بنات والله تدعولي جربو وأنتوالحكم000

السلام عليكم ورحمة الله وبركاته 00
بنات هذي أول مشاركه لي في قسم الطبخ لاتحسبوني رفلى لا تراني حرمة ذربه بس ما أفضى من شغل البيت الله يعجل بالشغاله تجي أرتاح من الكرف


السالفه ومافيها أني رحت أزور أختي لينها مابقى شي ماحطته طبعا مهيب هي بنتها الذربه
عدي وأغلطي من ذا الاصناف دونات00سنبون00فطائر من جميع أشكاله00بيتزا00جبنيه0وخلية نحل ياقدمي00لكن المفاجئه أن الأصناف هذي كلها من عجينه وحده ولا تاخذوقت بس عشر دقائق وتنتفخ العجينه
وش رايكم محتاجين العجينه هذي ولا ماتبون أنا أخاف أتعب عمري من الكتابه وانتم ماتبون يكفيني كرف في البيت00 تبون علموني يالله انا في انتضاركم تكفون وسعو صدري تراني بازه بذا العجينه دبلت كبد رجلي بها من كثر ماأصلحها 00:09:

18 تعليق 2,957 مشاهدة

شاركي في النقاش

سجلي الدخول لإضافة تعليق.

التعليقات

18
  1. @ragy_alghfran_1

    صاحبة الموضوع
    حبابي أعذروني والله اسفه جدا ماأخرني في كتابة الموضوع الا أني ماني موجوده كنت عند أهلي
    اكرر اعتذاري وأرجو السماح
    أما بالنسبه للعجينه فهي روعه لكن أضبطوها 000

    المقدير00
    ملعقتين طعام خميره فوريه00
    كاسين ماء00 فنجال سكر مطحون00
    ملعقه بكنج بودر00
    نصف كأس حليب بودره00
    ذرة ملح
    بياله زيت00
    طحين

    الطريقه00
    قبل كل شي ولعي الفرن خليه يحتمي هذي أول نقطه
    ثانيا قومي على الخميره وحطيها في كاسين يعني كل ملعقه في كاس مع السكر وصبي الماء عليهالكن لاتملينها عشان لين أرتفعت الخميره ماتنكب00
    بعدين جيبي القدر اللي بتعجنين فيه وحطي الحليب والبكنج بودروالملح و الزيت والطحين بتقولين كم مقدار الطحين على حسب العجن يعني لين تصرالعجينه كويسه معك بعدين افركيه مع بعض حتى يختلطون مع بعض بعدين جيبي الخميره اللي أنتي خامرتها في الكاسات بتلقينها منتفخه وصبيها على المقاديروأعجنيها مع بعض لين تقول ربي الله راح تكون العجينه معك مثل العلك تنشب في اليد أستمري في العجن والصفق والكمخ ليييييييييين تبعد عنك يعني لين معد تنشب في اليد بس أنتبهي لاتكون قاسيه ولا تكون لينه مره يعني اذا تبي زيادة طحين زودي واذا تبي زيادة ماء زودي خلك فطينه بعدين غطيها ودخليها الفرن الحار بعد ماتطفين الفرن وخليها عشر دقايق واستخدميها لاي غرض دونات فطاير سنبون كل شي 00
    اتمنى تنال اعجابكم والله انا طلعت العجينه معي شي تاخذ العقل معاد استخدم الا هي في كل معجناتي لانها هشه وطعمها حلو علموني بالنتائج واي استفسار انا في الخدمه000

تابعي تجارب أخرى من هذا القسم.