بسم الله الرحمن الرحيم
السلام عليكم ورحمة الله وبركاته
عدت اليكم انا ملووووكه بأشهى الاطباق
راجيةً من الله أن تستفيدوا منها وتفيدون غيركم
بسم الله نبدأ
وطبعا انا ما اقدر اني انزل اطباقي بدون سالفه اقولها لكم
اول شي مبرووووووك الي نزل لهم حافز
وعقبال الي مانزلهم ينزلهم الشهر الجاي
الله لو تشوفون امي يوم سمعت انهم فتحو العمر
قالت يلا بسرعه سجلي لي علشان اخذ الفين زيك
ابوي سمعها قالها اذا هم ماعطوك الالفين انا اعطيك هيا ياقمري
انا واختي فقعنا ضحك على كلمة قمري هههههههه ياحلو غزل الشياب
المهم مو هنا السالفه
السالفه اني البارح عزمت خواتي برا بمطعم
وانا اقول لهم اطلبو الي نفسكم فيه
اول يوم كنت اعزمهم ما اطلب الا منيو واحد علشان انا اطلب هم مافي وحده تتجرأ تطلب شي خخخخخ كني اعزمهم وانا متحسفه على الفلوس
بس البارح عندي الفين من قدي
وبعد ابشركم اختي ارسلت لي 300 ريال قالت ترى هذي فلوس الجمعيه اسحبيها وعطيها امي
يوم درى ابوي قال هاتي البطاقه بسحب الـ 300 لامك قلت لالالا اسفه ما اعطي بطاقتي احد خلاص حط من عندك وانا بعدين اذا طلعت اعطيك <اجل لو تعينت وش اسوي .؟ من الحين شريره خخخخخخخخ
المهم سحبت عليهم واخذت الفلوس خخخخخخخخ
المهم عزمت خواتي وقلت لهم اطلبو الي تبوووون لا تستحون تراها مره وحده مو دايم بعطيكم الضوء الاخضر
وطلبنا واكلنا وشربنا وحلينا ويوم جا الحساب واقولهم شبكه يعنني كااااااااااااااش ما اشيل فلوس معي ماغير بالصرافه
قال الشبكه خربانه قلت كيف خربانه قال لازم تدفعي كاش قلت ماعندي
قال خلاص لاتدفعي خليها للمره الجايه
خفت اني ما اجي وبعدين يدعون علي
دقيت على اخوي الكبير
قلت تعال ادفع عنا الشبكه خربانه بعدين لا طلعت اسحب واعطيك <مدري شفيني هالجمله صارت على لساني
معقوله بداية بخل وشح خخخخخخخخخخ
المهم المسكين دفع 308 ريال
ويوم ركبنا السياره معاه كل مامرينا من عند صرافه اقول يارب ينسى ولا يمر هههههههههههههه والحمدلله ماطلب الفلوس يعني العزيمه مجانا ماخسرت شي
وانتهت قصتنا لهذا اليوم
يلا خلاص عطيتكم وجه نبدأ باطباقنا
هذي السفره الي بحطها
وحنا بينبع ببيت اختي بس بنات زوجها مسافر الصين
وجلس شهر وانا جلست عندها وبنات عمتي بعد جلسو معانا
ومررررره كانت رووووعه ذيك الايام ليتها ترجع
المهم قلت لهم بسوي لكم اكل حلو
قالت اختي ترى المطبخ مافيه اغراض لا تحسبينه بيتكم <ماشاءالله
وادور بالثلاجه والدولاب حق المعلبات وهالشغلات لقيت اشياء طلعتها مدري ليش
قلت اطلعها وبعدين اشوف وش اسوي فيها
وهذي الي طلعت معي بعد طلوع الروح طبعا وبعد تفكيررر متعب لان الاغراض مره قليل وتحير الواحد
Swr1
هذي السفره
عباره عن بطاطس بكريمة الخفق واللحم المفروم .. تبوله .. صفيحة لحم ..بطاطس بالحمر ..رز مع لحم في الفرن ..منتو كذاب ..فتة باذنجان
واليكم الاطباق بالتفصيل
Swr2
هذي صينية بطاطس بالكريمه وداخلها لحم مفروم
تسلقي البطاطس وتقشريها وتهرسيها وهي حاره في فترة سلق البطاطس تحطي زيت بقدر انا حطيت زبده احسها اطعم وتخليه يسخن بعدين تحطي الثوم المفروم وتقلبي شوي بعدين تحطي الكريمه مع مكعب ماجي وفلفل وكمون واريقانو
تخليها تغلي وتحطيها على البطاطس
وتحريكها
بعدين تحطي نصفها بصينية الفرن وتحطي اللحم المفروم
المطهو على طريقتك <تراني في الفصحى توب
وتحطي النصف الثاني فوق اللحم وتضبطيها من فوق وتدخليها الفرن حتى تتحمر ماتحتاج شي من فوق لان فيها كريمه وزبده
Swr3
بطاطس مقلي بالحمر
تاخذي البطاطسه وتقطعيها بهذا الشكل الي في الصوره وتسوي حمر
