مذكرات تايلند ...( مجرد فضفضة )

مدري هو أنا انبسطت وإلا اضحك على نفسي... 
كان ودي أسافر وانبسط زي ما كل الناس تسافر وتنبسط بس مدري أنا وش الحظ اللي معايا صحيح اني كنت كل يوم اطلع بس تدرون طلعتي كيف كانت  
اصحى الصبح اقوم البس واللبس زوجي ونطلع نفطر تحت بالفندق وبعدين نطلع نروح إي مكان كنا مخططين اقصد كنت مخططه له لانه أنا اللي كنت اقوله والا لو عليه كان قعدنا بالفندق لين مانرجع
المهم نرجع لموضوعنا..... وصلنا المكان اللي بغيناه والله العظيم اكثر من ساعتين مانقعد ونرجع الفندق الظهر وماعد نطلع الا اليوم الثاني نفس الوقت الا في حالة نطلع نتغدا او نتعشاء وكله جوا الفندق يعني ياليت برا وعلى هذي الحاله كل يووووووووم ويقولوا لي انبسطي أنا بالله كيف انبسط مادام مااطلع وحتى لو اطلع مااخذ راحتي بالطلعه
وللمعلومه لمانطلع نقعد ساكتين مانتكلم اللي يشوفنا متخاصمين والامانعرف بعض واغلب الاحيان لما نطلع زوجي يمشي وانا الحقه يعني مانمشي زي العالم جنب بعض وبشويش واجي أنا ومسك يده 
لا وبعد نمشي بسرررررعه اللي يشوفنا مدري مين يلحق ورانا
وكل مانفسي اطلع مكان يطلع لي بمليون حجه ويجلس على طول تعبان ومالي خلق يعني مااحسه يبغى ينبسط حتى التصوير مايبغى يتصور لا معايا ولا لحاله انا مدري وش يحس فيه وكل مااحاول اغير من الجو اللي إحنا فيه يحطمني كل ماامزح معاه يعصب ويزعل بالله الحين وقت زعل ويجلس يرمي كلام مال امه الداعي وأسكت بس عشان مابغى اخسر سفرتي بحساسيتي الزايده لانها كلها اسبوع
واذا قعدنا بالفندق يجلس عا الاي باد وعالنت ومايتكلم ابد
واذا شغلت التلفزيون للاسف ماافهم شي لانها كلها قنوات انجليزيه هذا إحنا مسافرين بكرا المفروض نطلع ونبسط ونسهر بحكم انه اخر يوم بس ياحسرتي عند مين هذا إحنا قاعدين بالفندق منتظرين موعد الطياره لبكرا
ياربي لك الحمد بس .
صحيح اني غيرت جو بس احس لو سافرت مع احد ثاني كان احسن مو شرط يكون جنس آخر المهم واحد قريب من شخصيتي
يعني يعرف يمزح يسولف يحب يجرب الأشياء اللي ماجربها يحب يطلع يحب يستغل كل لحظه حلوه بحياته بس للأسف اني سافرت مع انسان عكسي تماماً أنا ادري انه غصب عنه وهذي هي طبيعته بس كان نفسي تتغير طبيعته اقل شي اسبوع واحد بحكم ان إحنا خسرنا فلوس وتذاكر ودنيا اقل شي نطلع منها بشي..
أنا مدري زوجي وش يحس فيه معقوله هو كذا مبسوط والا بس قصده ينكد عليا انسان طبيعته مختلفه تماماً عن باقي الناس على طول هو الصح واحنا الغلط مايحب يعتذر حتى لو كان غلطان مايحب يغير جو وينبسط على طول تعبان حتى لو مافيه شي صحيح انه عنده السكر بس أنا اعرف ناس كثير عندهم السكر ومايشكو زي مايشكي زوجي 
الله يستر لا ربي يبلاه بمرض من جد ومايقدر يصح منه..
اشياء كثيره تضايقني منه بس الحين مايخطر لي غير اللي ذكرتهم لك
أنا مدري ليش اخاطب انتي يمكن أحسك تفهمني اكثر مادري ليه مااحب اشكي وافضفض الا لك انتي ولو اني ماعرفك ولا اعرف شي عنك
شكرًا لك
:(