بنت الخزامى تقترح فكرة ثانية لبنات امريكا

لكل الخوات المتواجدات مرحبا

موضوعي اخصصة للبنات المتواجدات في امريكا
وطبعا اي وحدة من بره امريكا ممكن تشارك

طبعا خواتي اكيد اغلبكم يدرس او عنده عيال
والدارسة او الاطفال او الانثين مع بعض معاناة كبيرة في امريكا بسبب ان اغلبنا ماعنده خدم او اهل

ندخل في الموضوع

كلنا جلسنا فترة طويلة واحنا نجمع خلطات من المنتدى والحمدلله التفاعل واضح في الموضوع المثبت ..

اقتراحي الحين

اننا نتعاون ونسوي لنا جدول يومي للعناية سواء عاد بالجسم او البشرة او الشعر
يعني انا عن نفسي كنت مفكره ابدا اسوي لي جدول كل يوم بيومه وايش اسوي فيه حسب وقتي وفراغي
بس بعد مافكرت بالفكرة قلت لازم اشوف خواتي اللي في امريكا يمكن في كم وحدة تبي تشاركني عشان كل وحدة تشجع الثانية وتساعد خصوصا انه الصيف جاي واغلبنا اما راح ينزل لبلدة في زيارة او ان اهله راح يزورونه , فحلو لو كانت طلتنا حلوة وجديده والا لا؟

عموما باب المناقشة والمشاركة والاقتراحات والاضافات مفتوح

وياليت نتفاعل سواء عشان نسوي جدول مناسب لاغلب اللي بيشاركون
عشان يمدينا نبدا فيه
واقتراحا انا ممكن احد تاريخ اللي هو نص الشهر الجاري 15/5/2003م
بس طبعا كل شئ قابل للتغير والتعديل

وانا مستعدة بعد مانرتب ونجمع كل الخلطات والطرق اللي تناسبنا احطها وارتبها بجدول سهل وانزله بالمنتدى

يالله بنات همتكم معي عشان نساعد ونشجع بعض
اختكم بنت الخزامى

21 تعليق 1,962 مشاهدة

شاركي في النقاش

سجلي الدخول لإضافة تعليق.

التعليقات

17
  1. @alghrbh_krbh

    الله الله ... انا معاكى بس مشكلتى ما قد صلح معى شى من ذا الخلطات ... وعشان اكون صريحه معاك انا ما عندى صبر للنتائج ... عشان كذا اذا حبيت يتغير وجهى ... رحت لصالون وطلبت منهم قناع ... ودفعت ما قيمته 60 دولار ... ويجلس وجهك يبرق اسبوع ... ثم يرجع مثل ما كان

    بس من جد ودنا بوحده تنظم لنا مثل هذى الاشياء ... خاصه مثل ما قلتى بانزل للزياره ... ودى بطله مختلفه

    يالله يا بنات خل نشجع اختنا بنت الخزامى ....

    تصوووويت ... موافقه

    لكن تعالى ... الحين هذى الفكره الثانيه ... طيب وش كانت الفكره الاولى اصلا ؟؟؟
  2. والله فكره حلوه
    ابحاول اشارك معكم بس مشكلتي في الوقت لاني مشغوله مع عيالي وفي الجامعه
    ولا في احد يساعدني بس الله يعينا في هالغربه
  3. @bnt_alkhzam_1

    صاحبة الموضوع
    الغربة كربه
    اول شئ شكرا على المشاركة
    ثاني شئ انا مثلك عجووووولة وماصبر لين اشوف النتايج عشان كذا حطيت الموضوع عشان كل وحدة تشجع الثانية
    ثالث شئ الفكرة الاولى كانت تخصيص موضوع للمغتربات ووين يلقون مقادير الخلطات في امريكا...اطلعي شوي فوق في المنتدى بتلاقين الموضوع مثبت :)
    ***********************************
    pumpkin عيوني والله اني مقدرة المشاغل اللي انتي فيها وهي اللي اغلبنا يعاني منها للاسف لكن الواحد ماله الا الصبر ... وياليت نحاول نتشارك .. ومشكورة على الرد عيوني
    **********************************
    alamal300 الف شكر عيوني على المشاركة

    اخر شئ بنات ممكن اول شئ نحاول نتفق على ايش الايام اللي تكون مناسبة اكثر لعمل البرنامج اليومي الاطول
    يعني مثلا متى يكون زوجك اطول فترة برة البيت . في هذا اليوم ممكن نخلي الجدول اليومي مليان ونستغله
    وفي الايام اللي يكون فيها متواجد ممكن نسوي جدول سهل ولا يكون ملاحظ من ابو العيال خصوصا لما يكون مشغول ويذاكر في مكتبه :)

    ايه في شئ ثاني
    ابي كل وحدة ممكن تشارك بخلطة جربتها ومقاديرها متوفرة في امريكا بسهولة
    عشان نجمع اكبر عدد ممكن من الوصفات المجربة
    هذا بالنسبة للوصفات

    وابي اضيف شئ ثاني
    ودنا ندخل ببرنامجنا التجميلي الخارجي
    برنامج تجميلي داخلي
    وللللللللللللللازم يكووووون سهههههل ومرن
    مثلا: اكل كم حبة فراولة يوميا او علبة زبادي او تفاحة .... الخ
    يعني لازم ندخل شئ صحي مع برنامج الخلطات عشان تكون النتايج مرضية

    طبعا مثل ماقلت في البداية انا احاول اجتهد من عندي
    وباب الحوار والنقاش مفتوح

    ياليت اسمع تعليقاتكم وردودكم على استفساراتي واقتراحاتي

    باي

تابعي تجارب أخرى من هذا القسم.