طريقته تنقعيه في مويه ساخنه لمدة ربع ساعه بعدين تصفيه مع التفتيت باليد علشان يطلع كل الخلاصه
بعدين تحطين كمووون وفلفل امي تسوي منه كميه لا بأس بها وتحطها بالثلاجه بس تحط معاه كراث وطماطم كلها تحطها مع الحمر بالخلاط وتنطحن وتملح بس شوي لان الحمر حامض انتبهي وتحطي كمون وفلفل وفي علبه وع الثلاجه
انا استخدمه للدجاج عند الطبخ يعطي الدجاج طعم واووو وبعد للسمك ولورق العنب
Swr4
تبوله
التبوله معروفه
بقدونس ونعناع وبصل وطماطم بسسس لا تزودون عليها أي شي ماتصير تبوله
والدرسنق تبعها زيت زيتون وملح وليمووون تحطينه عند التقديم هو والطماطم
Swr5
فتة باذنجان بدون بطاطس لان البطاطس خلص وصوص اللبن على جنب علشان خفت انها تبقى وبعدين مانقدر نسخنها
تقطعي الباذنجان مكعبات
وتقليه وتقطعي الخبز مكعبات وتقليه
بعدين تكشني بصل وزيت واذا ذبل <ملاحظه اذا تبين البصل يذبل بسرعه رشي عليه ملح وهو في الزيت
بعد كذا تحطين عليه طماطم مقطعه مكعبات
وتحركي لحد ماتذبل بعدين مكعب ماجي وفلفل وكمون ومعجون طماطم ملعقه صغيره وشششوي مويه
وتخليها فقط تتسبك وتحطي الباذنجان وتحركي وتخلي فيه صوص شوي
بعدين تحط الخبز في صحن التقديم وتحطي فوقه الباذنجان واذا ودك تحطي اللبن حطيه وزينيه بعصاج اللحم المفروم والمكسرات والبقدونس
Swr6
لحم في الفرن مع ليمون وطماطم ورز
لحم بعظم او لحم اوصال
تبلته بـ ملح , فلفل , كمون , عصرة ليموون , ملعقه صغيره خل ,بقدونس مفروم , شبث مفروم ,
بعدين تخليها كم ساعه بالثلاجه
بعدين تحطيها بقصدير وتحطي عليها ليمون وطماطم واذا تبين بصل بعد وتقفلينها باحكااااااام وتخلينها بالفرن حتى تستوي
ويمي يمي
الرز طريقتي فيه نزلتها في ردود كثير
زيت بقدر مع فلفل , قرفه , عويدي ,هيل , مستكه , كلها صحيحه يعني مو مطحونه
بعدين تقلبين وبعدين تحطين الرز الرز طبعا يكون ممنقوع ومغسل ومصفى جيدا علشان الزيت مايطير عليك
تقلبين ثلاث دقايق وتحطين مكعب ماجي وتقلبين وبعدين تحطين مويه حاره وتخلينها لحد الرز لا تزودين عليه
وخليه على نار هاديه حتى يستوي لا تخافين راح يستوي من البخار بعد
بعدين حطي عليه كركم ونعناع ناشف وقلبي بعدين رشي عليه ذرة صفار زعفران ويمكنك الاستغناء عنه
Swr7
منتو بالدجاج والمنتو ما احب اسويه الا برقاق السنبله يطلع الذ واحلى بس مالقيت في الفريزر الا هالرقاق طبعا عجبهم بس انا مايعجبني
طريقته سوي لحم او دجاج الي يعجبك
بس الدجاج عجب كثير
طريقتي هي
تسلقين صدور الدجاج او دجاجه كامله بعدين تاخذين اللحم حقها وتفرمينه نصف فرمه مو تطحنينه انتبهي
يعني تخلينه زي الخيوط
بعدين تاخذين بصل مقطع صغيررر وتحطينه مع زيت بقدر ووتخلينه حتى يذبل
بعدين تحطين الثوم وتقلبين وتحطينه على الدجاج
بعدين تحطين جزر مبشور وبقدونس مفروم وشبث مفروم
ونعناع مفروم
وتقلبين وملح , فلفل كمون ,كزبره ناشفه ,رشة قرفه
وتقلبين حتى تختلط المكونات ببعض
بعدين تبدين تحشين رقاق السمبوسه على شكل رول
وترصينها في صنينة الفرن جنب بعض لصقيهم مررره في بعض
بعدين حطي في الخلاط كاسه صغيره جبنه كرافت الكاسه الصغيره كلها اذا بتسوي كيس الرقاق كله فهمتي ؟
وثلاث كاسات مويه حااااره وملعقه سمنه انا استخدم سمنة مازولا , ومكعب ماجي وفلفل وكمون وتخلطينها بالخلاط وتحطينها على المنتو شوي شوي بعدين تلفين الصينيه كلها بالقصدير
وتحطينها في الفرن لمدة ساعه
وتطلعينها بتكون شربت كل السائل
تااااااااااااااااااااااااااااااااااااابع
شاركي في النقاش
سجلي الدخول لإضافة تعليق.
