
قررت ابتدي بين فترة والثانيه مشاركتكم ببعض الأجهزة عندي من البيت
اليوم بشارككم تجربة بجهاز ما في عليه تجارب نهائيا بالعربي
الجهاز هو
Home Cooker / Philips/ Jaimie Oliver
الجهاز بالتعاون مع الشيف المشهور جيمي أوليفر يطلع بقناة فتافيت
والجهاز جاني هديه فما اعرف سعره بالضبط
(اضفت السعر بالردود التالية)

سويت تجربة طبخات فيه وصورتها ومقطع فيديو لطريقة الجهاز
الجهاز كهربائي واكثر شي عجبني فيه انه يحرك لك الاكل يعني لما جربت الطبخ فيه ريحني من ناحية انه اوقف ع الاكلة عشان احركها باستمرار خوف تنحرق
وميزة مهمة تتحكمي بدرجة حرارة هاديه جدا جدا او عالية جدا حسب حاجتك وطبختك
وممكن تستخدمي المحراك اللي يحرك الاكل وممكن ما تستخدميه حسب متطلبات الطبخه
وغير هالشيء هو مو بس فيه قدر واحد لا هو يسوي لك كل الطبخات يعني تقدري تقلي فيه وتسوي اكل على البخار وتطبخي الرز او المعكرونه والمرق واي اكله كانت
وفادني انه لو خلص الغاز فجأة وزوجي بالدوام اقدر اكمل الطبخه فيه
وحتى تقدري من الاساس ما تطبخي على الغاز وتستخدميه بشكل يومي للطبخ اليومي
لانه الجهاز مو بس لاستخدام شيء محدد لا هو تطبخين فيه كل شي وبوقت واحد مع بعض ما عندك مشكله
جهاز عجيب عادة نشوف جهاز للبخار لحاله جهاز للرز لحاله بس هذا يطبخ لك كل شي مع بعض بجهاز واحد واهم شي يحركلك
محتويات الجهاز

الجهاز ايش تقدري تسوي فيه شوفي الصورة

الطبخات اللي ممكن عملها بالجهاز
ينفع للرز بحليب الحالي ، السليق ، الجريش ، شوربة كويكر ، الاكل الصحي على البخار، طبخ الرز ، القلي فيه مثل أي قدر ثاني، طبخ المعكرونه والمرق ، أكلات اللبن مثل الكوسه باللبن والكبه باللبن واي شي تبونه كل الاكلات تتسوى فيه
تقدري تستخدمي الوعاء الاساسي لحاله او الوعاء الاساسي مع سلة الرز والمعكرونه او مع السله الثالثة والطبق الرابع للبخار كلهم مع بعض ما في اي مشكله
فيديو للجهاز
صورت مقاطع صغيرة للجهاز عشان تشوفون فكرته بالتحريك
قلي البصل واللحمه ولا اوقفي حركي ولا اتعبي يحركلك وترتاحي
وسويت الأبلما او الكوسه باللبن
فيديو YouTube
تجربة طبخ الارز والدجاج والخضار بالبخار
بهالطبخه استخدمت الثلاث قدور او الوعاء الاساسي والسلتين وطبق البخار


وطلع الاكل طيب ومستوي وممتاز
بس لازم تحرصي انه تخلي فراغات بين الرز او المواد اللي تحطيها على البخار
ممكن لو انت ما حبيتي تسوي الرز على البخار عادي تكثري المرق بالوعاء الاساسي وتكملي طبخه بسلة الرز والمعكرونه الاساسية وبيطلع تمام
تجربة الرز بالحليب الحالي
اعتبروا هالتجربة تنفع مع السليق والجريش لانه نفس الفكرة
بصراحه روعه روعه روعه اعجبتني النتيجة وخاصه انه القدر ما فيه ولا شي محروق بالقاع نهائيا


طبعا يجي مع الجهاز كتاب لوصفات وطرق الجهاز وشرح متكامل
واستخدام الجهاز سهل جدا وغسيل المواعين معه اسهل خاصه انه سلة الرز ما يلصق فيها شي
الجهاز عجبني خاصة للاشياء اللي يبيلها تحريك واتوقع لو اتعود عليه بعد شوي بعتمده بشكل دائم مثل ما اعتمدت قلاية فيليبس الهوائية للنجتس والبطاطا والسمبوسه
نسيت اخبركم انه لما شفت مقاطع يوتيوب الجهاز يجي فئتين
فئة نفس اللي عرضته
ونوع ثاني هو نفسه بالضبط بس مرفق معه (برج التقطيع) يتلصق جمب القدر وتفرمي عليه البصل والخضار وحتى اللحم مباشرة ويحطه بالقدر
هذا شكله

ان شاء الله اكون شاركتكم بشي اعجبكم مثل ما اعجبني