عسى الله يشفيك
أدخل أبي العنايه بعد حادث مروري وهذا ماجادت به قريحتي..
*
*
لاباس يا بوي عسى الله يشافيك
وتقوم من سوء المرض بالسلامة
مأجور بإذن الله وتكثر حسانيك
عساك دايم ماتشوف الندامة
الله يطولي بعمرك ويبقيك
ياوالدٍ بارن بشيبانه عالي مقامة
على دروب الخير دايم مساعيك
على الهدى والحق والإستقامة
يارأفة اليتمان ياعز لأخاويك
من رحمته صارت له علامه
أنت الفخر ليّ الفخر يوم أسميك
ياللي بدروب العز مابك غشامة
ويرتاح بالي كل ماجيت أقهويك
ساعة عصر مابها من الهرج لامه
خوفي بحقك إني مقصرٍة فيك
وأمي لها بالقلب يا بوي هامة
واللي يعـّق بوالدينه تهاليك
عند البشر منبوذ قل أحترامه
ويلقى الجزاء جنس العمل مافيه تشكيك
في دنياه وإلى يوم القيامة
وختامها يارب عبدك يناجيك
في دعوتة وآخر كلامه مرامه
تجعل لي في حسن العمل شي يرضيك
ويقوم أبوي من طيحته بالسلامه
(إنا لله وإنا إليه راجعون )أنتقلت الروح إلى بارئها إنالله وإنا إليه راجعون
مرحوم يابويه عسى الله يعطيك
في جنة الفردوس كرسَ عالي مقامه
الله يعوضنا بعمرك ويجازيك
على فعولك الطيبه مالها نهايه
على دروب الخير نسعى مساعيك
على الهدى والحق والإستقامه
يبكون يتاماك والكل يبكيك
أبويه وينك عزوتي ياهنايه
يبكون وكلنا والله نبكيك
الجار والدار وكل الجماعه
آه ياقهوة العصر مين أقهويك
راح اللي له الدله تبهر ونعنَّا له
راح أبويه وينك أنا أناديك
مامن مجيب إلا صدى صوتن يردد معايه
أبوي يابوي خوفي مقصره فيك
وأمي لها بالقلب يابوي هامه
صبر وإحتساب وعينها بالخفاء تبكيك
تدعيلك بالرحمة ولعياله بالهداية
تفككت حروفي من أحزاني تفكيك
وين اللي أسمعه حروفي ويردد معايه
بنيتي يا بنيتي شاعرة ما فيه تشكيك
يرفع همتي بتوجيهاته واهتمامه
ياخذعن خاطري وإلا الشعر مالي فيه مساليك
تجبر بخاطره جنة يوم القيامه
أبويه يا بويه كيف بالحرف أعزيك
حروفي تشتت وقرطاسي واعزتاله
الله يبيحك كل ماحل طاريك
ويسكنك جنة عاليً مقامه
الكل جاني يعزي ويهل الدمع لطاريك
الجد والعم والخال وكل الجماعه
جدي ياجدي لاتهل الدمع والله نغليك
الله يطولي بعمرك بصحة وطاعه
عساك بالجنه يابويه تقطف ثمارها بأياديك
والحور والولدان جنبك وحواليك
عسى العوض في غيبت لياليك
تربط على قلبي ولا تلحقني ملامه
وختامها يارب عبدك الضعيف يناجيك
في دعوته وآخر كلامه مرامه
تجعل لي في حسن العمل شي يرضيك
وترحم أبوي وتفرحه يوم القيامه
*
*
إلى جنة الخلد ياوالدي
أم الغاليات (كما كنت تناديني)