التعليقات
222- هذا بوفيه ثاني سويته لجمعة حريم بس خسااااااااره ماصورت البوفيه كامل كنت مررره مشغوله بالقهوه والتقديمات واخواتي فاااااااااااااااااااااااااغرات ماطلعو الا يوم قرب العشا
اصلا مابدو بتجهزون الا يوم جو الحريم
بس الحمدلله صورت طبق طبق
واليكم الصوور
Swr8
توست بالتونه
اول شي تنزعين الاطراف وتفردينها بالنشابه
بعدين تسوين الحشوه
تونه ومايونيز وخردل ومخلل خيار مقطع صغيرررر
وتحشين التوست وتلفينه رول وتقفلينه باعواد اسنان وتحطين زيتون محشي
Swr9
سلطة شاورما
تسوين دجاج طريقتي طبعا افرزن الدجاج علشان ما احوس
اقطع الدجاج صغير مرررره واتبله في صويا صوص وكريمة البلسمك
ودبس الرمان وزبادي
واحط البهارات المعروفه فلفل كمون قرفه كزبره ناشفه ما احط ملح الا بعدين علشان في دبس الرمان والبلسمك
واخليها يوم كامل
اكشن بصل وثوم بعدين احط الدجاج عليه
واغطيه حتى يستوي وقبل السواء نذوق المرقه حقته تحتاج ملح ولا لا
وتخلين حتى مويته تنشف ويستوي
الطبقه الاولى بقدونس مفروم
الطبقه الثانيه بصل ابيض مقطع شرايح مرشوش عليه سماق
الطبقه الثالثه الدجاج الطبقه الرابعه بطاطس مقطع شرايح ومقلي
الطبقه الخامسه الصوص وهو زبادي وطحينه ومايونيز وثوم مهروس وملح
الطبقه السادسه خبز مقطع مربعات ومقلي
وتمعتي بالطعم الذييييييييييييييذ
ترى هذي وصفه موجوده في اطباق النخبه بس كتبتها علشان البنات الي ماعندهم هالكتاب
Swr10
تبوووله كتبت طريقتها
Swr11
ورق عنب
طبعا طريقة الحشوه
رز مصري
بقدونس , بصل ,طماطم , نعناع ,
والتتبليه
زيت زيتون , ملح , دبس رمان ,فلفل , كمون , دقه ,ملعقه معجون طماطم
تخلطين الصوص وتقطعين الخضار صغيررر وتغسلين الرز وتصفينه زيييييين
وتحطينها على الصوص وتحركينها حتى تختلط المكونات ببعض تلفين ورق العنب
وعند الطبخ تحطين في القاع بطاطس مقطع حلقات
وترصين ورق العنب بعدين تحطين في وعاء مويه حاره ومكعب ماجي وملح ليمون وزيت زيون ودبس رمان وعصير ليمون وتحطينه على ورق العنب وتحطين عليه غطاء اصغر من القدر وتحطين عليه ثقل وتخلينه يطبخ ساعه
واذا استوى خليه مغطى لا تشيلين الغطا حتى يبرد بعدين صفيه في صحن وحطيه بالثلاجه حتى يبرد تماااااااااما
Swr12
سلطة التونه بالبطاطس
سويتها في قالب على شكل طبقات
سويت تونه بخردل ومايونيز
البطاطس سلقتها وهرستها وحطيت عليها كريمة خفق مع مكعب ماجي وزبده على النار
حطيت اول شي النايلون حق الاكل بطنت فيه القالب
وحطيت التونه اول شي علشان لما اقلب تكون هي الي بالوجه
وحطيت شرايح مخلل خيار
بعدين حطيت البطاطس
وخليتها بالثلاجه لحين التقديم
Swr13
سلطة يونانيه
سهله جدا وشكلها حلو
نفسسس طريقة المطاعم بالضبط
خس امريكي مقطع كبار بامكانك تقطعينه بيدك
وطماطم كرزيه , وخيار مقطع كبير
نخلطها ونسوي الدرسنق تبعها زيت زيتون وملح وعصير ليمون واوريقانو تحطينه على السلطه عند التقديم والطماطم بس تقطعيها نصفين لانها صغيره وتحطين عليها زيتون شرايح
وجبنه مكعبات على الوجه
وترشين عليها اوريقانو
Swr14
مقبلات البرنقلز
برنقلز بنكهة الباربكيو
