السلام عليكم
انا نفسي اعدل الشي الكثير بشخصيتي خصوصا اني زوجه وام وابي اكون مثل اعلى البناتي
يااخواتي انا شخصيتي اللي هي الثرثره وماعندي اي خصوصيه طبعا تلاقين اجلس مع قريبتي اللي علاقتي معها رسميه واهذر واقول كل شي الحمدالله الشي اللي محافظه عليه وماقلته زوجي يعني مااسولف عن زوجي ابدا
بس اهل زوجي طلعاتنا روحاتنا خوات زوجي صديقاتي كل شي تلاقوني اقوله القريبه علاقتي معها رسميه ثم اذا رجعت وجلست افكر اقول ليش قلت السالفه الفلانيه ليش قلت كذا ليش تكلمت فيهم وعن طلعاتنا وعن خرجاتنا انا غبيه لش قلت مع انها اشياء عامه وقد تكون خاصه بعد
ودي ابطل ذا العاده
والله يااخواتي لي 15 وحده من قريابي متزوجه ولا عمر وحده منهم جابت طاري اهل زوجها او صديقاتها ولا كأنهم موجودين لا رحنا كشتات ولا عزايم ولا شي سكتم بكتم ماتعرفين عنهم شي انا غبيانه اللي هي انا
بصراحه مانتبهت النفسي الا بعد مانبهتني اختي
قالت خفي شوي كل شي تقولينه زي يوم تقولين رحت الصديقتي وسوتلنا بوفيه وقلتي بعد قبل امس اجتمعنا مع اهل زوجي استراحه والعطله اللي فاتت سافرت معهم وش كل ذا ليش تعلمين مايحتاج خلي خصوصياتك لك مو كل شي ينقال الحين بالله عمرك شفني فلانه جايبه طاري اهل زوجها تر كلهم يروحون ويطلعون بس مايتكلمون ليش بس انتي ترى والله يااختي حلو الغموض وحلو ان حياتك ماتكون كتاب مفتوح للنااس سولفي بس مو كذا كل شي تقولينه والله مايصلح وقامت تنصح
انا ودي اغير هاالطبع والله ضايق خلقي وامي هاوشتني قبل فتره قلت البنت خالتي وامي فيه شفتي ام زوجي يدها متشنجه من راحت شغلتها تجهد نفسها بالشغل وتشنجت يدها ابي اعرف ليه خالتي ماتريح نفسها وش له الشغل الله يهديها عاد امي تقول وشوله كل شي تقولينه بنت خالتك على العين والراس وماقلتي فضيحه سالفه عاديه بس ماله داعي يعرفون كل شي عن اهل زوجك وحياتك سكري افمك ريحي والله يا اخواتي احس ودي اتغير بس عجزت
غير كذا المجامله فيني مجامله غير طبيعيه والسبب مابي الشخص اللي اجامله يزعل لو قلت الصراحه ودايم اختي تقول لاتجاملين بزياده جاملي بالمعقول انتي تجاملين الدرجة يبان المجامله لو اجيب قميص روز واقولك وش رايك حلو بالبسه بالسهره الفلانيه او بالزواج الفلاني بتقولين واااو روعه يجنن لازم ماتخافين وتقولين رايك بصراحه بس مو الدرجة الوقاحه غير كذا بناتي فيني طبع زي مثال مره وحده من القريبات ارسلت بالقروب صورة طفله جميله وقالت تشبه بنتك يابلنسيا اقول لا حرام هذي احلا من بنتي مابي يقولون عني مغتره وشايفه نفسي وامدح بناتي ونفس الشي اختي الحلوه عطتني تهزيئه محترمه وقالت ليش تحطين من نفسك ومن بناتك
والله يا اخواتي حتى اذا مدحوني وقالو الله محلوه او الله زاينه اقول لالا انا عاديه يتراوالكم مابي ابين اني فرحانه خوفي يقولون مغروره او شايفه نفسها
فيني طبع يااخواتي وخصوصا بقريباتي مابي ازعلهم لان طال الزمن ولاقصر مالي غيرهم وبشوفهم كثير فأحاول ارضيهم وامدح بزارينهم مثال لبس بنتك يافلانه يجنن ماشاءالله ياملحها بنتك تهبل والبنت عاديه جدا بس ابي افرح امها خصوصا انا قريباتي قويات وجداعات كلام واذا تسلطو تسلطو فمالي خلق مشاكل معهم
اختي دايم تقولي يابلنسيا ماقول لك ارفعي اكمامك وصفقيهم او تهاوشي معهم لا انا بس اطلب منك ماتجاملينهم وماتسولفين عليهم عن خصوصياتك عشان ترضينهم وتبسطينهم وتتجنبينهم قدر الامكان عشان تكون علاقتك معهم رسميه
كلامه عين العقل وادري بتقولون لي ليش كاتبه موضوع تاخذين راينا مدام اختك ماقصرت معك صحيح هي ماقصرت وتتعب واختي وانتم بعد خواتي ومحتاجتكم وش تشوفون الغلط بتصرفاتي وكيف اضبطها مع اقاربي خصوصا والاقارب بالتحديد خالاتي وبناتهم
اللي خلاني افتح موضوع واقولكم
هو موقف حصلي قبل ايام من وحده من قريباتي مظمونه انه انتي ضعيفه ومالك شخصيه وطال الزمن ولا قصر مالك غيرنا وتدورين رضانا ومهما سوينا فيك ماراح تزعلين هي ماقالته حرفيا بس سوت حركه معاي وتفسيرها كذا ومره ضاق خلقي ليش يعاملوني كذا مع اني طيبه معهم
الموضوع مغلق