افزعن لي يالقصيميات بسرعه
متابعة النقاش، صفحة 2
شاركي في النقاش
سجلي الدخول لإضافة تعليق.
التعليقات
11نعمه من ربي اول مره اسمع بيه اش يطلع
المحلى اللي نعرفه بالرياض هو:
يكون عندك تمر بس تمر صاحي يعني زين ماينفع اي تمر ويكون فيه حلى مو ماصخ او محمض
يعني (تمر الخلاص) اللي يلمع مرة حلو وكثري قد ماكثرتي تمر قد ماصار حلو
وشيلي منه الفصم والتاج حق التمر
بهالوقت
تقومين تجيبين قدر كبير وتحطين بنصه مويه (على حسب الكميه اللي بتسوينها)
اذا كانت حافظة كبيرة
خذي قدر كبير حق الرز للعزايم وحطي بنصه مويه
واذا كان قدرك وسط عبيه كله مويه
وخلي الموية تغلي
لما تغلي
تحطين التمر بالقدر وتتركينه يسلق مررررررررررة
ياخذ وقت تقريبا ساعتين او ساعه ونص
بس تحركينه ماتتركينه يحترق بالقاع
بتعرفين انه استوى
اذا رفعتي الملعقه بتلقين التمر انهرس والموية صارت بنيه
قومي حركي زين مرة او بالمضرب حق البيض لين خلاص ينمزج التمر بالموية ويصير زي الشوربة
بعدها يصير عندك كيس الدقيق البر
صيري بيدك اليسار تاخذين من البر وترشين في القدر وبيدك اليمين تحركين عشان مايكلكع (وخلي ايدك تشتغل بقووة)
وكل ماذابت الرشة حقت البر ترشين ثاني
لين يثقل المحلى ويصير ثخنه اللي تبينه
(فيه ناس تحبه سائل مررة وناس تحبه ثخن)
انتي خلي ثخنه وسط
ولما خلاص يعجبك ثخنه
قومي جيبي اصبع زبده وحطيها بالقدر وحركي القدر زين شوي
بعدين جيبي حديدة اللي تنحط تحت القدر
وحطيها على نار عاليه لين تصير حارة بعدين قصري على النار خليها هاديه وقومي غطي القدر بقصدير بعدين بالغطاء حق القدر وارفعيه على الحديده واتركيه ساعه على نار هاديه
تكونين حاطه ربع اصبع زبدة ذايب على جنب(لوجه الحافظة)
بعدين افتشي القصدير وانتبهي ليدك من البخار
وحركيه زين عشان باقي الزبدة اللي ذابت قبل
وصبيه بالحافظه وواسيه بالملعقه وصبي فوقه ربع اصبع الزبدة الذايبه ووزعيها على الوجة زين(عشان لما تودينها تصير تلمع مو ناشفه)
وخلي بالوسط زي الحفرة شوي كثري فيها شوي الزبدة بس شوي مو تغرقينها
وبعدين جيبي الفلفل الاسود ورشيها بس خفيف
انا مااحبها بس ريحته لما تفتشين الحافظة مع الزبدة تبييض الوجة
وغطي الحافظة بغطاها
وبس وصحه وعافيه يارب
وان شاء الله يبيض وجهك- رفع
- لالالالالا
القصيم يسون حنيني فقط
المحلى الرياض والسدير والي حولها - طلبت مساعده قمتو اختلفتو حريم ههههه
- يالبى قلب القصمان وسناعتهم اممممممممممممموه على فكرة القصمان عندهم الفريك والحنيني والقشد لكن المحلى قليل يصلحونه.
مواضيع مشابهة
تابعي تجارب أخرى من هذا القسم.