انا مشكلتي ياعزيزتي انتهت لكن حبيت انكم تستفيدوا من تجربتي وتنتبهوا لأشياء للاسف ما انتبهت لها الا بعد فوات الاوان ...
انا تزوجت من زوج ولله الحمد رجل صالح مصلي ومهتم ببيته واولاده مرينا بمشاكل بس عاديه تصير بين كل زوجين . انا وزوجي ولله الحمد من الناس اللي تجمعنا الطيبه وخدمة الغير . عندي صديقتي واعدها اختي من ايام كنا في الابتدائيه و صديقات حتى تخرجنا من الجامعه وتوظفنا ومستمرين في صداقتنا واخوتنا وتزوجت والحمدلله لكن ربي ماكتب لها نصيب استمرت العشره بينا ...في فتره لاحظت على زوجي تغييرات مسرح اغلب الوقت وجواله ماينفك من يده حتى الحمام معاه وحاولت اتقرب منه واساله اذا في شيء شاغل باله ولكن طمني انه مافي شيء . استمر حاله على كذا وشكيت مشكلتي لصديقتي واختي وتعوذت من الشيطان وقلت جائز اوهام والشيطان بيكبرها في راسي . في اجازة اسبوع بين الترمين رحت بالعيال بيت اهلي لانه عندهم مسبح وحبيت يتونسوا العيال وينبسطوا طالما زوجي موظف دوله ما عنده اجازه مع المدارس وقلت لزوجي بنام كم يوم عندهم علشان كمان اخواتي جوو من الشرقيه عندهم . ثاني يوم دقت جارتي وقالت لي انتي فينك؟ قلتلها عند اهلي بايته من البارحه وسالتني زوجك في البيت قلت لها ايوه. ثاني يوم دقت عليا قالت لي سامحيني بس ماقدرت اسكت ولازم اخبرك ترا امس حرمه دخلت بيتك من س ٥ العصر الين اخر الليل وصوت المسجل والضحك واصل لبيتنا وترا اليوم نفس الشيء دوبها دخلت واشتغل المسجل كانها حفلة دي جي فبيتكم .مهما وصفت لكم حالتي ماراح اقدر اوصلكم احساسي في ذيك اللحظه حسيت اني ما اشوف شيء معميه تمالكت نفسي وقلت لامي واخواتي انتبهوا للعيال بروح لبيتي زوجي تعبان شويه اطمن عليه وارجع لكم وطلعت وانا طول الطريق ارجف كانه كهربا ماسكتني واشرب مويه في السياره وادددعي ربي يثبتني ويلهمني رشدي
وافتح الباب بالمفتاح وادخل والقا المصيبه اللي ماتخيلت تصير ليا في يوم القى زوجي ومعاه صديقة عمري ..عفوا اختي اللي ماولدتها امي وهي في لبس فاضح ومكياج اشكال والوان ولمعااات في وجها كانها بنت ليل والبيت مقلوب كانه بار الاكل في كل مكان والمسجل ومقفل الشبابيك وانوار الديسكو مشغله جو معففن ولعت الانوار وصرت اطالعهم واسالهم اش هادا؟ ومسكتها من لبسها واصرخ فيها انتي اش قاعده تسوي مع زوجي؟ وصارت ترجف وماقويت ترد بكلمه ولاشعوريا صرت اضرب فيها واصرخ باعلى صوتي وهوا يمسك على فمي ويقولي اسكتي لاتفضحينا وراحت تجري تلبس عباتها تبغا تطلع وقفلت الباب بمفتاحي وطاح ضرب فيا وفتح الباب لها بمفتاحه ويقولها بسرعه اطلعي وطلعت فعلا وانجنيت ودقيت على اخواني وجوو وخليتهم يشوفوا بنفسهم ضربه ليا ووساخته وتخيلوا بكل وقاحه يقولهم ورقتها بتوصلكم واللي تبغاه من البيت تاخذه اختكم ماعاد لها عيشه معايا وهي ماسترت على زوجها ..انا شيطان غواني واختكم بتسبب لي فضيحه . شوفوا الوقاحه لاي درجه الفضيحه مني لكن فضيحته معاها على فراشي ماشافها . وطلع من البيت واتكلموا اخواني مع ابوه واخوانه وحكموا اني اجلس في بيتي مع عيالي الاربعه اربيهم ويدفع الايجار ومصروفنا طبعا اهله اشتروا سكوتنا على فضيحة ولدهم .وصديقة العمر بعد ٨ شهور من المشكله انزفت عروسه لزوجي وتزوجوا وسافروا شهر عسل ورجعوا وتخيلوا تقول للناس اني موافقه انها تتزوجه لاني مريضه ما اقدر اعطيه حقه في الفراش فاخترتها لانها صديقتي واعرف اخلاقها ...
الان انا مطلقه وعايشه مع اولادي ولا همني فقدان زوجي قد حرقة قلبي والطعنه اللي جتني من صديقتي ..انتبهوا خلي حدود لصداقتك ولاتدخلي زوجك في حكاوي صديقاتك ابدا الرجال وسخ وتفكيره يروح لبعيد .حسن النيه اللي فينا بطلوا منها حافظي على اسرارك مع زوجك وبالذات اسرار فراشكم مهو لازم تعلمي احد بحب زوجك لك وكلامه وهداياه لك في ناس نفوسها مريضه حاسده . انخرب بيتي وانفضحت قدام جيراني وعشت باقي عمري كني مترمله اربي عيالي وهو في احضان صديقتي متمتع بعمره
منقول
شاركي في النقاش
سجلي الدخول لإضافة تعليق.
التعليقات
68- حسبي الله ونعم الوكيل
الله لايهنيها الوووسسسخه
ربي ينصركككك عليها وعلى طليقك
عاجلا غير آجل - حسبي الله عليها قليلة الأصل اللي ماتخاف الله وانتي حلو انك فضحتيهم وبردتي خاطرك
- تصدقين دائم زوجي يقولي الحمدلله انو ماعندك صديقات دايم يكررها صح تملين بس صدقيني احسن لك انو مايكون عندك صديقه بس مو الكل عشان مايهجمون علي والله يعينك ويصبرك ويعوضك بشخص يسعدك احسن منه 🌺
اللهم إجعل همي الاخره 🌹 - حسبي الله ونعم الوكيل الله يرد لك حقك عاجل غير اجل
والطيور على اشكالها تقع - لاحول ولا قوة الا بالله
من جد اللي صار يقهر مو بس كذا..
ادعي ربك ومافي شيء بيضيع
مواضيع مشابهة
تابعي تجارب أخرى من هذا القسم.