@@ قصة ولادتي بولدي سيف @@

بعد السلام والتحية

احب اشكر كل شخص سأل عني او دعا لي بدعوة طيبة

انا الحمدلله بخير ....الله رزقني بولد سميته سيف (( على اسم الوالد – الله يرحمه)) بتاريخ 11-7-2006 على الساعة 11:40 صباحا

والحين حابة اخبركم عن تجربتي في الحمل والولادة

مثل ما البعض يعرف اني طوفت موعد الولادة –المفروض بتاريخ 19-6-2006 بس ماولدت ولا حسيت ببوادر الولادة ...قلت عادي البكر ممكن تتأخر اسبوع او اسبوعين

المهم الاياااااام كانت تمر وتمر ...وانا كل يوم النفسية تتعب خصوصاً ان الناس بدوا يسألون انتي ليش ماربيتي
انتي طوفتي الموعد !!!!! قومي وامشي ...اتحركي ...والبعض كان يقولي انتي متأكدة من تاريخ آخر دورة !!؟؟ ..الله يهديهم قاموا يشككوني في عمري وفي حساباتي ..مع العلم ان حساباتي 100% صح لاني كنت اخزن كل شي في تقويم التلفون ..يعني متأكدة من تاريخ آخر دورة ..بس الله مب رايد لي اني اولد في هالفترة

المهم انا ماخليت شي ماجربته من الاشياء اللي ممكن تساعد ع الولادة مثل:
عملت مرتين فحص داخلي لتحريض النفس على الولادة وماجاب نتيجة بس نزل علي دم لمدة يومين وتوقف
المشي لمسافة طويلة
المشي على رمل البحر
المشي في البر
شرب الزعتر والجرفة
اكل التمر والعسل
اكل الاناناس

حتى اني شربت زيت الخروع مرتين ولا جااااااب نتيجة (على فكرة انا ضد زيت الخروع وكنت دوم اقول حق البنات عن مضاره بس يوم شفت اني طوفت الاسبوعين عن موعد الولادة قلت اجربه يمكن يساعدني على الولادة)



خلال هالفترة انا كنت كل يومين اروح المستشفى واعمل تخطيط لنبض البيبي واعمل سونار عسب اتاكد من الماي ..والحمدلله كل شي كان تمام ..بس الدكاترة كانوا يقولولي اذا ماولدتي هالفترة راح نعمل لك طلق صناعي لان الموعد طاااااااف والبيبي بدا وزنه يزيد

والله ماتتخيلون كيف كانت النفسية ..قلت شكل هالبيبي بيتم في بطني ومابينزل ..كنت طول اليوم صياح في صياح ...كنت اقول الدكاترة كيف يعرفون اذا الموعد طاف او لا ؟! يمكن الحمل كان متأخر خصوصاً اني قبل مااحمل الدورة كانت غير منتظمة!!!

المهم انا في نهاية اسبوع 42 قررت اني مااعمل شي من محفزات الولادة ...واصلي صلاة استخارة على الطلق الصناعي ..وكثرت من الدعاء والاسغفار وقراءة القرآن (ماتتخيلون شكثر نفسيتي اتغيرت الحمدلله حسيت براحة غريبة)

وصلناااااا ليوم الاثنين 10-7-2006 كنت كالعادة سايرة المستشفى عسب اعمل تخطيط وسونار ..بس الدكتورة الله يهديهاااااا مسكتني وقالتلي انتي كل مرة اتييين وتوقعين على مسؤليتج وتطلعين ...انتي طوفتي واااااايد وايد ( كنت 43 اسبوع بالضبط خخخخ) وتمت تقولي عن المخاطر وان احتمال تجيبين ولد ....مريض وقالتلي تمي على هالحال لين مانسويلك قيصري !!!!! قلتلهاااا شو اسوي الولد مب راضي ينزل ...قالتلي خلاص تدخلين المستشفى اليوم وبكره راح نبدا مع التحاميل والطلق الصناعي

طبعاً اختكم :06:
زوجي قالي توكلي على الله وادخلي المستشفى وخير لين باجر الصبح ...ماتدرين شو بيستوي
بصراحة انا ماكنت ابا هالمستشفى ...كنت ابا اسير مستشفى خاص ..بس الوالدة مارضت ..وتموا يقنعوني لين ماوافقت ودخلت المستشفى

اول مادخلت عملولي تخطيط وسونار ...الحمدلله كل شي كان اوكيه بس الدكتورة خوفتني قالت البيبي مب اقل عن 3800 او 3700

الدكتورة نادت على الاستشارية الخاصة بالقسم عسب تاخذ رايهااااا في حالتي ..المهم الاستشارية من عقب ماشافت كل الصور ونتايج السونار اللي كنت اعملها طول فترة الحمل وعقب ماعرفت ان الدورة كانت غير منتظمة بعد الزواج ومن عقب مااتعالجت حملت ...بلغتني اني مب مطوفة موعدي وان الحمل كان متأخر وان موعد الولادة 9-7-2006 :booo:

