يابنتي وش يحدّك وأنتِ صغيرة وجميلة تاخذين مطلق وبعد عنده عيال ؟! يابنتي فكري شوي وتأكدي إنه ممكن يرجع زوجته عشان عيالهم بمجرد مايضمنك في بيته ، ولاتصدقين كلام المطلقين قبل الزواج بالثانية لأن أغلبهم يقول للثانية إنه مستحيل يرجع زوجته الأولى وإن عيشته معها ماتُطاق ويطلع فيها كل العلوم الشينة كل هذا عشان توافق الجديدة عليه ، وبمجرد مايضمنها في بيته يبدأ موال العيال ومسؤوليتهم وحاجتهم لأمهم وحنانها وإنّه مو قادر على تربيتهم والقيام بمسؤوليتهم بدون أمهم ( وهذا الكلام واقع وصحيح ) ثم يقول لك أنا رجعتها عشان عيالها وقلبي وحبي لك أنتِ لحالك وشوي شوي يبدأ موال الإحساس بالذنب وإنه ظالمها ومايعطيها حقوقها ومن حقها إنه يعدل بينكم في المبيت والمشاعر والطلعات والسفرات ( وبعد هذا من حقها طالما رجعها على ذمته ) ، ساعتها بتندمين عدد شعر راسك وتتمنين إنك تزوجتي واحد خالي ماعنده غيرك وإنت أول تجربة في حياته ومابقلبه أنثى غيرك ولا بحياته مشاكل ولامشاعر ولامسؤوليات خارج إطار حياتك وحياته . ياحبيبتي أنا من رأيي انفذي بجلدك ولا تشيلين حمول أكبر من عمرك واستطاعتك ، واسألي الله إنه يعوضك بالزوج الصالح اللي يستاهلك وتكونين أول فرحته .