الحشوه باذنجان مقطع مكعبات صغيره جدا ومقليه
ذره مسلوقه
الصوص زيت زيتون وليمون وشطه كرستال الحمرا وملح شوي رشه فقط
تحطين عليها الباذنجان والذره وتخلطين وتحطين بالملعقه على كل حبه
Swr15
ميني سبموسه هنديه سويتها صغيره ارتب واحلى
العجينه : دقيق مويه وملح تعجيني حتى تتكون لديكي عجينه لاتلتصق باليد
وتخلينها ترتاح
تسوينا لحشوه بطاطس مسلوق ومهروس
وجزر مسلوق ومهروس
وبازاليا مسلوقه ومهروسه
تحطينها فوق بعض
وتكشني بصل وثوم وتحطينها عليها وتحركين
وتحطين كركم , فلفل , كمون , ملح ,كزبره ناشفه , شوي كاري ,وتخلطين كل المكونات ببعض
وتفردين العجينه وتقطعينها بالطريقه الي تبين وتحشين
ملاحظه / لازم تكون الخضار سااااخنه علشان تقدر تستوعب التوابل الي تنحط لها وتمتصها
اقليها وتمتعتي بالطعم
Swr16
زربيان بس سويته طبقات
بعدين بنزل طريقته بالتفصيل
Swr17
قوارب الهليبينووو
تقطعينها من النص وتبعدين البذور وتحطينها بمويه بارده
بعدين تسوينا لحشوه لحم مفروم بطريقتك
انا سلقت اللحم اول شي بعدين غسلته وفتته وماصار في تكتلات
بعدين كشنت بصل وثوم وحطيت اللحم وتبلته ملح فلفل كمون قرفه كزبره ناشفه
وملعقه صغيره معجون طماطم علشان اخليها تمسك
وسويت بشاميل
كاس دقيق ونص كاس زيت وخمس كاسات مويه وخمس ملاعق حليب
تحطين الزيت بعدين الدقيق بعدين الحليب المخلوط مع المويه
وتحطين عليها ملح وفلفل وكمون واوريقانو بس شوي من كل شي لا تكثرين
وتحركي حتى تثقل وتقفلي عليها وتحطي ثلاث ملاعق مليانه جبن كاسات كرافت
وتحطين الهليبينو في صينية الفرن وتحشيها باللحمه بعدين بشاميل بعدين ترشين بغزاره جينه موزيريلا ورشة بارميزان
وتحطينها بالفرن حتى يسيح الجبن
تااااااااااااااااااااااااااااااااااااااااابع - Swr18
قوارب البطاطس
نفس طريقة قوارب الهليبينو
بس البطاطس اول شي تختارين بطاطس صغيره احلى وتحطينها بالفرن بقشرتها بعد ماتغسلينها كويس
وتخلينها حتى تستوي بعدين تقطعينها من النص وتحطين عليها حشوة اللحم والموزريلا مافي بشاميل
ترى سويتها لان خواتي طلبوها مني ونفسهم فيها من زمان وكان بخاطر ي اسوي الهليبينو فسويتها الثنتين
Swr19
هذي الصنيه كفته بالخضار بس الجديد فيها ان كل شي فيها كان ميني
ماقطعت شي
البصل والفلفل الرومي والطماطم والباذنجان اخذت كل شي صغيرررر مره كان شكلها حلووو
اول شي سويت اللحمه تبلتها بالبصل والبقدونس والشبث
والبهارات ودبس الرمان وكورتها كور كبيره شوي لانك اذا حطيتيها بالزيت راح تنكمش فـ لا تصغرينها بعدين تختفي خخخخخخ
جهزت الخضار عندي والباذنجان بس قطعته من النصل بالطول ورشيته ملح علشان يطلع كل مويته واذا قليته يصير مقرمش مو لين
اول شي حطيت زيت بقدر واسع وانتظرته يسخن بعدين حطيت اللحمه وخليتها تتحمر
وشلتها وحطيت بعدها البصل وحمرته وشلته وبعدين الطماطم شوحتها شوي وشلتها والفلفل الرومي وفي الاخير الباذنجان نشفته من مويته وشوحته وشلته
وكلها حطينها بصينية الفرن
والزيت لالالا ترميه
صفيه وحطي فيه ثوووم ومكعب ماجي وقلبي بعدين مويه وبعدين معجون طماطم لا تكثرين مويه بس نبغى صوص مو مرق
