كل كره و نجيب الحشوه جوز مجروش و شكر خشن لازم خشن
تفرد الكره بالنشابه و نحط عود معلاق خشبي
يعني تييبين المعلاق الخشبي و تطلعين العود منه فهمتو علي
و تلفين طرف العجينه بالعود و تلفينها معاه لين ما تخلص اللفات
ثم تسحبين العود و يطلع شكل العجينه مزركش طبعا تحطين فيه شوية حشوه
مجعد اقصد
و يطلع مثل الحلزونه او الاسواره و يسمونه بعد الدملوج لان الدملوج هو الاسواره باللغه العربيه
و ينقلي بزيت حار او بالفرن
بس مع كوب جاي و حليب يا سلام تنسين اسمج وياه
و الله حلا غير كل الحلا
سمعت بالسعودية يبيعونه الحبه بريال
بس مو كل واحده تضبطه و صعب ينضبط من اول مره
انا سويته لاول مره من سنين طويله و طلع زوين خخخ
هذي الوصفه الي عندي
شغل عجين او الدملوج
3 بيض
1ونص قلاس حليب ( القلاس هو الكوب )
2 ملعقه كبيره بي بي و احسن نوع العلالي
كيلو طحين كويتي يعني الجيس كله
نص قلاس ماي ورد
نص ملعقه كبيره زعفران
2 كوب سمن نباتي او بقري احسن الانواع كلارا بس اعتقد انقطع
اعتقد السمن المخصص للحلويات احلا مدري ما جربت بس اظن
للحشوه ( قلاس جوز مجروش و مثله شكر ( سكر) خشن)
ملاحظه باللف لازم ما تتجاوز اللفات اللفتين عشان لا يصير عجين من داخل
و الجوز نظفوه حبه حبه عشان الصخر الصغير يطلع كله
يا الله كل زبيرية او تعرف واحده زبيرية لا تبخل علينا بالطريقه:)
شاركي في النقاش
سجلي الدخول لإضافة تعليق.
التعليقات
6مواضيع مشابهة
تابعي تجارب أخرى من هذا القسم.