اهلا بك اختي معنا وفعلا احنا هنا كلنا نساعد بعضنا في الاستشارات البسيطه ونخفف ع بعضنا من الخوف والتوتر ونسلي بعض فحياك معنا
شوي الفترة اللي راحت صار التجمع اقل تفاعل لكن بإذن الله كل من عنده سؤال مانقصر معه
وبانسبة لطفلك اللي فقدتيه اسأل الله ان يعوضك خير وان لايحرمك الاجر وانتي هنا المفروض تكوني فرحانه بإن فيه طفل سيشفع لك بإذن الله ولسبعين من اهله وينتظرك عند باب الجنه ويكون من طيور الجنه المفروض تهنين نفسك ع هالشيء وتحمدين الله ان رزقك بهالرزق لأن يمكن ربي يكون حاط لك منزلة ف الجنه عظيمه ولن تصليها بأعمالك ف يسخر لك مايجعلك تصلين لهذي المنزله مثل الاسقاط والمه وتعبه لأن له اجر عظيم
اما ربط الطواريء مستحيل يسوونه وانتي قد نزل منك مويات حتى لو شوية
واللي سووا ربط طاريء انا من ضمنهم ولكن كان الرحم مفتوح 2 سم والجنين نازل ف الحوض بس مانزلت مويات ولا شي وكنت في نهاية الخامس وتنومت ف المستشفى شهر ونزل كيس الموية ف نهاية الساطس والخمد لله ع قضاء ربي وقدره وقالي الدكتور كثير يزبط معهم ربط الطواريء ولكن حالتك غريبه شوي مع اني ع ظهري. لكن كل شي بالمكتوب والحمد لله رضيت بقضاء ربي واتمنى يكتبني من الراضين بقضاءه لأني واثقه كل الثقه ان ربي يحب عبده ويختار له دايما الخيره الصالحه ولو اطلعنا على علم الغيب لاخترنا ما اختاره الله لنا لأنه افضل ماقد يكون
ولاتشغلين بالك وتفكرين بالمستقبل الين يجي وخليها ع ربك انا كنت احس اني ما باقدر اتحمل طول هالمده محبوسه وع ظهري وكذا لكن سبحانه ينزل لك الصبر ويعينك ويمكن ف البدايو تخسين الايام ثقيله والنفسيه ماش لانك خايفه ومتوتره شوي لكن بعدها سبحان الله تمر بسرعه لدجة معد يمديك تخلصين شغلاتك قبل الولادة
ويوم تقولين خوفتك الدكتوره علشان قالت ضعف ف عنق الرحم ليش تهافين هذا الطبيعي عند اغلب اللي يجهضون ومافيه شي يخوف هي تبغى مصلحتك وتعطيك تقرير عن حالتك وهي طبيبه يعني موقفها مايسمح تقعد تجامل
ويوم قالت قد تحتاجين ربط ف كل مره تحملين انا أأيدها واحسها طبيبه كويسه لانها ماتبغاك تغامرين بطفل ثاني من دون ربط مع ان فيه ناس كثير ربطوا مرتين وبعدين من انفسهم معد ربكوا والا المستشفيات تصر عليهم يربطون وهم مايربطون وسبحان الله يتم ف انتي عيشي وحربي اول خنلين وبعدها ع خير فكري ف الحنل الثالث تربطين او لا
اما بالنسبة للدكتورة اللي تقول مانقدر نعرف الين تحملين ونتابعك قبل نهاية الثالث اسمحيلي بس كذابة لان انا وضعي يكون تمام ويقولون عنق الرحم كويس وكل شي وف الخامس ينفتح هذا معناته من ثقل الجنين يضغط ع العنق ويفتحه
اما المثبتات اكيد انها ضرورية خصوصا ابر برولوتون رائعه انا اول مه استخدمها هالحمل وقبل كذا فقدت طفلين الله يبلغني شفاعتهم
وزي ماقالت اختي ام غلا قارني نفسك باللي اقل منك واسوأ منك حالا مثل اللي ماتحمل مثلا او تحمل بصعوبة وعلاجات وحقن مجهري او او او هذولي كلهم اسوأ منا حالا عسى الله يعينهم ويصبرهم والله انهم يقولون لي ودنا نحمل ونتحمل كل الم وكل تعب وحتى الولاده عادي وتهون عندنا بس نشوف الضنى بين يدينا اسأل اله ان لايحرم انثى من ان ترى طفلها بين يديها سليم معافى بار احنا الحمد لله ماعلينا الا العافيه واذا سالفة انك بتنسدحين ع ظهرك خذيها من باب انك بتتدلعبن وانتي حامل ومابتشتغلين لأن ياما ناس كثير تتمنى شغالات وهم حوامل يبغون يرتاحون ف انتي بتكونين مريحه نفسك خلقه وكل شي يجي لعندك وريحي نفسيتك وخليك متفاءله ومبسوطه وروح مرحه بشوشه بتنعكس عليك وع حملك وع شخصية طفلك بإذن الله وبعد ماتقومين من حملك وولادتك بالسلامه بتحسي بقيمة ومعنى الحياه بتسعين لأشياء تسوينها يمكن ماكانت ع بالك وتذكري ان غيرك مقعد ومعوق سنين عمره كلها وهو ف مرسي متحرك او ع ظهره ف المستشفيات او ف غيبوبه ماينعرف وضعه ايش
