جارتي وكلامها

السلام عليكم ورحمة الله وبركاته
خواتي في موقف مضايقني وانزعجت منه مره ,, المشكله ماعرفت كيف ارد او اتصرف لاني مصدوومه منه
انا ساكنه بمنطقه مافيها احد من اهلي او قرابتي ششبه وحيده المهم تعرفت علي جارتي وحبيتها لانها طلعتني من الوحده وكنت متطمنه لان فيه حد قريب مني يونسني وتعرفت ع اربع جارات بعد حبوبات لكن هي اقرب
وحده المهم عشان تكونون بالصوره ابداااااااااااا مانطري ازواجنا ولا مشاكل ولا حتى امور شخصيه قعداتنا كلها امور عامه واشياء عادي نسولف فيها وانا ماحب اسأل عن اي شي يخصهم ولا اتلقف ع حياتهم
المهم مره تعرفنا ع جاره جديده وكنت انا وجارتي الي قريبه مني والجاره الي توها ساكنه الباقي ماكانوا معانا
قاعدين مع بعض المهم الجاره الجديده فجااه تكلمت وقالت انها ابدا ماتقعد مع زوجها وانه يتضايق من هالشي وانها دايم تنشغل عنه قلت انا حاولي تخصصين وقت وتعودي ع انك تقضي معاه وقت ومع الوقت راح تتعودي
فجأه نطت جارتي وقالت انتبهي من الجارات لا يعرفون نقطة ضعفك ويستغلونها ويتقربون من زوجك !!
انا طالعت مصدومه بغيت اقول نحن جاراتها ! بس سكت و قلت اعوذ بالله صح الدنيا تخوف لكن الحمدلله الناس هنا تخاف ربها مو لهالدرجه فساد وسكتنا وتغيرت السالفه انا رجعت البيت مقهوووره واقول بنفسي كم هالانسانه تخوف !
يشهد الله علي اني مالاحظت شي من الي قالته بالعكس هي توصف ازواج جاراتي وصف دقيق واعرف انه لقافه فيها بس ليش التخوين بالناس تاكل وتشرب وتدخل بيوتنا وتشك وتخاف منا !!
المشكله زوجها بخيل جدا ومعروف بهالشي و حياتها جدا عاديه ماتخلي احد يلتفت لها وحتى لو كانت مرتاحه وزوجها مافيه منه وش نبي فيه استغفر الله تحسب مات الخوف من الله
صديت عنها لاني ماحب هالنوعيه من الناس دام ماتثق في زوجها لا تخون حريم خلق الله !
هالسالفه تقرقع بقلبي قسم بالله كنت مثل العسل عندها وكريمه معاها واخاف عليها ودايم اتطمن عليها الحين كرهتها ولا عاد ابي اواصلها المشكله اني غبيه رجعت ارسل لها واتطمن ع ولدها بعد مامرض !
وهي من النوع الي تجرح وصريحه لحد الوقاحه !
وش رأيكم ودي اسامحها بس ماقدر لانها وصلت للتخوين والقذف

20 تعليق 5,191 مشاهدة

شاركي في النقاش

سجلي الدخول لإضافة تعليق.

التعليقات

20
  1. @mngo

    والله ماشفت قذف بالموضوع
    كل إلي فهمته إنك حساسه شوي والمفروض تقولين هذي وجهة نظرها
    وإنها من الناس الحريصه زيااااده وحبت تنصح
    ممكن تتقبلين كلامها برحابة صدر وتعتبرينه وجهة نظر
    وممكن ترفضين مبدأها بس ماتوصل لإنك تكرهينها عشان هالسالفه
    أنتي ماتدرين عنها يمكنها مقررررروصه من ذا السالفه أو أحد من قربتها تعرض
    لموقف فحبت تاخذ الحذر ومش بالضروره تقصدك هي تكلمت بشكل عام
    وإذا هي ملقوفه تصرفي بحكمه وتصدي للقافتها
    إذا بندقق بكل شي بنجلس لحالنا !!!
  2. @hyaty_agml_1

    صاحبة الموضوع
    منجو
    والله ماشفت قذف بالموضوع كل إلي فهمته إنك حساسه شوي والمفروض تقولين هذي وجهة نظرها وإنها من الناس الحريصه زيااااده وحبت تنصح ممكن تتقبلين كلامها برحابة صدر وتعتبرينه وجهة نظر وممكن ترفضين مبدأها بس ماتوصل لإنك تكرهينها عشان هالسالفه أ…
    لا مو حساسه لكن صار لنا زمن مع بعض وتعرفنا زين كان بامكانها تقول انتبهي من الناس مو من الجارات
  3. اااايه
    خذي وخلي من هالدنيا
    نصيحة
    سمعي من اهني وطلعي من اهني
    الناس تتعب حييييييييييييييييييييل وابليس شاغلنا بهالبشر شغل
    لا تزعلين ولا تهجرين ولا تاخذين بخاطرك الا بكلام واضح صريح مباشر اما الكلام اللي يحتمل عدة اوجه وغير مباشر خليه يولي وعيشي
  4. @od_alodad

    كلمتها مالها داعي انتوا جيران يعني كأنها قالت بصيغه غير " انتبهي من هالجالسات "
    شكلها هي اصلا خايفه من هالنقطه ومن كثر تحفظها وتحفظك جت الجديده وفتحت المستور
    ع العموم ردك حلو وبمحله بس لو اضفتي من غيرنا ممكن يطمع بزوجها !
    الي صار صار وانتي الآن خلك طبيعيه وهي بس تسمع بهالمواقف وجتها صدمه
    وكويس الانسان يتحفظ ع حياته بس عاد ماقول للناس تراي اخاف منكم لانكم احتمال تاخذون زوجي !!
    خلك عايشه ووسعي صدرك وانتي بغربه وبعيده عن اهلك لا تنعزلين تتعبين ادخلي معاهم ولا يهمك كلامها
    كويس انك دخلتي مع اكثر من جاره تقدرين مع الوقت تناسينها وماتكونين محصوره معاها ..
  5. @pink_fo0ofo0o

    عادي كﻻمها صراحة انتي كبرتيها بزيادة ياما شفنا ناس نحسبهم توب باﻻخﻻق وانفجعنا لمى اكتشفناهم



    عادي ياشيخة المرة تحرص ﻻ اكثر

تابعي تجارب أخرى من هذا القسم.