حبيت اقولكم عن حرمه جيراننا وعن عادتها كل
ماراحت للبر او الحديقه تاخذ كيس مليان من بقايا الخبز والاكل واذا راحت للبر تطلع الكيس وتكب اللي فيه للحيوانات والقطط والطيور وهذي عادتها كل ماراحت لاي نزهه
يمكن تشوفون الموضوع عادي او مايستحق النشر لكن والله يوم اشوف فعلها اقول يارب كم من الاجر كسبت بسبب هالحيوانات الضعيفه وخصوصا اللي تكون بمناطق نائيه وبعيده لعل هالصدقه تفتح لها ابواب عظيمه من التوفيق والخير لعل هالعمل البسيط والتافه بسببه تدخل الجنه بلا حساب -
موقف جارتنا يذكرني بامي الله يحفظها ويطول بعمرها يوميا تاخذ الخبز والتوست وتفتته للعصافير وتحطه لهم بالدريشه يوميا وفنجال صغير تعبيه مويه واحيان تعبى الفنجال مويه اكثر من مره باليوم خاصه هالايام مع الحر اشوف العصافير يطبون بالفنجال ويبللون جسمهم من الحر
خواتي هالكلام اقوله لنفسي ولككم لاتستحقرين اي عمل رحمه ربك واسعه ولا نعلم اي الاعمال تدخلنا الجنه خذي فنجال وحطي فيه مويه وخليه بالدريشه للعصافير ترى افضل الصدقه سقيا الماء لا طلعتوا للاستراحات والمزارع او انتم مسافرين خذي بقايا الاكل وحطيه هناك للقطط والعصافير كذلك العمال المساكين لاتنسينهم بعلبه مويه او شورما بثلاث ريال لعل فرحه هالمسكين تدفع عنك كربات في الدنيا والاخره ويرزقك الله بها استجابه دعائك ويرفعك بها درجات ......
...... الله يوفقني واياكم لعمل كل خير ويجعلنا من عباده المتقين
قال الله تعالى
يَا أَيُّهَا الَّذِينَ آمَنُواْ أَنفِقُواْ مِمَّا رَزَقْنَاكُم 
قال الرسول صلى الله عليه وسلم { أفضل الصدقة سقي الماء } رواه احمد وابو دواد والنسائي
عن ابي هريره رضي الله عنه عن الرسول صلى الله عليه وسلم: { إن مما يلحق المؤمن من عمله وحسناته بعد موته علماً علمه ونشره، أو ولداً صالحاً تركه، أو مصحفاً ورثه، أو مسجداً بناه، أو بيتاً لابن السبيل بناه، أو نهراً أجراه، أو صدقة أخرجها من ماله في صحته وحياته تلحقه بعد موته }