خواتي
انا اكتب قصتي الحين ودموعي على خدي من الحسره
احب زوجي حب جنوني متعلقه فيه بشكل مو طبيعي
تزوجنا عن حب كان لي الاب والاخ والصديق لين وصلنا مرحلة الزواج .. وبعدها
عشت اول ايام زواجي ملكه من فرحتي فيه يوم الله جابه لي
شوي شوي انخلقت بيننا المشاكل بس كنت اشوفها عاديه بحكم اننا متعودين نتزاعل ونرضى من زمان
بس مره من المرات طلعت انا وهو للسوق وهو بطبعه عنيد ومايحب اني اكلم عامل المحل وهو معي
بس اختلفنا في محل ولما دخلنا المحل الثاني وتكلمت قلت بكم هالجلابيه ؟ عصب وطلعني من المحل وراح للسياره وهو واصل اخره
رغم اني اروح للدوام مع سواق بدون محرم واكلمه اذا بغيت شي وهو عارف وعادي معه
بس مدري وش السالفه .. لما رجعنا للشقه دخلني وصك الباب وراح وكنت ابكي مقهوره وانا قبلها من فتره اعصابي تعبانه من مشاكل مع اهلي
وهو عارف يعني المفروض يقدر
رجع لي بعد ساعه ونص تقريبا وهو بارد ومرتاح عادي وانا كنت ابكي .. تكلمت وانا معصبه وهو ردوده بارده مستفزه وكنت جالسه وبحضني مخده صغيره و وقفت وانا معصبه وحذفت المخده
بحضنه كنت بحالة انهيار وانصدمت من سواتي هذي قمت اعتذر بس مابلعها رغم اني ماكنت اقصدها وربي وخفت من تصرفي هذا .. وعلمت اهلي واتصلت امي واعتذرت واخوي بعد
بس حسيت انه يسلك لهم .. ومره من المرات كنا نايمين ودق جواله للحد المزعج وقمت اخذت جواله ابي اصمته وجت رساله مكتوب فيها ( احبك ) !
هنا انا انتهيت وتدمرت اعصابي .. وقومته من النوم وقلت له وش معنى هالرساله ؟ حلف لي مايدري من مرسلها قلت له اتصل على راعية الرقم واكرشها قال لاا .. هنا انا كبرت بخاطري
وصابتني عقده نفسيه وصحتي فـ النازل
صار بارد ابرد من الثلج ولا يهمه تعب اعصابي وصار يطنش مكالماتي يوم رحت عند اهلي ولا يرد واذا رد صرفني
واذا واجهته قال اعصابي تعبانه وانا راسي للحين مانسى ذاك الموقف يقصد ( المخده ) ولازم افكر بالموضوع واشوف وش الله يكتب
جلست على هالحال ياطويلات العمر شهر ونص وهو مايعطيني ريق حلو بس انا اللي اتصل واعبر عن شعوري وحبي له وهو كل ماله يزيد وفي هالشهر وانا ملتزمه بالدعاء وصلاة اخر الليل وقراية سورة البقره وكثرة الاستغفار .. وماكنت اشوف حاله متغير .. واذا كلمته كذبت عليه وسويت نفسي مبسوطه واني رحت مع اهلي اسواق وكذا ماابي احسسه بالضيق عشان مايتضايق ويشيل بخاطره اكثر كنت ابيه ينسى ولكن ما فاد وانا والله ماطلعت ومالي خلق لا اسواق ولا مقابل احد
قلبي وعقلي عنده
رغم انه للامانه ماكان كذا ابد .. طول عمره رجال صريح ومايحب الظلم وفي قلبه رحمه وحنون
بس تقولون مسسسحور !
مااعرفه ابد !
الظاهر ينطبق علي المثل اللي يقول ( من خذاك حب خلاك عياف )
وقبل 4 ايام كلمته وقلت له احبك وقال انا بعد احبك وقلت له وحشتني قال وانتي وحشتيني اكثر فرحت من قلب واحس سكن روحي ونس وسعاده ماتتخيلونها قلت هذي بشارة خير وان شاء الله ان ربي هداه
وحتى قررت اني اتغير تغيير جذري لعيونه وقلت بسعده من قلب ولا عاد افكر اضيق صدره واصير مره سنعه لانه والله العظيم يسوا عيوني واكثر
بس بعد مكالمته هذي بيوم دق على اخوي وقال له ابيك بموضوع ولازم تجيني وهو مابينه وبين اخواني احتكاك كبير غير فـ المناسبات
قلبي قرصني .. وشكيت انه طلاق
مع العلم اني ماسمعت صوته عقب المكالمه الحلوه
ولا دار بيننا نقاش
حتى صرت اتصل عليه مايرد حرق قلبي اكثر !! وارسلت له مسجات اترجاه انه يرد واخر شي ارسل مسج وقال انا مالي خلق اكلم احد ولا ارد على احد حتى اهلي ؟!
..
واخوي بيروح له يوم الجمعه وبيشوف وش يبي منه
الله يستر مايكون تالي حبي وتولعي فيه طلاق
والله العظيم اني حاطه يدي على صدري وادعي ان الله يربط على قلبي مايطير عقلي من الهبله
والله يااخواتي اني في هم لي يومين حتى دوامي سحبت عليه
واكلي مااشتهيه وفي نومي خوف ووحشه احس اني فاقدته للحد اللي اوصل فيه ان كبدي تقلب وارجع اكلي الله يعزكم
وزواجنا لحد الان له 8 شهور
وهذا الشهر من اصعب ايام عمري واشدها على نفسي الخوف دمرني من داخل صرت احس اني طفله يتيمه وربي هذا احساسي
صارت الدنيا تخوف وموحشه بعيني
حتى الظلام ماعاد صرت اقدر انام فيه
نفسي يتغير الحال فجأه وتصير معجزه
املي بالله كبير وعشمي فيه خير رغم اني اشوف عكس ذا
بس الله يجيره والله يسامحه ويلين قلبه
ويهديه غصب عليه
والله يلعن الشيطان اللي دخل بيننا
حسبي الله ونعم الوكيل
تتوقعون بعد قصتي هذي اني انا الغلطانه ..؟
الموضوع مغلق