وحطي على الصوص اوريقانو وكمون وفلفل وخليه يغلي شوي وحطيه على الخضار وحطي اعواد شبث واعواد بقدونس وغطيه بالقصدير وع الفرن ماراح ياخذ كثير
Swr20
مكرونه بالخضار المشويه
اتعب وانا اقول لذيذه وكل يوم خواتي يطلبونها مني وانا مطنشه
مع انها سهله جدا
اول شي تسلقي المكرونه في زيت ومويه ومكعب ماجي
انا اخترت الورده والصدف
بعدين تاخذين باذنجان وطماطم وفلفل رومي وليمون وبصل وثوم وترشينهم بزيت زيتون وملح وتحطينهم بالفرن حتى ينشوون ويستوون
بعدين تشيلين قشرة الباذنجان والفلفل الرومي
وتحطين كل شي بالخلاط وتطحنين وتحطين ملح وفلفل وكمون وزيت زيتون
بعد ماتستوي المكرونه تصفيها كويس من المويه وتحطين الخضار عليها وتخلطي وبعدين تحطي من البشاميل الي سوينها لقوارب الهليبينو
وتحركي وتشوفي تحتاج لملح ولالا بعدين تحطيها بصنيه وتحطي فوقها البشاميل وتنثري عليها بقسماط علشان تصير محمره من كل الجوانب ومايكون فيها قشره انا هنا تفلسفت وكثرت بقسماط هي بس رشه تغطي فيها وجه البشاميل
وربي ماراح تندمي لو سويتها مره روعه وشي جديد
Swr21
كستلاته او ريش بصوص المشروم
اول شي تشوحي الريش في زيت حتى تتحمر وتشيليها
الزيت لا ترميه
تقطعي بصل وتشوحيه بنفس الزيت وتحطي الثوم بعدين المشروم وتقلبيها شوي بعدين تحطيها بصحن وتخليها على جنب
تحطي مويه شوي في القدر وتحاولي تطلعي كل الخلاصه الي لزقت بقاع القدر وترجعي اللحم لانه لسا ما استوى
وتحطي الماء اللازم لاستواء اللحم وتخليه حتى يستوي لا تحطين له شي من انواع البهارات
بعد مايستوي
حطي زبده شوي في قدر وحطي المشروم والبصل وخذي من المرقه حقت اللحممه وحطي فيها شوي دقيق وحطيها على المشروم
وحركي وحطي التوبل اوريقانو وكمون وملح وفلفل
رصي اللحم في صنية الفرن وحطي صوص المشروم عليه ورشيه رشه خفيفه اوريقانو وحطيه بالفرن بس عشر دقايق وبسسسسسسس
Swr22
هنا البوفيه صورت في بداية ترتيبي بس كنت ابي اوريكم طريقة الكاسات
تحطي فيها هالخبز كنوع من المقبلات توزعيه على طاولة البوفيه بكل مكان
خبز لبناني خفيف تقطعيه طويل وتحطي عليه بالفرشه زيت زيتون وترشيه بسماق او زعتر او جبنه بارميزان او موزريلا وتحطيها في الكاسات بهذا الشكل
Swr26
في النهايه اقول لكم خذوه العصير ادري اني نشفت ريقكم وانتو تقرون موضوعي
Swr29
ومع العصير خذو هالحلويات تستاهلون والله
وشكراااااااااااااااااااااااااااا لكم على متااااااااااااااااابعتكم لي واااااااااااااسفه جدااااااااااااااااااااااا اسفه اني طولت عليكم ومابغيت اخلص هالموضوع الي احس انه اطوووووووووول موضوع بعالم حواء
احبـــــــــــــــــــــــــكم وشكرا لكم مقدما
Swr23
انتظروا سفرتي اللبنانيه قريبا بإذن الله - ماشاء الله تبارك الله
رووووعه
بذات الرز والحم يشهييي - ماشاء الله تبارك الله
الف مبروووووك علي وعليك حافز وعقبال امي وامك هههههههههه
تسلم ايدك على هالوصفات والله يحرمها على النار ياااارب - ماشاء الله تبارك الله
مبدعة :)
مواضيع مشابهة
تابعي تجارب أخرى من هذا القسم.