السلام عليكم ورحمة الله وبركاته
وصلت للصفحه 21 توني واستفدت افكار كثيرة
وبما اني بعض الاشياء ما افهم فيها لانها للرجال
فزوجي قال نسخي واطبعي الاشياء اللي تحسين اننا نحتاجها ونستفيد منها
وحفظت اشياء كثيرة لكن باقي اتوقع لاني لسة في الصفحه 21 مثل ماخبرتكم
المهم
عندي بعض النصائح وبرضو استفسارات
اول شي ابتدي بالاستفسارات ومشكلتنا اللي مرقتنا ليل ونهار
ارضنا جنب ارض اخو زوجي
وارضنا وارض اخوة وارض جيرانا واللي حوالينا والمنطقة ككل كانت منذ عشرات السنين ارض زراعية !!!ولا .... جنبها على بعد 200 الى 500متر تقريبا مزرعه كبيره مرة بمساحه اكثر من مليون وفوق تقريبا لانها لامير
وش و معناته هذا !
اخو زوجي والجيران لقو الامرين لما ابتدوا الحفر
كل ماحفروو ...طلعت موية
يجيبوو وايت ويشفط
وتطلع الموية مرة ثانية وبغزارة
تعبوووا
وبالاخير قررو يبنووو ( يصبو على الموية
والجيران شفطو الموية وبذلو جهد وصبو بسرعه
وحتى لما صبوو ...طلعت المووية على الصبة !!!!
اخو زوجي له الان من سكن 5 أو 6 سنوات الان عندة مشكلة انه فية موية تطلع ( اقصد رطوبة وتكلسات نشوفها بين ترويبات السراميك بالتهوية الخارجية حولين البيت )
زوجي يبغى يتفادي هالشي واستنتج انه ممكن يكون من الموية
استشار كثيرين لكن ماحد عنده خبرة وحل لهالامر
وقرر
انه يحفر الارض ويصبها ويحط عازل من جميع الجهات حولين الارض
ويصبها ثانية
مالقى الا هالحل
اذا عندكم حل
ربي يجزاكم خير
المهم راح اقول لكم وشو سويت من قال زوجي راح ابتدي ابنى دوري مخطط
الى الان ننتظر يخلص المخطط ونبتدي مع مهندس الديكور
مشان ان شاء الله يارب فية احد يستفيد
المهم
مساحه ارضنا 420
خليت زوجي يحسب لي بالضبط مساحه البناء
وحسبها لي بالضبط وابتديت فيها
جبت ورقه وقلم ومسطرة ( حلفي) ومساحه بعد لان الخرابيط كثيرة خخخخخ
وابتديت افكر وين ابغى مكان المطبخ ويين غرفة النوم وين الصاله وين غرفة الضيوف ووين الغرف الاخرى
حددت كل وحده وين مكانها بناءا على المدخل وين بيكون
على فكرة نسيت ماخبرتكم
بما اننا انا وزوجي فقط بنسكن البيت والى الان ربي مارزقنا بطفل ( يارب دعواتكم )
فقررنا ان ناخذ ام زوجي معنا ونبني لها الدور الارضي كله واحنا فوق لنا كلة
بعدين قلت لزوجي ابغى اكبر شي بالبيت غرفة النوم والمطبخ
وعلى هالاساس اخترت المقاسات بالسنتيميتر واخترت حجم غرفة النوم والمطبخ اللي ابغى بحيث يبغى مكان اوكى لباقي الغرف
على فكرة انا عشرة اصفار على الشمال في المقاسات
اللي اقصدة يعني يقولي زوجي مثلا هل تبغين الغرفة 7* 7 تناسبك هالحجم
اقولة يعني وشو كبرة
ويضرب لي مثال
مثلا يقول ثل هالغرفة اللي احنا فيها واخذي من الصالة بهالحجم وحطي عليه وبيتكون مثل كذا او كذا
يعني يقرب لي الحجم
لاني ما افهم او ما اقدر اتخيل حجمها وهل بيكون مناسب لي او لا
وبرضو طبقت باقي مقاسات الغرف الثانية على هالاساس
بعد ماوزعت وين كل غرفة بتكون ويين مكان المطبخ والصالة وووو
ابتديت كل غرفة على حده
مثلا ابتديت بورقة جديده وكتبت فوقها غرفة النوم
ورسمت غرفة النوم وشكلها
اقصد يعني جدرانها ( لان انا مسوية تقوسات ) وبعدين رسمت وين بيكون حمام الغرفة وينقسم الى قسمين وبتفاصيلة من جاكوزي وشاور ورفوف والقسم الصغير المرحاض وانتو بكرامة والمغسلة ويفصل بينهم ياحائط زجاجي او جدار
