حبيبي سافر وتركني مبارح، وطلب مني ما نحكي مع بعض او حتى نبعت لبعض مسجات عشان نقدر ننسى بعض مع انه هاد الشي رح يكون صعب، وانه عمل كل هاد عشاني، عشان ما يضل معلقني فيه واشوف نصيبي، وانه اذا الله كاتبلنا نصيب رح الاقيه يوم من الايام بحكي معي وبرجع من السعودية وبنتجوز وبنضل مع بعض على طول، وانه رح يضل يحبني وما رح ينساني طول عمره، وحلفلي انه عمره ما خاني او عمل اي شي يزعلني خلال الخمس سنين و 24 يوم.
بحكيلي مع الايام رح تتعودي مع انه صعب عليكي، كيف اتعود؟؟؟!!! هدول خمس سنين يا ناس، كيف اتعود ما يصبح علي؟ كيف اتعود ما يسأل عني باليوم اقل شي عشر مرات؟ كيف اتعود ما يحكيلي تصبحي على خير؟؟ كيف اتعود ما اشوفه؟؟ كيف اتعود اكل بدونه؟؟ كيف اتعود اطلع مكان بدون ما اخبره؟؟ كيف اتعود ما اسمع صوته؟؟ كيف اتعود انه بكل مناسبة النا ما يحكيلي كل عام وانتي بخير ويعملي مفاجئات ويجيبلي هدايا ويحتفل في كأني ملكة او كأني البنت الوحيدة بهاي الدنيا؟؟
انا عارفة انه بتعذب زي بس هو قلبه اقوى من قلبي وبكابر وبحكي من ورا قلبه، اتخيله ما قدرت اروح اودعه بالمطار، اهلي ما رضيوا، وطلبت منه يحكي معي تلفون اسمع صوته قبل ما يسافر حكالي مخنوق ومش قادر احكي ولا كلمة، حكتله بس اسمع صوت نفسك على التلفون بدون ما تحكي حكالي احسن ما نحكي لانه عارفني رح اموت حالي من البكى ورح نتعب اكتر.
طبعا ضل يبعتلي مسجات حتى طلعت الطيارة وانا انهرت وما بقدر اوصفلكم الي صار كنت ابكي بصوت عالي وبشكل رهيب ودوخت واغمى علي وكانت جارتنا عنا وهي كتير مقربة النا حكتلي انه وانا مغمى علي كنت انادي عليه.
عرفت بعد هيك انه امه صار فيها نفس الي صار في وانها كاينة تترجاه ما يسافر، طيب يا ربي ما دام بتحبه ومتمسكة فيه لهاي الدرجة كان خلتنا نتجوز وكان ما سافر وتركني وتركها.
بعتله مسج على موعد وصوله طبعا ما رد علي ورجعت بعتله انه يحكي يطمن على امه لانها تعبت، وبعتله بالليل كمان ما رد علي وبعدين سكر تلفونه وهو حكالي انه رح يلغي خطه ويشتري خط سعودي وطبعا ما بعرف رقمه.
والله حرام حب 5 سنين يضيع عشان عناد اهل، لمين تركني؟؟ مين بدو يسأل او يهتم في؟؟ تركني لاهلي وعيلتي يتشمتوا في لان الكل كان ينصحني اتركه؟؟ والا تركني لهاي الدنيا القاسية الي ما بترحم؟؟
اسفة للاطالة بس انا ما عندي حدا احكي او افضفض معه ورح اموت من قهري
بتنصحوني اروح عند امه اليوم احكي معها بما انها منهارة زي بلكي قلبها حن علي واتغير الموقف العدائي الي عندها، بكلي بس شافت كيف وضعي وشافت دموعي وحست بحرقة قلبي؟
شو رأيكم اروح عندها على البيت او لا؟؟ والا احكي معها الاحد القادم في عرس لاحد الاقارب ورح تكون موجودة واحكي معها وقتها؟؟ والا ما احكي معها بالمرا؟؟
انصحوني انا عقلي واقف عن التفكير ومش عارفة شو الصح وشو الغلط؟؟
كثرة الدعاء تغير الاقدار
متابعة النقاش، صفحة 15