قصة ولادتي بمحمد حبيبي

@alghydaaaaa_1

السلام عليكم ورحمة الله وبركاته


جايه وبحكيلكم قصةولادتي بحمودي الله يخليه

قررت اني احمل بعد ما كمل ولدي الصغير 4 سنوات

وسبحان الله حسيت بالام في المعده ورحت على الدكتوره وسوت لي اشعه تلفزيونيه وقالت عندك التهاب

وقعدت بالسونار تستكشف الرحم وقالت انتي متى ركبتي لولب؟
قلت لها من ثلاث سنوات ونص ... وكشفت عليه بعد 6 اشهر
وسحبت عليه ماعاد كشفت... قالت لي: انه عامل التهاب بجدار الرحم ولازم تشيلينه .. قلت لها: توكلي على بركة الله شيليه وبالفعل يابنات شالته بالقوه حصلته منغرز في الرحم ولاحصلت الخيط اللي تسحبه منه كان داخل معاه

وسبحان الله ماجت الدورة بعده الا شهر فقط وحملت

ما اخفيكم كانت فرحتي بالحمل كبيره انا وزوجي لانه ما اقعد الا سنتين واحمل والمره هذي اشوف نفسي اني تاخرت

مرت شهور الحمل ولله الحمد وعانيت من فقر الدم الشديد ولما دخلت الثامن رحت للدكتوره اللي بتولدني وهي الدكتوره عفاف النوري الله يجزاها بالخير على امانتها وعملها الرائع
ووضحت لي اني من المستحيل اني اولد طبيعي وحددت العمليه بعد اسبوع من دخولي التاسع لان ولاداتي مبكرة 10 ايام بالكثير ويجيني الطلق فقالت مانبغى نخاطر ونستنا يجيك الطلق

وكتبت لي على ابر حديد اخذها مرتين بالاسبوع
وجا يوم الاربعاء دخولي المستشفى قبل العمليه بيوم وسبحان الله على الساعه تقريبا 1 صباحا يبدا معايه الام الطلق لكن محتمله وكانت الدكتوره متابعه معايه بالجوال وخصوصا انه ذاك اليوم ماعندها عياده وطلبت من الممرضات انهم ينزلوني على قسم الولادة الساعه 3 الفجر حتى اكون تحت الملاحظه والطلق يروح ويجي لكن محتمل وغير منتظم

وصليت الفجر وانا انتظر الساعه 9 الصبح موعد العمليه ويمر عليه اخصائي التخدير وسألته عن البنج النصفي فقال في غرفة العمليات تقررين مع الاستشاري وانا مابين مد وجزر بخصوص البنج وخايفه .

جات الساعه 10 صباحا ونقلوني على غرفة العمليات وانا خايفه جدا وقابلتني الدكتوره عفاف وارتحت كثير لما شفتها

وطمنتني ودخلوني الغرفه وكان فيه سسترات وطبيبات سعوديات والله لما شفتهم ارتحت اكثر
وجاني استشاري التخدير وسالته عن النصفي فقال لي انتي حددي ووضح لي انه البنج النصفي اذا ريحتي نفسك مباشرة بعد العمليه وخليتي جسمك بوضع افقي وبدون مخده اليوم كله باذن الله ماراح تتعرضين للصداع اللي يشتكون منه الحريم
وقررت النصفي لاني عانيت من البنج الكامل كحه وبلغم وغيره:06:

واعطاني الابره وحسيت زي الكهرباء في قدمي اليمين وبعدها بدا التنميل في الجزء السفلي كله وقاعد الدكتور يوضح لي انه قاعد يتابع الضغط ويقول لو تبغي تاخذي مخدر اعطيك وشوي الا والدكتوره جايبه حمودي :04:الله يحفظه والله كان احساس رائع جدا الحمد لله على نعمه.
وبعد ماخلصت العمليه جلست ساعه تحت الملاحظه وطلعوني لغرفتي وقابلت زوجي في طريقي للغرفه ويوريني صورة حمودي يارب يسعده والله يابنات اني قعدت ماني مصدقه اني ولدت وابرة الظهر هذي نعمه من الله لاتترددون يالقيصريات فيها.
والحمد لله وعقبال كل حامل بالفرج وكل محرومه من الذريه بذريه صالحه.

50 تعليق 4,004 مشاهدة

0 0

شاركي في النقاش

سجلي الدخول لإضافة تعليق.

التعليقات

47

تابعي تجارب أخرى من هذا القسم.