وقالولي بنخليج في المستشفى تحت الملاحظة وبنعطيج فرصة يومين عسب اولد طبيعي (طبعا هالكلام قالوه لزوجي مب لي )

انا دخلت المستشفى الساعة 12 الظهر تقريباً
عملت تخطيط الساعة 6 العصر ورجعت للغرفة ...الساعة 10 ونص رجعت لهم عسب اعمل تخطيط مرة ثانية بس للأسف ماخلوني ارجع للغرفة ...خلوني على التخطيط طول الليل ..وانا مب عارفة شو السالفة ..دكتورة تجي دكتورة تطلع ..اقولهم شو السالفة ..يقولون البيبي وايد يتحرك بطريقة غريبة !!!
اقول في خاطري يمكن لان صارلي يومين مب نايمة الا ساعتين ..والبيبي يبا يرقد خخخخ
يسألوني انتي تحسين بالم اقولهم لااا ...مب حاسة بشي
الا شوي والدكتورة تعملي فحص داخلي ....
اقولها دكتورة بشري راح اولد .......جااان تضحك علي وتقول (..ولادة!!!!!... الا اذا كنتي زي الصاروخ)
وتميت على هالحالة على التخطيط ...مايبطلونه عني ..الا اذا بروح الحمام ..ويسألوني انتي ماكلة شي ..اقولهم انا من المغرب مب ماكلة شي ..

على الساعة 3 تقريباً حطولي المغذي (( وانا في خاطري اقوووول شو السالفة!!!!! ))
من عقب ماخلص المغذي قلتلهم ابا اروح الحمام وانتوا بكرامة ...اول ماقمت من السرير نزل علي ماااااااااي !!!!!!!!!!!! ياربي شووو هاااا ...من التعب ماقدرت امسك نفسي ((( ماحطيت في بالي ان هذا ماي البيبي )))

رحت الحمام ورجعت على التخطيط والمغذي لين الساعة 6 وشي ...كنت احس بضيق فضيع ...ماعرف ليش ...وكنت ابا اصيح ..وودي ارجع البيت ..طلبت منهم يبطلون التخطيط على اساس ابا اروح الحمام..بس هالمرة ماعرفت كيف اوقف ولا كيف اروح ...قمت واتصلت بزوجي واخبره باللي صار ..قالي شوي وراح اجي (( زوجي يداوم في نفس المستشفى )) المهم اول مااجاااا ..اقوله باللي صار ..قالي انتي بلغتيهم ان نزل عليج ماي ...قلتله لااااااا ...ماقلت حق حد

بعدها رحت واتصلت للوالدة ...وعلى طوووووووووووول وصلت

وعقب شوي تجي دكتورتين ووحدة منهن بغت تسويلي فحص ((( تعبت من هالفحص))) وقبل ماتبدا بالفحص ...الوالدة خبرتها ان نزل علي ماااي بس شوي ....قالت بشوووووف

وجاااااات الصدمة .....النفس مفتوحة 4 سم :eek: !!!!!!!!!!!! الحمدلله الحمدلله ...على طوووول قالت حالة ولادة ...انا من سمعت حالة ولادة صابتني رجفة فظيعة ...يركضون ويقيسون الضغط ..ويحطوولي اكسجين...ويحاولون يهدوني ..ويقولون احمدي الله كنا راح نعطيك تحاميل وطلق صناعي

بصراحة انا خفت لاني هالدكتورتين مااحبهم كلش .....معاملتهم زفت ويا الناااااااااس ....واياديهم في الفحص ثقيلة وايد وايد

بعد ماارتحت عملولي الحقنة الشرجية ...انا في هالفترة بديت احس بويع في بطني وظهري ...الوالدة قالت خليناااااا نمشي شوي في المستشفى ..الممرضة منعتناااا وقالت ممنوع المشي علشان الضغط !!!! شو يخصه
لبسوني اللبس الخاص بالولادة ...((الله يستر عليناااااااااا))
وردوا المغذي فيني تقريباً على الساعة 10
شوي الا واحس ان الويع يزيد ويزيد..وانا في داخلي اقووول يالله بدينااااا راح احسب المدة بين كل طلقة والثانية ......ماقدرت احسب....الويع ورااااااا بعض ورااا بعض .....وجهي تغير وصااااااار :eek:

شوي الا الدكتورة تجي ....وتشوفني .. ...اتكلم الممرضة(( كانوا مخلين ممرضة عندي اتابع حالتي )) وتقولها بسويلها فحص...والممرضة تقول محطين المغذي من نص ساعة بس ...قالت شوفي وجههاااااااا كيف ...المهم فحصتني وقالت 6 سم .......!!!!!!!!!!
على طوووووول تنادي الدكتورة الثانية ....وفحصتني ....7 سم !!!!!!!!!!
واناااا طول هالفترة ماسكة نفسي ....شوي الا بدا عندي موجة الصياااااااااح والصراااااخ ....مب قادرة اتحمل مب قادرة اتحمل ....احاول امسك نفسي ماشي فايدة (( على فكرة انا كنت ضد الحريم اللي يصارخون ...))طلعت مثلهم واكثر خخخخخخ كل اللي في المستشفى عرفوا اني راح اولد

تصدقووووون وانا اصارخ اقوووووووووول في خاطري الله يسامحكم قصيتوا علي ...((قالولي في فترة راحة بين كل طلقة والثانية ...وانا مااحس بهالراحة ولا شي ...))

