السلام عليكم ورحمة الله وبركاته
والشهر مبارك على الجميع ولو انه متأخر
اولا اتمنى من المشرفات ما ينقلون موضوعي لأن هنا ما شاء الله التفاعل كثير
ثانيا انا ام لطفلين متقاربين بالسن وهالشي جنني كثير
بنت وولد بينهم سنه ونص والحمد لله على كل حال ادري انه فيه ناس يتمنون ظل طفل ودائما احمد ربي وأشكره
بس تعبت مره منهم ما اقدر اضربهم لأنهم صغار الولد عمره سنتين ونص والبنت سنه
طبعا واحد ينام والثاني يكون صاحي وبعدين يتبادلون الأدوار
من جد أهملت بيتي مره والسبب هم الله يصلحهم ويهديهم
المشكلة الكبير مره متعلق فيني لدرجة ما تتخيلونها لو اروح الله يكرمكم لدورة المياة اطلع ألقاه موجود يصيح يا ماما وينك
وطبعا أبوهم غالبا يعصب ويتنرفز اذا سمعهم يصيحون او يصارخون يروح للمجلس يقول انتي أمهم سكتيهم
صدق تعبت اليوم صحت لين صفى رأسي طول الوقت يبكون طول الوقت يحوسون ما قدرت اسيطر عليهم جالسه اكتب لكم الحين وكل واحد من جهة والحل يعني مع صياحهم والولد صار يقلد البنت في كل شي حتى في الصياح اذا شافها تصيح يصيح معها ابي اعرف الحل معهم يعني :confused:
شاركي في النقاش
سجلي الدخول لإضافة تعليق.
التعليقات
8- الله يفرج همك ويحفظهم لك والله يجعلهم من حفاظ القرآن الكريم وان شاء الله يكبرون ويرفعون راسك يارب
- معاناة اكثر الأمهات .. هم كذا الأطفال ورى بعض اصبري بعد سنه تبدأ الهوشات ..
- جيبي لهم العاب جديده يتسلوو فيها والله يصلحهم لك يارب
- صبري نفسك قولي كلها مسألة وقت لا اكثر والله الاطفال بي الشهر والثاني تتغير نفسايتهم ويهدأوا اول شي البيت ضروري تستعيني بشغاله لو بالساعه عشان نفسيتك الالعاب جيبي ع الشهر العاب كثيره وخبيها كل اسبوع طلعي العاب جديده الولد ابو سنتين ونص ضروري تضبطي نومه مع اخته والمفترض ان ابوه ياخذه معاه اذا انتي نايمه مع البنت يخفف عليك شويه عوديه على المسؤوليه اذا جنبك حديقه طلعيهم عشان يلعبوا ويفرغوا الطاقه وبعدين لو نومهم مو تعدل اذا طلعتيهم يتعدل وينضبط مع بعض وتحلي بالصبر قدر المستطاع كلها سنه بالكثير ويعتمدوا على نفسهم وتهدا شقاوتهم والولد يدخل الروضه كمان ويلتهي عنك ..
- الله يجزاكم خير على الردود والدعاء
والله يرزق كل محرومة من الاطفال
مواضيع مشابهة
تابعي تجارب أخرى من هذا القسم.