وبالنسبة للربط زي ماقلتي كعملية مايخو بس اسمها عملية لأجل البنج العام والا وضعها الحمد لله سهل
وبعدها ليش تقولي تنحبسي غيري مصطلحاتك وكلماتك وافكارك وبتشوفين الحياه حلوة عيشي لحظات حملك لحظة بلحظه كلمي البيبي وتعلقي بربي اكثر وادعيه ف كل لحظة من قلب خاشع اطلبي ربي وابكي وترجيه يحقق لك حلمك ويتم حملك بخير والله انها احلى لحظات لأنك تحسين انك قريبه من ربي وانه مابيخيب ظنك
وبالنسبه للتجهيزات للبيبي وكذا عادي جدا استمتعي بها مع زوجك قبل لاتحملين خذي اشياء تناسب اذا كان ولد او بنت او اول شهرين بالحمل يعني قبل الربط
او اذا صرتي ف نهاية الساع ع خير بس حاولي ماتطولين وانتي تمشين
وبالنسبه لظروف حملك صحيح ممكن ماتحتاجين ربط دام ظروفك كانت كذا بس هل عندك استطاعه تغامرين المره الجاية بدون ربط ؟ ما اتوقع
وانا كان اول حمل ظروفي نفس الشي وعايشه على اساس ان حملي طبيعي وسقطت والحمل الثاني حريصه شوي وسويت ربط طواريء وسقطت معناته الاغلبيه اللي يسقطون بحاجة ربط وراحة ماتجي وحده منها الا فيما قل وندر
والتهاب البول او المهبل ممكن تفتح الرحم حتى وانتي رابطه علشان كذا لازم تتابعي اول باول تحليل بول واذا حسيتي بألم ف المهبل تسوين مسحه بس مو زين كثرتها لان ممكن تفتح الرحم
لكن التهابك البول ماكان قوي وماحسيتي بألم فما اتوقع انه هو اللي فتح الرحم
ويوم تقولين جلستي تطلقين يوم كامل معناته ان عنق الرحم مو ضعيف اقولك غلطانه انا جلست اطلق 3ايام طلق قوي ونزلوني غرفة الولادة ورابع يوم ولدت بس هذا الشيء يصير لانها ولاده مبكره لان الرحم مو مستعد للولاده بس اما معناته ان عنق الرحم قوي مو ضعيف لا مو دليل
وتأجيل الحمل رأيي من رأي زوجك خليه يستمتع فيك دام توكم متزوجين ويمديك ع الحمل لاحقه ع خير تخيلي انك ماتزوجتي اساسا وعيشي 6 شهور حلوة مع زوجك واستمتعي فيها وانسي الحمل
ولاتقولين الظروف اللي حولي تضغط علي
ليش يعني علشان اخته والا اختك والا بنت خالتك والا ايا كانت حملت لازم تحملين !! لا مو منطق كلن وحباته وانتي الحمد لله عرفوا انك بخير حملك طبيعي وخلاص لكنك محتاجة فترة نقاهه
والله كل من حملت بداية زواجها انها تندم تقول ليتني استمتعت بحياتي اول ولاحق. خير فل تفوتين الفرصه عليك الين ترتبين كمان اوضاعك وتحسي ان هذ الوقت المناسب وتاخذي اجازه من عملك او دراستك وريحي نفسيتك. واستعطي للحمل وزي ماقلت لك عيشي كل لحظاته لاتفكرين انك مقيده ومحبوسه وشييلي هالافكار وهالكلام م راسك
الربط تحتاجين فيه الى راحة تامه
الدرج والجماع والسياره والمشي الكثير او الجلوس الكثير والشغل كلها ممنوعه وتأثر
عيشي ملكة فترة حملك منبعد الربط الى الثامن بإذن الله
يعني كلها 4 شهور وشوي بإذن الله
واذا صرتي ف الثامن او حتى نهاية السابع مو تفلينها ههههههههه بس يعني تقدر تخرجي للضروره وكذا
والله يتمم علي وعليك وع الجميع يارب
وعقبال ما اشوفك تبشرينا بحملك ع خير ونفسيتك احسن م كذا وكلك بشاشة ومرح وعيشي عمرررررررك يابنوته تراك باقي صغيرونه والدنيا قدامك
₪Ξ❤Ξ»¯−_ღ أحلى تجـمع للحوامل الرابطات (ربط عنق الرحم) الـتاسع والعشرون ـღ_‗«Ξ❤Ξ二₪
متابعة النقاش، صفحة 154