المهم بدت فيني حالة الرجفة مرة ثانية ...ويركضون يحطولي اكسجين ...قمت اعض كمامة الاكسجين ..والوالدة اتقولي لاتصارخين ...خلي القوة لبعدين ..(( ليش شو راح يكون بعدين!!!)) ..لاتعضين الكمام ...عضي ايدي ((حليليها الوالدة الله يحفظهاااا من كل شر ))
وتميت على هالحالة وكل شوي فحص ...ومع الفحص توسيع !!!!...شوي الا احس بماي ينزل على السرير ..((ماعرف اذا هم اللي فاتحين ماي البيبي ولا بروحه))
بعدهاااا بشوي اقووول حق الوالدة وانا اصارخ ابا اروح الحمااااااااااااااام ....شي بيطلع مني ...والوالدة تقولي وين بتروحين الحمااااااااااااام ...ماشي حمام....اقولهاااااااا ...شي بيطلع !!!!
جابوااااااا الكرسي المتحرك ....يلا يلا يلا على غرفة الولادة ....بتولد بتولد ...بسرعة بسرعة !!!!!
وانااااا مضيعة خلااااص مااشوف شي ..ومااقدر اوقف ...خلاص ...يحملوني حمل على الكرسي ..ويغطوني ...ويلااا على غرفة الولادة ...وانا اصيح واقول للوالدة مااشوووووووووف شي
مااشووووووووف شي

داخل غرفة الولادة ...عذبوني وايد وايد ....كانت معاملتهم زفتة ...يعني انا بكرية مااعرف شو المفروض اعمله ...كانوا يصارخون علي ...ويقولون يلا ساعدي نفسك ...كيف اساعد نفسي !!!!!
المهم وايد تعذبت منهم ...اتخيلوا في غرفة الولادة شو كانوا يقولون عني ...(( هالعيلة طووول ع الفاضي!!! ....دي وزنهااااااا كم !!!؟؟؟....دي بنت مدلعة )) حتى انهم كانوا يضربون رجولي !!!!! حتى ان في وحدة من الممرضاااااااات قالت لحظة لحظة ابا اشووف البيبي يوم يطلع!!!!! مافي احترام لخصوصيتي!!!
انا ولدت على الساعة 11:40 صباحاً...محد كان وياي في غرفة الولادة ..لا الوالدة ولا زوجي ...بعد ماخلصوا وطلعن الدكاترة اصر زوجي يدخل يشوفني ((كان خايف علي وايد ...كانوا يسمعون صراخي وصياحي وصراخ الدكتورة علي))

اول ماحسيت انه عندي تميت اصيح واخبره باللي سووه فيني ....واقوله شو كانوا يقولون عني ...وهو يحاول يهديني ..مسكين هو بروحه كان في حاله ...ومن عقبها الوالدة ومرت خالي ...دخلواااا ..والوالدة تصيح ((تعرفون الامهاااااات كيف يخافون على عيالهم))

ونقلوني من عقبهاااااااا لغرفتي ....صابني هوس من اللي صاااار ...تميت يومين وانا اصيح من رعب الولادة ...واتخيلهم يدخلون الغرفة وياخذوني مرة ثانية للولادة ...ومرااااااات اسمع صوت التخطيط !!!

في النهاية عرفت انهم كانوااااااا محطين لي طلق صناعي !!!!! مابلغوا حد انهم راح يحطون لي طلق صناعي ؟؟؟؟؟!!!!!!!!!! عرفت الا عقب يوم سألت الممرضة بعد الولادة بيومين ...جااااااان تضحك وتقولي كنا محطين لك طلق صناعي !!!

دام النفس كانت مفتوحة 4 سم ....ليش ماخلوني اولد طبيعي ؟؟؟!!! من دون الطلق الصناعي ؟؟ ولا مايبون ينتظرووووون وايد ...خصوصاً هالدكتورة داومها في الفترة الصباحية بس !!؟؟:mad:

الله يسااااااامحهم ...

المهم البيبي اول ماطلع من المستشفى كان 3400

وهذي قصتي ...

خلاصة تجربتي ...عليكم بكثرة الدعااااااء وقراءة القرآن ....طول ماكنت على جهاز التخطيط وانا ادعي الله اني اولد طبيعي ومااحتاج للطلق الصناعي ...عليكم بسورة الزلزلة ..والمعوذات ...وآية الكرسي...((ياخالق النفس من النفس ..يامخلص النفس من النفس ...يامخرج النفس من النفس ..خلصني ))

وطووووووووووول فترة الولادة ...وانا اقول ((اشهد ان لا اله الا الله ...وان محمداً رسول الله ))

الله يسهل على الجميع .............ويرزق كل محروم ومحرومة بالذرية الصالحة ...


تحياتي

أم سيف