يارب لا تواخذني على افكاري حبيت افضفض عسى من ترد علي تدخل الفردوس الاعلى بلا حساب

السلاااام عليكم
اخواتي في الله بكتب لكم واعذروني افكاري مشوشه وملخبطه وماادري اذا مكان موضوعي هنا او لا
مو عارفه من وين ابدا او وش مشكلتي بالاساس
انا ولدت ولدي الله يحفظه يارب بيكمل شهرين بعد يومين
ولدت وقدر الله تكون ولادتي قيصريه طبعا تعبت بعد ولادتي نفسيا وجسديا ومريت باكتئاب النفاس وكان حااااد جدا لكن الحمدلله على كل حال وربي يكتب الاجر
مشكلتي افكاري السلبيه وماكنت كذا قبل كنت متفائله وفرفوووووشه واحب اهتم بنفسي وبيتي وزوجي
اثررت علي هالافكار احس اني انا الوحيده بهالعالم الي تمر فيها هالظروف واحيانا اسلي نفسي واحمد ربي الي رزقني وادعيله بالهدايه والصلاح
انا مارضعت ولدي الا تقريبا نص يوم والسبب اني تعبت مرررررره بعد ماطلعت من المستشفى وصارت معي مضاعفات بعد العمليه وجلست بعد الولاده اسبوع بالمستشفى علشان العمليه وصوموني اول ثلاث ايام طبعا الي والده قيصري عارفه هالاجراءات
بعد ماطلعت استمريت عالمضاد وكان قوي علي مررررره ولا ناسبني وسببلي حراره وتعرق شديييييييييييييد وجفاف واسهال تكرمون مرررره قوي ماكان يمسك شي ببطني
ورجعت مره ثانيه عالمستشفى وتنومت وسوو لي تحاليل وجلست عندهم يومين وطلعت بعد ماصرفولي علاج يوقف الاسهال وانتم بكرامه طبعا النفسيه عدم والاكتئاب شدييييييييد
ماكان لي نفس لاي شي اهملت نفسي واكلي رغم اني كنت مررررررررره فرحانه بحملي ومستعده لولادتي ونفاسي بس بعد الولاده والي مريت فيه تغير كل شي
اثر غلي موضوع الرضاعه مرررررره دايم احس بتانيب الضمير وحاولت جاهده بس مايطلع معي شي وجربت الشفاطه ولا فيه فايده ماينزل معي شي وولدي رافض صدري تعود خلاص عالصناعي
احب ولدي واخاف عليه واوقات احس لا واحيانا احس اني بس البي له متطلباته وخلاص شعوري تجاهه مره متذبذب
اخاف ولدي مايتعلق فيني واني حرمته من الحنان رغم انه مو بيدي وقلبي يتقطع على الرضاعه الطبيعيه بس الشكوا لله
دايم افكر ان مناعته قليله وانه ممكن مايكون ذكي ونبيه ولا يحن علي ويتعلق فيني لانه مارضع طبيعي وان بس الي يرضعون طبيعي فيهم هالمواصفات
ايضا تعبت من السهر ولخبطة نومي ماانام الا اربع ساعات بس باليوم
ونظامي الجديد بعد رجوعي للبيت وتنظيم الوقت والغسيل والطبخ وكل هذا مع التعب وقل النوم
احس نفسي كاني بحلم ومثل الاله بس اسوي شغلي وانتبه لولدي واشوف حاجاته وبس بدون متعه او شوق لهذي الحياة الجديده
بنات تكفووووون ردو علي انا عارفه ان كلامي مخربط وموضوعي مو مرتب
اعذروني على الاطاله وشورو علي
وبسالكم كم معدل رضاعة الطفل بهالعمر ولدي تمر ثلاث ساعات انا اجي ارضعه وبالغصب احيانا يتململ لين يكمل الرضعه
وخااايفه من تطعيمة الشهرين ترتفع حرارته ماادري كيف اتصرف
حتى مالي نفس اطلع الناس بعطله وطالعين وانا بالبيت مالي خلق
اسفه على الاطاله ولاتنسوني من دعواتكم ربي يصلحلي وليدي ويعيني على تربيته التربيه الصالحه وييسر اموري
ولكم دعوه بالمثل
فيه كلااام كثير ببالي بس هذي ابرز نقطه عندي
اسفه على الاطاله مره ثانيه
وجزاكم الله خير يااخواتي