اش رايكم أخلي زوجي يفصل من وظيفته وأنا اصرف !!

السلام عليكم

أنا توني تعينت معلمه وزوجي عسكري وعندي ولد لاكن والله مافي راتبه أي بركه غير ان دوامه جاب له ولي الحاله النفسيه دايم خفارات ودوام وكان قد قرر انه يفصل وأنا أصريت علي الرفض

وحاليا لما بدات الأوضاع في البلاد ماتبشر بخير وبدات المرابطات صرت ماعاد أشوفه بس يجي ينام ويروح الدوام مليت من هذي الحياه وخفت لاقدر الله يي حرب يروح فيها ما أدري وقتها وش راح يصير فيني
صرت بس أبكي وقلت له وش رايك تفصل وراتبي يكفي وانت اشتري لك سطحه واشتغل عليها سكت وله ثلاث أيام غايب قلت ليه قال بفصل
أحس يوم جاء الصدق ندمت اني قلت له أفصل لأن بظل أنا لوحدي أصرف علي الشغاله والبيبي ونفسي وهو والايجار حرام
في نفس الوقت ما أبيه يروح للحرب لاقدر الله لو صار احس اني ما ابي اسامح نفسي اني رفضت انه يفصل

ما أدري أحس اني جالسه أفكر بقلبي مو بعقلي .... أبي أحد يقولي الصح نفسيتي تعبانه بس أبكي وحارمه نفسي الاكل تكفووووووووووووون

كل وحده تقول رايه ؟؟ ولو انحطت مكاني وش كان سوت ....

31 تعليق 10,173 مشاهدة

شاركي في النقاش

سجلي الدخول لإضافة تعليق.

التعليقات

30
  1. @aathb_alalhan_2

    تفكيرك اكيد مو صحيح اول شيء لما تقرري أنه يفصل لازم يكون هو حاط بباله وظيفة منيحة
    وبعدين صعب انه كل امور البيت انت اللي راح تصرفين عليها اشوف لو انت جزء وهو جزء الموضوع منيح لكن كل شيء انت لا اكبر غلط , وفترة المرابطة مؤقته اجل وش بيعجبك بالموضوع زوجك اللي ينام ويصحى والشغالة بالبيت وانت بالدوام ؟ شو الحلو فيه الله اقر جلوس المرأة بالمنزل والرجال هو اللي قوام على النساء وليس العكس
    على العموم انا بنت مو متزوجة لكن اشوف رأيي إن شاء الله انه صحيح ولاتنسيني من دعواتك
  2. @hnonh_am_rym

    لا نصيحه لايفصل خليه بوظيفته وانت بوظيفتك انت كذا تساعدينه بالمصروف احسن من يكون جالس بدون وظيفه دخل ثابت وتقعد له بعدين مستقبلا لانصيحه خليه بوظيفته انت وهو تعاون بعدين افتحوا لكم مشروع بسس لاتعودينه تري مع الوقت بتعجبه جلست البيت وبيقولك انت موظفه ونصيحه اذا مشكلة البركة كل شهر خصوص مبلغ لو ٥٠ ريال تصدقوا فيه اقسم بالله بتتبارك فلوسكم الله يوفقكم
  3. @alnori_1

    ليش تجنين على نفسك؟


    ترى مع الوقت بيصير رجل اتكالي ويحب قعده البيت..

    بس نوم واكل..

    وحتى انتي بتحسين انه يستغلك..

    ومستحيل ترضين بهذا الحال..


    الرجل وظيفته يحمي بلدنا

    وليش تخافين عليه
    ان مات مات شهيد وشفع لكم بدخول الجنه..

    هذا اذا كانت اوضاعنا متوتره..


    بس الحمدلله الحال مستقر..
  4. @alkhyaaal_2

    بصراحه انا حاسه فيك انا مو موضفه ومع هذا جتني فكرة اقول لزوجي يطلب تقاعد مبكر لانه في العسكريه
    خليه يفصل ويشتغل اي شغله بسيطه حتى لو رانتبها شوي
    مدام انك بتساعدينه
  5. @hrfalghla

    ياإختي أنتي غلطانه ليش تبينه يفصل بكره يعتمد عليك في كل شي حتى مصروف البيت و ماراح يدفع شي و حتى الصرافه ياخذها منك وتصير بجيبه زي زوج خالتي ماراح يكون فيه حرب ولا شي مافيه إلا العافيه كل هالمرابطات مجرد إحتياط وحذر لا أكثر ولا أقل لاتخافين

تابعي تجارب أخرى من هذا القسم.