اللي تبي جسمهآ يلق لق وبشرة بيبي تشرف هون , مجهودي + تجربتي الشخصيه .

@mrh_28 عضوة جديدة







السلآم عليكم ورحمة الله وبركآته

أول موضوع اخترته للبشره وطرق العنآيه اللي استخدمهآ باذن الله تنفعكم

الجلد اكبر عضو في الانسآن ولآزم نهتم فيه مثل بقية الاعضاء لقول الرسول صلى الله عليه وسلم :"وإن لبدنك عليك حق فأعطي كل ذي حق حقه "
باستخدم اغراض معقوله وسعرها بمتناول الجميع باذن الله , بس السالفه ان الاهتمام هذا لازم تلتزمين فيه طول حياتك لانه يصير روتين يومي بالاستحمام :)
* ملآحظه بسيطه : الموضوع يتكلم عن الاهتمآم وأن البشره تكون طريّه ونآعمه مثل الاطفآل , لآيمت للتفتيح بِ صله لكن يوحد اللون مع العنآيه!
بسم الله :
بالبدآيه قبل لآتبللين نفسك بالمويه خلي بالحمام وانتي بكرامه فرشآة للجسم , ويوميا قبل الاستحمام شيلي ملابسك وخذي الفرشاه وأعملي فيها سنفره لجسمك من باطن القدمين الى الرقبه بحركه دائريه وماشيه على جهة القلب عشآن تتنشطين , هذي السنفره الجافه تزيل الجلد الميت وتطلع الشعر اللي تحت الجلد وتحرك الدم .

استخدم فرشآة بودي شوب سعرهآ 59 ريال وحلآل فيها بمآ انها طبيعيه وتجلس معاآك سنيييييين تقدرين تاخذين البديل بمحلات ثانيه اذا السعر ماناسبك تقييمي لهآ 10\10:
اضغطي هنا لمشاهدة الصورة بحجمها الأصلي

بعدهآ تفتحي المويه الفاتره مايله شوي للبروده لان الحراره تسمر + ترهل الجسم ياعاشقآت المويه الحاره انتبهوووآ حبيباتي , واستخدمي الغسول الابيض ماركة سانت ايفز بالكولاجين جميل جدآ ويجدد البشره وريحته بسيطه ماتترك اثر " ينفع للمتزوجات " المشمشي اللي جنبه غسول ومقشر بنفس الوقت استخدمه مرتين او ثلآث بآلآسبوع , عموما المنتجين مايتعدى سعر الواحد 20 ريال , تقريبا ب 16 العلبه تقييمي للمنتج 10\10:
اضغطي هنا لمشاهدة الصورة بحجمها الأصلي

بعد تجفيف الجسم نبدآ بآلآهم اللي هيا الكريمآت الجميله , الكريم اللي احطه بالمقدمه واتمنى الجميع يستخدمه لانه ممتاز جدا جدا في الترطيب : كريم فازلين بزبدة الكاكاو وانتبهوآ في كثير اشكال انآ اقصد هذآ اللي بالصوره وخذي اكبر حجم لان استخدآمه مهم جدا جدا ! :icon29:
سعر الحجم الكبير 8 ريال بس مو متأكده :
اضغطي هنا لمشاهدة الصورة بحجمها الأصلي

عموما فازلين بزبدة الكاكاو يستخدم للمناطق شديدة الجفآف : الاكوآع , الركبتين , والمؤخره صرآحةً مفعوله قوي لهذي المنطقه يرطبها ترطيب صح ويخليها ملسآء خاليه من الخشونه أو الحساسيه :wink2: , ريحته معقوله بالنسبه لي في ناس يحبون هالريحه وناس يكرهونها " للمتزوجات حطي الكريم قبل لآتروحين الدوآم مثلآ واذا كنتي ربة بيت حطيه وقت الشغل والتنظيف لانه قوي شوي " تقييمي للمنتج 10\10 .

~ يتبع
أتمنى عدم اضآفة رد


194 تعليق 83,548 مشاهدة

1 0

شاركي في النقاش

سجلي الدخول لإضافة تعليق.

التعليقات

188

  1. @mrh_28 عضوة جديدة

    صاحبة الموضوع #78714653




    ~
    كريم مُرطب من شركة جونسون وآنا من عشآق هالشركَه , الكريم جنآن يابنآت يزلق زلق يعني ماتتعبين وانتي تحطينه سلس جدآ جدآ , لان قوآمه سهل استخدمه بشكل يومي وترطيبه حلو تقييمي له 9\10 , امي مااعجبتهآ ريحته تقول غريبه هههههههه , المنتج بزيت اللوز , مآأفتكر سعره اعتذر :


