شاركي في النقاش

سجلي الدخول لإضافة تعليق.

التعليقات

29

  3. @tuta_1

    صاحبة الموضوع

    المشاركة المقتبسة غير متاحة.

    الله يسعدكم جميعا و يسلمكم, تشرفت بمروركم بموضوعي







    بوادي <<<< اسعدتني اضافتك, سألت لك ليه سنة بنروح و سنة لأ, جاوبت امي انه في سنة بتكون عجمة الزيتون كبيرة فبيعرفوا انه الزيت بيكون ممتاز و كمية لا بأس فيها, و سنة بتكون عجمة الزيتون صغيرة يمكن بسبب قلة الامطار فبيعرفوا انه يلا يدوب الزتونات يجيبوا تنكه او تنكة و نص فمش مستاهلة, لهيك بتروح قريبتنا في هالسنة بتجد زتونات العيلة كلها و بتاخذ الزيت لنفسها, هي مش بحاجة بس بتحب شغلات الفلاحة ماشية فيها مجرى الدم بالعرق.
    اما انه يشتغلوا كلهم بارض وحدة, يمكن ايام زمان بال1800 ايام ما كان عدد الاشخاص قليل و الارض كبيرة, فكانوا يحتاجوا يساعدوا بعض, و بتعرفي كلهم ولاد عمام فما كانت تفرق, اما بعد ال1900 صارت تقسيمات و كل عيله بتعرف ايا قطعة ارض الها (و عنا حتى بالزيتونة مقسمين) اذكر انه لما كنا نروح على الارض و نخلص الزيتونات اللي عنا, نروح على ارض ثانية و ممنوع نلمس اشي فيها, بس زيتونة وحدة اللي بنقدر نجدها (نفرطها بلغتكم) لانها باسم الوالد. يعني كل واحد عارف شغله و ما بيقرب على شغل الثاني, الا اذا مساعدة بس.


    ام محمد <<< اسعدتني اضافتك و استرسال ذكرياتك معانا, كنا اذا ضربنا الاغصان يصرخ فينا الوالد من بعيد و يا ويل ويله اللي ضرب انه يضل قاعد مطرحة, لا بيروح بيتخبى ليهدى الوالد, كان اذا انكسر غصن يجن جنونه و يقعد يربط فيه, مرة من المرات قطع قميصه و ربط غصن من الاغصان.. يرحم ايام زمان...

    هوم <<<< شكرا يا عزيزتي على مشاركتك لنا بذكرياتك, بتعرفي احلى شي احلى شي كانت المقلوبة جنب السنسلة (ترجمة سنسلة سور مصنوع من احجار مرتبة فوق بعض يعود تاريخها الى 150 سنة او اكثر), كنت اقعد و كل شوي اتلفت خايفة تطلع لي حية :hahaha:

    و اذا على اللبس, كنا نلبس ملابس قديمة ما بتنفع للطلعة, بس ازياء و ما ازياء ما كان يهم اهلي, لانه اللي حوالينا كلهم بيكونوا خايفين على بعض, نادر جدا تشوفي حدا يبصبص على بنت الثاني, يمكن انا عمري ما انتبهت, بس ما عمري سمعت حدا جاب هالسيرة, ما كنت اسمع غير كابين مية نار على وحدة حاطة مكياج و لا وحدة لابسة قصير (و هدول برام الله يعني بعيد عن بدلنا), كثير شعبنا زمان بيخافوا على عرض بعض, وحدة من العيلة من بعيد شفاها ابن عمها لامي بتأشر لشب قام بهدلها بنص الشارع, صرخت فيه انت شو دخلك قام ضربها هداك الكف ادورها فيه, و لما اشتكت لاهلها عنه قالوا: برافوا عليه رجال بيحامي على عرضنا...

    بتعرفوا الصيفية نزلت و كل مرة بنزل الدنيا متغيره, لقيت الزيتونات صعب نوصلهم بسبب الطرق الجديدة اللي فتحوها و بسبب المحسوم, يعني ان حبيت اروح بسهولة زي زمان ما بقدر, و لقيت انه مش باقي بالارض غير زتوناتنا و زتونات جارنا اما البقية راحت كلها, ارض واسعة كلها زتون ما بقى فيها غير اكمن سرب, و لما سألت عن السبب اجابني والدي: الكبار ماتوا و الصغار قسموا و باعوا و الارض ضاعت يا خسارة:44:

    اما عن اني عاشرت الطابون, لا و الله الطابون اللي بالصور ما حصل لي الشرف, عند جدي بعد ما اتوفوا اولاده فيه منع الطابون و صارت ستي تخبز عند الناس و بعدها جاب لها واحد حديد بحطب و ممنوع يكون بغرف, الا بتستعمله صيف او شتاء بالهواء الطلق, هاد اللي نفسه امي استعملته, و ستي ام امي كانت على ابو الكهرباء (هاي عاشرتها و توفت جديد من 11 سنة يمكن. (جدي ابو والدي توفى و انا صغيره مش واعية و ام والدي توفت و انا 3 شهور و عمات الوالد و اخوانه توفوا و هو لسه باللفة <<< يعني زمن مضى والدي هلأ 74... الله يرحمهم جميعا و يرحم امواتكم و اموات المسلمين و يرحم والد زوزو و يسكنهم جميعا في فسيح جنانه ان شاء الله.

تابعي تجارب أخرى من هذا القسم.