القسم الثاني في غرفة النوم خليتها خزانه ملابس وتسريحه فقط
وفية تفاصيل ثانية بسيطة اتمنى اقدر انزل الصورة ان شاء الله اذكر ما انسى
بعدين رحت للمطبخ ( غرفة النوم والمطبخ هذولا اهم جزئين عندي بالبيت خخخخخخ) لاني ارتاح فيهم واتواجد بكثرة فيهم
والمطبخ اللي ابغية ونفسي فية يكون مفتوح
وسويته بتخطيطي ومخيلتي مفتوح
وفعلا سويناه
قسمت المطبخ الى قسمين
الجزء العادي الحجم الكبير بالجزيرة الصغنونه اللي راح اتواجد فية
ومساحه 2,5 في 7 ( طبعا بشكل طولي ) مخزن وقسمته الى جزئين
جزء للغسيل الغسالة والرفوف وووو
والجزء الثاني لاغراض المطبخ والثلاجات
وبرضو فية بعض التفاضيل البسيطة
بعدين خليت فية غرفتين للمستقبل باذن الله اذا جو لنا اولاد يارب وهذولا خليت وحده بحجم 4*5 والثانية 3*4 صغيرة لكن هذا الموجود ، لكن بسيطين جدا مافيهم اي كلام
بين الغرفتين حمام بالشاور حقة والمغاسل
بعدين في الوسط سويت صالة دائرية لها درجتين
وعلى احد الجدران حوض سمك بحجم متر في مترين
وجنب باب المدخل للبيت ( طبعا اقصد فوق الدور الاول )
سويت غرفة للضيوف وجنبها على طول غرفة الطعام وبينهم المغاسل والحمامات وانتوا بكرامة وبعدي يجي على طول مدخل لداخل البيت
مجلس للرجال سواه زوجي تحت في الدور الارضي تبع ام زوجي قال بالمرة
وسوى جزء بسيط منه غرفة مكتبة لة .
فوق السطح وبما انه مسموح بناء 50 % منه
سويت بركة سباحه جدرانها زجاج وبوفية صغنون ومغسلة وحمام وشور للسباحه ( بعد الخروج من البركة خخخخخ)
وحطيت مكان للشوي
وبعد ما ضبطته وسويته ( خسرت ورق كثييييره ) خخخخ
وبعد مناقشات مع زوجي والايجابيات والسلبيات ونغير هذا ونحط هذا ونشيل هذا وووووو
اعتمدناه
وقبلها بفترة كنا سالنا عن افضل مكتب هندسي وجمعنا الاراء وبعد السؤال اعتمدنا واحد واللي حسينا انه بيلبي احتياجاتنا باذن الله ( لانه فيه كذا شخص عملوا عندهم المخطط )
رحنا للمكتب ودخلنا على المهندس وعطيناه مخططنا البسيط وابتدى معنا
وحاول في بعض الاشياء يغيرها ووو لكن دائما كان نسالة ليش طرحت علينا التغيير
هل لانه الأفضل ولا إنشـــائيا ماينفع ولا وشو بالضبط
اذا كان إنشـــائيا ما ينفع فنغير اللي حطيناه ونجيب له فكرة قريبة من فكرتنا ويعتمدها
مانخلية يغير خصوصا اننا اقتنعنا باللي سويناه وهذا اللي نبغاه بشرط انه مايتأثر انشـــائينا لان هم افهم في هالامور
وحبيت اقول لكم ترى احنا زوجي وانا صفر على الشمال في امور البناء
لكن نسال ونتقصى ونقرا ونشوف ونحاول
المهم مضت مده 10 شهور واحنا بالمخطط نعتمد ونغير ونضيف ووووو
الان دفعنا الدفعه الاولى للمخطط وقالوا شهرين ثلاثة ويخلص
وراح نبتدي مع مهندس الديكور باذن الله ونقدم لة احتياجاتنا ونشوف وشو عنده واللي نبغاه احنا
وبعد مانخلص مع مهندس الديكور ندفع الدفعه الثانية ان شاء الله
وبكذا نستلم المخطط ان شاء الله ونبتدي نبني باذن الله
اعرف تونا بسم الله الرحمن الرحيم
لكن الحمد الله رب العالمين وصلنا لهالمرحلة
قاعدتي( دائما انظر للي اقل مني ...ماعدا في العبادة ) فاحمد الله واشكرة
الحمد والشكر لك يارب
واللهم ارزق جميع المسلمين والمسلمات ويسر لهم وارزقهم عفوك وكرمك
لاتنسون خواتي طمعانه في اجوبة لاستفساراتي ورايكم
► || الملف الثـــ 2 ــاني لبنــــــاء العظم || حياكم الله ◄
متابعة النقاش، صفحة 144