    نجي لمنتجَ زُبدة الشيآ من ذا بودي شوب ! , شريته وللاسف حسيته عباره عن عطر اكثر من انه كريم , ريحة فآنيلآ احس مدري ليه ! ماحب هالشي ! عموما دآئمآ بالعنآيه ابتعدي عن المنتجآت اللي تحتوي عطور قوويه تجيب نتآئج عكسيه للاسف ومالها فآيده , المنتج ترطيبه قوي لكن لانه عطري ماافكر اشتريه مره ثآنيه , في نآس يحبون هالنوعيه , سعره 25 العلبه الصغيره ومآأشوف انه يستآهل , تقييمي 6\10 :




    مقشر الفراوله من ذا بودي شوب , عششق عشق عشششق , اصلآ ريحته عآلم ثآني جمييل جدآ اذا ابي استرخي وادلع نفسي احطه على جسمي واقشر , ارتآح نفسيآ بسببه ! سعره 47 ريآل بس يستآهل والغآلب اصلآ يستخدمونه , تقييمي 10\10 هههههههههههه :

    أقنعه من محل " نزيه " , حلوه بمآ انها رخيصه احطها بسآقي غالبا ويديني , تعطي رونق للبشره , سعرهآ 10 ريال العلبه , تقييمي 8\10 :


    شريت منتجين للعنآيه باليدين , الفازلين جميل لكن التعليمآت بالخلف غريبه والمشكله قريتها بالبيت , عدم التعرض للشمس لانه يحتوي على ...! ممكن يسبب حساسيه او حروق اذا حطيتيه وطلعتي للشمس ! غريب صح ؟ جونسون افضل منه ويرطب بشكل رآئع انصح فيه سعره : 10 ريال اتوقع , تقييمي 10\10 :


    موية الورد , يازينها بس :love:, خذيت علبة عطر فاضيه عندي وعقمتها وحطيت فيها موية الورد , لمن ارجع من الدوام اغسل جسمي واحط الكريمآت وابخ بابطي المويه وبين فخوذي احيآنآ واجففها او اتركها تجف , تقييمي 10\10


    غسول للوجه من كلين اند كلير استخدمه من ثآني متوسط , ابدآع يقلل من دهنية الوجه بما ان بشرتي دهنيه ! , سعره 25 يمكن او اكثر بريالين , تقييمي 10\10 :

    لدعك كعب القدم استخدم الحجر البرتقالي شريته من بسطآت بالمدينه المنوره ب 5 ريآل , الحجر الرمآدي من نكتآر جميييل جدآ ادعك فيه جسمي كله خصوصا الركب والاكواع لكن دعك خفيف عشآن مانأذي البشره مااذكر سعره لكن مو غآلي , تقييمي 10\10 :

    كريم مرطب للوجه حلو وكآن الوحيد بدون عطر بالصيدليه , لو يخلص مراح ارجع اشتريه لان بشرتي دهنيه وهو للبشره الجآفه بس خذيته لان مافيه عطر هههههههه , سعره 40 ريال وقلت خلاص مابيه قال عندنآ عرض علبتين بسعر علبه وحده , قمت شريته مغري العرض صرآحتن والمنتج حلو لكن زآد دهنية وجهي , متواجد بصيدلية تريآق الشفآء , تقييمي 9\10 :


    اشوف كل البنات اذا لبسو شوز فلات تتجرح اقدامهم من الخلف ! تعطي منظر قبيح وانا جربت هالشي لبست فلات ونزلنا الحرم وكنت امشي مسافات طويله انقطع الجلد من الخلف وجلس احمر فتره طويله جدا , ومع الاهتمام راحت اثآره الحمدلله ومن يومها لآزم استخدم هالمنتج اذا لبست فلآت , لصقة جروح لهذا المكآن , صيدلية ترياق الشفاء السعر 23 تقريبا , تقييمي 10\10 :

    من سبل العنآيه لمنطقة بين الفخوذ ماتلبسين كلوت الا وقت الدوره , ياعمري الاحتكاك يسبب سمار صعبه ازآلته , تعودي تلبسي بوكسر , او بنطلون سترتش تحت اللبس عشان يحميك من الاحتكاك , اللي متعودآت يلبسون قمصآن وجلآبيآت دايمآ لازم يلبسون بوكسر عشآن ماتحتك ويصير اسمرار قووي !

    آعتذر لآني طولت عليكم بس حبيت اذكر كل شيء , وان شاءالله استفدتو لو بحرف واحد

    مآشآءالله تبآرك الرحمن , لآاله الا الله , الحمدلله حمدآ طيبآ مبآركآ , استغفرالله العظيم من كُل ذنبٍ عظيم , اللهم اغفر للمسلمين والمسلمات الاحيآء منهم والاموآت .

    بأذن الله اشوف حمآسكم عشآن اتحمس أنزل موأضيع ثآنيه , بحفظ الله







  3. @brnsys_ord عضوة فعالة

    #78714745
    ماشاءالله تبارك الرحمن
    حبيت عنايتك كثير ي قمر مره حلوه والظاهر انها روتين
    وكذا البنت الشاطره تتخذه روتين عشان لا تتعب بعدين

تابعي تجارب أخرى من هذا القسم.