دعيت على زوجي إن الله يحرمه من اهله ومن اصحابه كثر مايحرمني

زوجي انسان عديم المسؤليه كل ماطلبته شي يعصب حتى لو شي ضروري يقولي انتي تعكرين مزاجي..

وبعد صبر 4 سنوات خلاص ماقدرت اتحمل معه ...قلت له انا طفشت من الفقر دور لك على شغله خلاص لمتى وانت قاعد بدون شغل و.عصب وعصبت انا قلت والله لو مادورت لك وظيفه قسم بالله لروح لاهلي واهلك يتفاهمون معك..وصارت مشاكل كثيره بيني وبينه ..

وفي النهايه اصحر قرارات جديده قال اهلك ماتعرفينهم ولا تروحين لهم إلا يوم الخميس والجمعه ...
طيب انا اول كنا مانتقيد يعني خميس.وجمعه نروح اساسي باقي ايام الاسبوع إذا ناسبني يوم او اهلي جوهم ضيوف او اي شي اروح واحيانا اروح ساعتين وارجع ... واهلي قريب مني يعني مشوار دقيقتين بالسياره..
.
طبعا انا اللي قهرني انه صاحباتي بنات خالي وبنات وعماني نتجمع فقط ايام الاسبوع واغلب شي عند اهلي لان بيت امي انسب شي ..
زياده. انه احيانا تصير مناسبات ايام الاسبوع وخواتي يجون من برى المدينه اللي احنا فيها يجون فتره ويروحون وذحين رافض انه يخلين جمعه وخميس فقط ..كلمته قلت له اختي جايه من برى المدينه فتره وبتروح وبنت خالي بتزووج بعد شهر وهم مايتجمعون الا ايام الاسبوع بروح معهم اليوم رفض قال الخميس قلت بنات الحاره مايديهم خميس وجمعه عشان اخواتهم يجونهم ...قال ماعلي منهم ...لك يومين بالاسبوع للزياره فقط غير كذا انسي قلت له طيب انت ماقصرت ...يومين لاهلي بس انا اقصد لما تكون مناسبات ولاجمعات من غير اهلي زي بنات عماني وصاحباتي هذي ماتجي إلا ايام الاسبوع ومقدر اخليهم يحطونها يوم خميس وجمعه ...قال مو مسؤليتي .

حاولت اتناقش معه قال انا زوجك ولازم تطيعيني قلت اوك انا ماقلت لك بغصب عنك انا اطلبك مافيه شي لو يوم ناسب معي ومع البنات وتجمعنا بايام الاسبوع وانا اصلا مو دايم اروح لاهلي ولصاحباتي يعني احيانا يوم بنص الاسبوع من غير خميس وجمعه واحيانا ماروح ايام الاسبوع نهائيا ...قال اقولك لك يوم بالاسبوع فقط ولايكثر هرجك يوم خميس ولا جمعه بس واحد منهم ...طبعا انا عصبت وبكيت ...قلت له الله يحرمك من اهلك واصحابك وماتشوفهم غير يو م بالاسبوع ...قال انا رجال واطلع على كيفي قلت ومعناة انك رجال تظلمني قال وش ظلمتك فيه قلت تحرمني من الروحات والجيات بدون سبب ...هذا مو ظلم ..وتعسف بالقوامه ...قلت احرمني ع كيفك بس الله يحرمك من كل شي حرمتني منه ...قاهرني إنه جايه اختي والبنات يتجمعون وانا محبوسه بدون سبب ...وبنتي جننتني إذا ماطلعنا تطق طفش وتحط حرتها فيني مافيه احد تلعب معه وطايحه فيني ضرب وغير فوق راسي حتى لو اجلس على الجوال والاب توب مقدر امسكه منها احيانا تبكيني. من كثر ما ترفع ضغطي ..


انا حبيت اسألكم مين جربت ودعت على زوجها انه ينحرم من اي شي يحرمها منه.. واستجاب دعائها

للمعلوميه صاحباتي وقريباتي مايجتمعون كل يوم ولا كل اسبوع احيانا مره بالاسبوعين واحيانا مره بالشهر او حتى الشهرين

وانا فاضيه ماعندي لاشغله ولامشغله بنتي صغيره ...وهو بعد فاضي ماعنده شي بس المسأله تنكيد فقط قلت له ليش انتي تسوي كذا قال لانك ماتحترميني قلت عشان قلت لك توظف ولا جيب لبنتك حفايظ ... ولا عب الاسطوانه صرت قليلة ادب. .. قال انا انسان رايق وجالس ليش تجين تخربين علي وتقولين لي جيب و وروح وتعال. زوجي انسان مايحب المسؤليه وإددا طلبته شي يعصب

الاخوات اللي يقولون يوم او يومين تكفي بالاسبوع ...صحيح تكفي للاهل ..بس هو يقصد يوم بالاسبوع حتى لو ناس غير اهلي يعني لو بزور عمي ولا خالي. ولا صاحبتي ولا اي احد بهذ اليوم فقط لاغير ... سواء للاهل ولاغيرهم

وكم مره تروحون بالاسبوع لأهلكم ..وهل تتقيدون بأيام معينه حتى لو فيه مناسبات