حبيت ابشركم

http://forum.hawaaworld.com/showthread.php?t=3941121

http://forum.hawaaworld.com/showthread.php?t=3986346

http://forum.hawaaworld.com/showthread.php?t=3993933

السلام عليكم لاحلى عالم عالم حواء

حبيت ابشركم بالخبر الجديد الحلو ... يوم الخميس كان اعلان الحكم والحمدلله حكمولي طلاق بائن للضرر مع عدم المساس بحقوقي الزوجية ...بس للاسف اعطوه مهله 30 يوم لاستئناف الحكم اذا بعد 30 يوم ما عمل اشي خلاص الطلاق ثابت لا طعن فيه باي شكل من الاشكال.. وما ااتصور يستانف بعد الاعتراف تاعه امام الشهود الموكلاهم المحكمة وكانوا تحت القسم

الحمد لله رب العالمين هذا من فضل ربي ... حبيت اشكركم وحدة وحدة على وقفتكم جمبي وعلى سؤالكم عني باستمرار ... لما كنت اقرا ردودكم كانت عيوني ادمع من وقفتكم معي سبحان الله كيف لما رب العباد يجمع قلوب مع بعض بالرغم انا بعاد عن بعض وفي بلاد مختلفه ... برجع بشكركم وحدة وحدة.. وان شاء الله بعد 30 يوم لما يتثبت الحكم راح اجي وابشركم كمان مره

حبيت انصحكم نصائح من تجربتي ... لاني بقرا كتير مواضيع لخوات عاشوا الخيانه وذاقوا المر الشديد تاعها ... تجربتي كانت جدا جدا مره وما بتمنى لاي وحدة تمر فيها ..

1- خواتي في الله بنصحكم شو ماكانت المشكلة الي بتعاني فيها مع زوجك خلي صلاة قيام الليل هي مصدر راحتك وقراءة القران سرك .. وخلي المسبحه او خاتم الاستغفار دائما معكي .. كوني مع رب العباد يكون الله معكي... ادعي بصلاة الوتر بقلب خاشع واثق برحمة الله والله مستحيل يخذلك

2- الزمن غدار .. وماحد ضامن مستقبله وما حد بعرف علم الغيب ... انا عمري عمري ما توقعت هيك يسير في .. بنصحكم خلي الكم دخل مادي مستقل باي شكل من الاشكال... اذا بتشتغلي افتحي حساب بالبنك وخليه يستقطع من راتبك ولو 500 درهم المهم يكون الك قرش ابيض لليوم الاسود... واذا ما بتشتغلي وبتاخدي مصروف حوشي جزء من مصروفك للايام الصعبه.. واذا ما بتاخدي مصروف خبي دهبك واياكي تفرطي فيه باي شكل من الاشكال

3- لا تثقي بزوجك ثقه عمياء... اعطيه جزء من ثقتك بس مش عمياء ... انا كنت اشوف اتصالات وعلامات متنوعه على خيانته بس من ثقتي فيه كنت اكذب عيوني .. حسسيه انك واثقه فيه بس كمان راقبيه من بعيد لبعيد.. لا تتجسسي عليه لا بس راقبيه كل فتره وفتره عشان تقدري تحافظي على بيتك ومملكتك .. الرجل زي الطفل الصغير اذا ما ضليتي تذكريه بربه وبالوازع الديني مع اغراءات الزمن راح ينحرف عن الطريق

4- لا تخلي الطلاق اول اختياراتك... الطلاق صعب صعب صعب فوق ما بتتخيلوا الصعوبه .. الطلاق طلاق نفسي وعاطفي مش اي حد بقدر يتحمله بدك تكوني قويه جدا لتاخدي هيك قرار مصيري .. بدك تفكري ميت مره وتستخيري ميت مره .. حاولي بكل الطرق تصلحي امرك مع زوجك وتعالحي وضعك وتبذلي كل السبل قبل ما تفكري بالطلاق.. واذا قررتي تتطلقي .. لازم تحطي ببالك كتير امور.. عندك اطفال ولالا ؟ عندك استقلال مادي ولالا؟ هل اهلك متقبلين قرارك ولالا؟؟

5- في امور اصبري عليها وبشجعك على الصبر وممكن مع الوقت تتغير الامور وزوجك يتغير مع الاستمرار بالمحاولة ... بس لما يصل الامر لحد من حدود الله اياكي ثم اياكي ثم اياكي تسكتي .. لازم ادافعي مش عن حقك لازم ادافعي عن حق ربك .. مثل الزنا وشرب الخمر والمخدرات والشذوذ

6- الخيانة اذا مشيت بدم الرجل مستحيل يقدر يتخلص منها ... انا حاليا اكتشفت خيانه جديدة لطليقي انا بحارب بالمحاكم وهو بركض ورى وحدة جديدة وبقنعها تتزوجه وممكن اكتبلكم قصتها وكيف اكتشفت الموضوع وكمان كان يخوني معها خلال فترة زواجي ... بس رحمة من ربي كشفلي اياه كمان مره لاخر لحظة عشان ما اندم ابدا على قراري والحمد لله قراري صح ومرتاحه جدا

7- اذا قررتي الطلاق بعد تفكير طويل واستخاره واستشاره ووجدتي هو الحل الوحيد.. بدي احكيلك الزمن تغير ووضع المطلقة مو مثل زمان ونظرة المجتمع للمطلقة مختلفه جدا ... بتتخيلوا بس انتشر خبر الحكم وانتي تطلقت الناس بتتصل بتبارك ههههههههه .. حد متخيل بيوم من الايام الوحدة بس تطلق ينحكالها مبروك؟؟ الف مبروك ... انا وقتها بضحك بحكيلهم الطف تحكولي الله يعوضك بس مش غلط مبروك اني خلصت من الظلم والظلمة وحقي ماراح يضيع

هاي نصائح خفيفه لحبيبات قلبي بتمنى تكون مفيده الكم من واقع تجربتي واي حد بحتاج استشارة او سؤال انا جاهزة ماراح اقصر مع اي وحده فيكم