لاتفاولي على نفسك
ترى انتي اللي بتخليه يسويها بتصرفات تطلع منك من غير ماتحسي
وكلها بسبب تفكيرك في هذا الموضوع ..
لاتجيبي سيرة الزواج والخيانة قدامه حتى لو بالمزح ..
لمن كل شوية تتكلمي عن الخيانة وتقولي له بالمزح انتو الرجال خاينين وغدارين ..
انتي في ساعتها بتكوني مستنية منه جواب يطمنك ..
جواب تعودتي عليه وتنبسطي لمن تسمعيه
مستنية يقولك انا احبك ومستحيييل اخونك .. انتي مالية عليا حياتي .. معقولة اطالع في غيرك ؟؟
بس بينه وبين نفسه مع تكرار الموقف يصير يفكر بطريقة ثانية ..
وابليس يضبطها له احلى تضبيط ..
ممكن يبدا يستسهل الشغلة .. ويقول بينه وبين نفسه ...
عااادي !! كل الرجال خاينين ..
ليش ما اسوي زيهم ؟؟ زوجتي اصلا ماعندها ثقة فيا .. !!
خنتها والا ماخنتها.. انا بالنسبة لها زي كل الرجال الخيانة تجري في دمهم
يعني لو خبصت تخبيصة صغنونة .. مافي مشكلة .. شي طبيعي في عالم الرجال
وهوووب .. !!! يمسك في اول فرصة خيانة تجيه ..
حتى لو كانت ابتسامة عابرة لبنت نظرت له نظرة اعجاب ..
ولو عجبه الموضوع ممكن يزوده حبة حبة ..
فانتبهي تفتحي على نفسك باب ماتعرفي تقفليه ..
اما تكرار كلامك عن الزواج ..
او تسمحي له يقولك ايش يقولوله الشياب عن الزواج وتتنرفزي
بتخليه يستعمله تهديد لك لانه خلاص عرف ان الموضوع هذا ينرفزك ..
لاتقولي انا ما ابين له .. هو يحس وينتبه لتعابير وجهك لمن تجي السيرة !!
ولو مالاحظ انزعاجك ماصار يهدد بالزواج على ابيخ الاسباب ..
المرة الجاية لو كررها قولي له بلهجة جادة ..
لو سمحت.. لاتمزح بهذا الكلام ..
ماله داعي في الطالعة والنازلة بتزوج بتزوج !!
امسكي في قصة التهديد نفسها انه شي مزعج ..
ثاني شي انتي عارفة ان مافي شي يصير الا وربك كاتبه ومقدّره ..
لو مكتوب له يتزوج بيتزوج .. ولو مكتوب لك تصير لك ضرة بتصير لك ضرة
قلقك لايقدم ولا يأخر .. الدعاء هو اللي يرد القضاء ..
ادعي بكل اللي تتمنيه .. وان شاء الله ماتشوفي الا كل خير ..
شيلي من بالك الوساوس ..
وبعدين ترى مو غلط انك تبيني له حبك واهتمامك !!
بالعكس .. حسسيه انك تحبيه وسمعيه احلى كلامى ..
طالما انه يستاهل الحب .. حبيه .. بس بالمعقول ..
الغلط انك تخليه محور حياتك .. زي ما انتي مسوية كذا بينك وبين نفسك
اموووت لو تزوج .. اتجننن .. احلامي كلها زواجه وخيانته !! غلط غلط غللللط !!
هدي بالك يابنتي .. ماله داعي التوتر اللي معيشة نفسك فيه ..
الهم والنكد يبان على وجهك .. واعصابك بتتلف .. وبتطفي شبابك وجمالك بيدك ..
مايصير كذا .. انتبهي على نفسك وعيشي حياتك وانبسطي وخليكي متفائلة ..
واستودعي قلب زوجك عند اللي ماتضيع ودائعه وريحي بالك
اشغلي نفسك ووقتك بشي ينفعك عشان ماتلاقي وقت للتفكير في هذي الحاجات ..
لاتتركي نفسك للشيطان يعبي راسك افكار تدمر صحتك وحياتك ..
ربي يسعدك مع زوجك ويخليكم لبعض لايحب غيرك ولا تحبي غيره لااااخر العمر .. : )
زوجي وهاجس ال....؟
متابعة النقاش، صفحة 2